Si ch'est qu'ou voulez faithe enragi Maît'e Cliément d'Caen ou n'avez qu'à li pâler d'tomates.
Pour tchiques années, Laiesse Ernon, san vaisîn, qu'est un braidgeux si jamais i'y en a ieu iun, s'est tréjous vanté d'la masse de sou qu'i' faisait sus ses tomates, et Mess de Caen fut bête assez de l'craithe et s'décidi d'en craître ettou.
Mais malheutheusement le pouore bouonhomme s'est brulé les daigts sérieusement et en est naturellement de bain mauvaise humeur.
L'aut'e jour i'vint au bureau comme d'habitude nos conter ses peines.
“Me v'là ruiné chute feis!” i'nos dit.
“Tch'est qui s'est arrivé don?” je li d'mandîmes.
“Arrivé? Ergardez l'prix des tomates!”
Et mé qu'en avais fait ch'tte année pour la prumié feis! Et ch'est tout d'la faute au peûle de Laiesse Ernon! V'là un menteux qui m'disait que ses tomates toutes ches années ilo li ont rapporté pus d'chinquante louis de cliai la vrégie.
Je comptais mé, que si ch'tait d'même que j'pouorrais oquo battre chenna, car ma terre vaut bain mus qu'la sienne, et comme un imbecile je m'décidi à en plianter chinquante mille.
Je sacrifye chinq vrégies de ma miyeu terre pour en mettre trente mille en prumié récolte avec l'intention d'en mettre vingt mille opprès les patates dans mes côtils.
Je n'tais pas en position d'èlever mes pliantes mémème, n'ayant pas d'serre siez-nous, ch'est en tchi j'en c'mandi chinquante mille siez Bram Le Picoteux à djaix-huit chelins du mille.
I' falli fourni onze chents casses à patates pour les mettre dedans et une partie d'ches casses-là ont acheteu le fond pouorri.
Dès qu'i' furent pliantées i' falli acater des bâtons et je n'avais jamais réalisé que ch'tait un itême aussi couôtheux. J'en avais à deux chents louis, sapresti!
Je m'étais imaginé que je pouorrethions les soigni entre mé et ma nièche, mais bah! je n'pouvions pas en aver l'au-dessus et je fus obligi de les donner à tâche au prix d'l'Union, ch'est-à-dithe, trente chelins du mille à tout faithe.
Et les dêpenses ne s'arrêtaient pas là. I' fallit acater un couplye d'machines à sprayer, deustrais chents livres de blue pierre, de la caux et ainsi d'suite.
Le rêsultat de tout chenna a 'té que quand je sis v'nu à en faithe le caltchul il a fallu dêbourser passant treis chents chinquante louis devant que d'penser à aver un sou pour mé.
L'autre jour quand j'apporti ma prumié cherge sus l'Weighbridge les marchands s'affliotchirent alentou d'ma vainne es s'minrent à pôtrindgi ma marchandise en cherchant à êmaglyi mes tomates avec lus mains.
Iun d'ieux m'dit comme chenna “Ou vos êtes mins à craître des tomates don Maît'e Cliém?”
“Vaithe,” je li raîponni, “et pourtchi pas? Vos en plaît-i?”
“Ah dame nennin!” i' m'dit “pas d'cheuses-là tréjous, i'sont trop meûthes.”
V'là tchi m'fit mârri dja chute feis-là, et j'lis dis “Tchi djâblye qui vos faut don, à vous, y a tchiques semaines ou trouviez que mes patates n'étaient pas meûthes assez! Tch'est qu'i' vos faut don?”
L'individu qu'accate pour Gaffe et Gobe-tout, et qui l'hivé passé m'airaichi un ordre pour deux tonniaux d'gouaîno, était assis sus l'banc et je m'en fus l'trouver et li offri ma cherge.
“Oh, j'en avons assez pour acheteu,” qu'i' m'dit, “la store en est pliaine.”
“Oh! ch'est d'meme?” je li dis, “eh bain, ervenez siez-nous m'offri votre saleté d'gouaîno, et pis je vos arrang'geai mé!”
A la fin un espèce d'Angliais eu l'toupet de m'en offri deux chelins treis l'chent, et je l'envyi s'promener.
Je resti sus l'Bridge pour pus d'une heuthe sans pouver vendre mes tomates et je vis l'moment que j'aithais à les remporter siez-nous ou bain les fliantchi dans la cauchie.
A un moment donné v'là un ouaisé qui s'appréchi d'mé et m'dit qu'i' r'présentait une demié-douzaine de maisons en Angliéterre et que si j'voulais expédier mes tomates sus man compte que je f'thais bain pus d'sous qu'à les vendre sus l'Bridge.
“Tout chenna est bon,” j'li dis, “mais tch'est que j'm'en vais faithe de chute cherge ichin?”
“Cachiz-là à man store,” i' m'raîponni et j'allons la patchi pour vous dans les paniers à iun de mes milieurs marchands.”
J'en fis autant, caltchulant qu'i' vaut tout aussi bain être volé de l'autre côté comme ichin.
Mais quand mes tomates furent viédgies sus sa tablye che r'était la même histouèthe comme sus l'Bridge, illes 'taient soi disant trop meûthes et les femmes qu'étaient à les patchi en fliantchaient treis dans une casse souos la tablye pour iune qu'i' mettaient dans l'pannyi.
“Si bain que quand ma cherge fut finie d'patchi i'n'y en avait qu'une vingtaine de panniers.”
“Et en avous ieu les r'tours, Maît'e Cliém?” je li d'mandîmes.
Oui, hier et i' s'raveinnent à chinq sous du pannyi d'clai! Comme chenna ma cherge d'tomates m'a rapporté justement chent-sous, justement assez pour payir l'patchage!
“Tch'est qu'ous allez faithe du restant d'votre récolte, Maît'e Cliém?”
Ah, dame v'là justement! J'm'en vais les passer sus l'Bridge pour chein qu'i' vaudront, i'y en a qui disent qu'i' r'levethont dans l'mais d'Octobre mais je n'y ai pas grand fouai.
I'y a une chose qu'est bain seuthe tréjous que jamais je n'en r'fethai une bougre, et à la fin d'la saîson si je n'peux pas erfaithe mes sous sus mes bâtons, je m'en vais les brûler.
“Et Laiesse Ernon?” je li d'mandîmes, tch'est qu'il en dit, li?
“V'là justement chein qui me r'console un mio,” se fit l'bouonhomme, “il a perdu la maintchi des siennes par la s'crèche, et i' s'en va faithe oquo pièthe que mé!”
Caouain
1929
Viyiz étout: