Ou sethiez êtonnés, mes chiers lecteurs, de vaie combain d'gens qui vainnent au bureau nos faithe part de lus peines et lus diffitchultés. I'pathaissent aver une diverse confiance dans les opinions du Chef, que de san côté, pose comme une autorité sus n'importe tchi sujet.
Eh bain, la s'maine passée, iun d'nos clients, un marchand bain connu entri dans la boutique et nos fit une assez drôle de tchestion.
“Combain qu'i' y a d'hommes en Jêrri qui sont chein que nous appelle des “hommes de pathole.”
“Dame!” se fit l'Chef, “je n'pouorrais pas vos dithe chenna sans êtudier les statistiques.”
“Tchi statistiques qu'i' peut y aver à chu sujet-là? I' faudrait aver du couothage pour publier une liste de ches gens-là. Je m'imagine bain qu'ous en connaissiz un bouan nombre vous, mais ou n'osethiez pas les exposer dans votre gâzette.”
“Ah dame, si fait!” raîponni l'Chef, “mais i' faudrait que je pouorrais prouver mes atchusations.”
Mais dites-nous don, tch'est qu'est votre motif en nos d'mandant chute tchestion-là?
“Tchiqu'un vos a-t-i trompé à ches dernyi?”
“Ah oui! Et pis salement. Et i'y en a ieu pus d'iun!”
“Et tch'est qu'ches gens-là pouorraient être mon doux?”
“Je n'm'en vais pas vos les nommer, mais ch'tait des fermiers. V'chin tch'est qu'i' s'est arrivé.”
Ou savez bain qu'opprès la saison des patates qu'avait fini avec les prix diversement bas, i' resti un grand nombre de vrégies de patates tardives intentionnées pour la comsommation locale.
Eh bain i'nos en fallait à nous et je fis une ronde dans la campagne siez les fermiers qu'en avaient, afin de tâchi d'en acater une quantité.
J'en trouvi tout pliain qu'étaient prêts à m'en vendre et qui me l's offrithent à un prix par le chent. Opprès aver bardginé un mio je tumbimes d'accord, un certain fermi me promettant tout ch'qu'il en avait à chinq chelins et d'mi le chent, délivrées à la store.
Il en avait au mains siex vrégies et à en jugi par un bu d'rang qu'i' dêfoui en ma présence i' d'vaient faithe au mains chinq cabots la perque.
Un jour le v'là v'nin avec une cherge, et i' nos laissi craithe qu'i' s'en allait nos en apporter comme ch'la touos les jours l'temps permettrait d'les dêfoui. Mais une semaine se passi et je ne r'vîmes pas not'e ouaisé. Un biau jour v'là sa femme qui téléphone et nos dit. “J'avons grand r'gret, mais je n'pouvons pas vos fourni d'aut'es patates, i'n'ont pas fait comme je nos attendions, la maladie les a prises et i'reste qu'des s'condes.”
“Et ous avalîtes ch'tte histouaithe-là comme chenna?” le Chef li d'mandi.
“Mais dame nouffait, je n'l'avalîmes pon, je savions bain que l'prix avait hauchi un mio et que j'avions affaithe à un attrapeux qu'avait vendu sa marchandise ailleurs à un pus haut prix opprès nos l'aver prominse.
Un autre de la même trempe m'avait vendu les siennes à siex chelins en m'disant, “Eh bain, ch'est un marchi conclu, v'là ma main par là d'sus, et pis ou pouvez compter sus mé, car ou viyiz, je sis un homme de pathole mé!”
Vaithe ch'tait un homme de pathole, si bain que quand je vis qu'les patates n'arrivaient pas, je m'en fu vaie tch'est qu'chenna voulait dithe.
Eh bain, i' fu pus franc qu'l'autre li, car i' m'dit cârrément: “Ou n'allez pas les aver car j'ai trouvé à les vendre huit chelins!”
“Mais, j'lis dis, ou m'aviez donné votre pathole que ch'tait les meinnes à siex chelins!”
“Vaithe, peut-être bain, mais ou n'avez rain par êcrit!”
“I' n'est pas pôssiblye qu'i' y ait des gens comme ch'la!” s'êcriyi l'Chef.
“Malheutheusement i'y en a que d'trop,” se fît l'marchand.
“Eh bain, le Chef dit, pourtchi pas dans des marchiers comme chenna aver un papi d'signé par les deux parties?”
“Che s'sait la même chose! Avec des gens de chu calibre-là ils adoptethaient toutes sortes d'triques pour faithe dispathaître les patates et lus signatuthe ne vaudrait pas mus qu'lus pathole.”
“Mais, absolûment, ou pouorethiez les traduithe en Cour!”
“Oh, je n'voudrais pas tout ch't embarras là! Mais je vos asseuthe que je n'y r'sethai pas happé.
Une autre feis quand j'aithai acaté des patates comme chenna, je les f'thai dêfoui mé-même et comme ch'la je s'sai seux d'ma marchandise. Pensez-don que sus quarante-chinq vrégies que sus quarante-chinq vrégies que j'avais acaté je n'en ai ieu qu'une cherge.”
Le Chef exprimi l'opinion que si n'importe tchi signait son nom à un arrangement ou à un contrat i' d'vait en remplyi les conditions et honorer sa signature.
Lâ-dessus le marchand li raîponni “Moussieu l'Chef, j'ai 'té dans l'commerce v'là bétôt quarante ans et j'ai tréjous trouvé que la pathole d'un honnête homme vaut mus que chinquante signatuthes.
“Vaithe,” se fit l'Chef, “un HONNETE homme.”
Caouain
1930
Viyiz étout: