A M. l'Editeur de la "Nouvelle Chronique."
L'aute jour j'ettions en compagnie, et j'ettions à lièze vot gâzette, et l'anmin Jean mé dis: as tu prins avis à chut longue colonne d'avertissements que met touos chès messieurs percepteurs de taxe pour les tchans; le lis dis, chest la même chanson qu'j'avons tréjous à la même saison; mais i'm dis, ils n'ont pas d'raison, car il 'yan a qu'on mins pour le trente, et d'auotres pour le trente-qu'une de Janvi, pour allé les rancontré, pour dêcliaré, et pis péyi; car, dise-ti, si j'navons pas péyi avant le preumi d'Feuvri, il nouos f'rons péyi doublle taxe. J'lis dis, men Jean, n'té jênnes pon, êcris lus eune dêcliarations, et pis i'm pouôrront pas t'attrappé, car lûs annonces ne sont pas suivant à la loi. I'm dis, men Pierre, je criyais bain qu'il y'avait quique chose d'itait, car js'sait pièze que d'la rente foncièze qu'nou dé porté à la St.-Michet; Mais dit mé quêue chest qu'la loi, car j'pouôrrions ocquo bain nouos trompé! J'lis dis, men Jean, j'lavons ichin, et j'allons l'examiné; oprès l'avé examinaie, j'vinsmes à la conclusion que lûs annonces étais mal faites, et qu'ils ne d'vaient d'mandé que chein qu'est êcrit dans la loi, et qu'au lieu d'mettre au trente de Janvi, ils devraient mettre au preumi, et d'mander, suivant à la loi, des dêcliarations par êcrit, et pis donner la perception aux Vingt'nièrs, dans lûs vingtaines, et lûs accorder eune commission, pustôt qu'nouos faire couore touos à péyi au percepteur eune taxe pour les tchans. (Ce quin' se f'rait dans auqu'un auotre pays civilizèt.)
Jean, Pierre
26/1/1884
Viyiz étout: