L'aut'e matin quand je d'cendi dans la boutique je trouvi sus l'desk au Chef un magnifique “blotter.” Sus la couvertuthe je vis la photographie de treis hommes qu'i' m'sembliat connaître et quand je liu les noms, je vis qu'i' s'agissait du Président, le Vice-Président et l'Secrétaithe de l'Union des Fermiers.
Je m'en allais justement ouvri le livre pour l'examiner pas minutieusement quand l'Chef me tchi sus l'co et me d'mandi tch'est que j'tais à faithe là.
“J'étais à r'garder chu livre ichin j'li dis et j'voudrais bain en aver iun comme chenna, criyous que l'Secrétaithe de l'Union m'en don'nait iun?”
“Ch'n'est pas fort probablye,” i m'raîponni, i' n'y a qu'les membres qui sont supposés d'en aver quand i' paient lus souscription.”
“Mais absolument, le Secrétaithe est iun d'mes amins et j'ai tréjous souôtint l'Union dans mes articlyes, je n'crai pas que George m'en r'fus'sait iun si j'li d'mandais bain polîment.”
“Eh bain,” i' m'dit “tu peux y êprouver si tu veurs.”
Là-dessus je m'en fus tout d'suite à Bond Street et je d'mandi au Secrétaithe si ch'est qu i' pouvait m'en êpaigni un exempliaithe.
“Oh, oui dja Caouain,” i' m'raîponni “i' n'y a pas de r'fus quand ch'est pour un membre de la presse.”
Et i' m'en mins un pachèt sus l'conteux, et i' y en avait de trais couleurs et i' m'laissi choaîsi le sien qui m'pliaisait l'mus.
Quand je l'rapporti siez-nous, Marie Hibou ou était enchantée.
“Ch'tait justement ch'qu'i' nos fallait pour les p'tits Caouains à faithe lus êcrituthe dessus au sé quand ils ont des “home lessons” pour l'êcole.”
“Pas que j'sache!” je li raîponni, “chu “blotter” là à une trop grande valeur pour être mins à un patheil usage! Ch'est mé qui s'en va le faithe servi quand j'êcrithai mes articlyes pour “Les Chroniques.”
Et je prins buan soin de l'mettre à la clié pour qu'i' n'fusse pas dêchithé par les mousses. Je vos asseuthe qu'il en valait bain la peine. Sus le d'hors i' y a les photographies du Président, Moussieu Joe Le Masuthi de St. Cliément, que tout l'monde connait bain.
Joe pathaît p't-être un p'tit mio trop sérieux mais ch'est bain li quand-même.
Moussieu Mathèt, de la Haule, le Vice-Président, est tout-à-fait bain prins. Il a sus sa fache une expression de satisfaction justement comme quand iun d'ses boeus prend un premié prix à un “Show”.
Quant au Secrétaithe, je m'sais pas quâsiment tchi en dithe. I'n'pathaîtrait p't-être oquo pas trop mal s'il avait pus de c'veux sus l'haut d'la nuque, je n'sais si ch'est en Bretagne qu'i' s'est fait pliumer comme ch'la.
Le d'dans du livre est remplyi d'annonces qu'ont 'té insethées par un grand nombre de nos commerçants locaux et i' y a ettou la liste des membres du Conseil pour 1929; un bon long articlye par Moussieu Simpson de la ferme des Etats, sus la maniéthe la pus êfficace pour arrangi le “Spray” pour les patates et les tomates, la liste du Maître d'Port donnant les statistiques de toutes les marchandises importées dans l'île aussi bain comme toutes les exportations patates, tomates, bestiaux, pommes et tout ch'qui s'en suit.
Chute liste là vos don'na une idée des mille tonniaux de fain et d'êtrain que nou fait v'nin de d'hors et qui dev-thait être cru ichin. Ch'est des statistiques qui méthitent bain à être contempliés par nos fermiers.
I' y a ettou le nombre d'passagers qui sont v'nus un Jêrri, le récensement qui fut prins dans 1921, les grands mathées de l'année pour les siens qui veulent aller à basse-l'ieau sus les côtes ou bain ès Mintchiers, les statistiques de Moussieu Wilson quant ès saisons d'patates et, renseignement qu'est bain important la date de touos les Shows d'pâraisse et à Springfield duthant l'année 1930, avec finalement en d'dans de la dernié page le calendrier pour l'année.
Le Secrétaithe m'informe qu'il en a une copie pour touos les Membres à la m'suthe qu'i' paient lus souscription, ch'est pourtchi mes chiers amins ne perdez pas d'temps mais allez l'vaie au premié moment pour cherchi une copie de chu “blotter” là.
Marie Hibou espèthe qu'i' y en aitha iun d'restant pour lyi quand touos les membres aithont té servis.
Caouain
1930
Viyiz étout: