Les Pages Jèrriaises

La Hougue Bie

 

La Hougue Bie
La Hougue Bie
La Hougue Bie est un monûment Néolithique - iun des pus grands et bein prêsèrvés en Ûrope. La tombe fut dêcouvèrte en 1925 duthant eune fouoill'lie par la Sociêté Jèrriaise.

La tombe fut couvèrte par un ênorme mondrîn, mais tchiques siècl'yes auprès la bâtithie, ou fut abandonnée et oubliée.

Au Mouoyen Âge, des chapelles Chrêtchiennes fûtent bâties sus l'mondrîn: la chapelle dé Notre Dame de la Clarté au douzième siècl'ye, et pis la chapelle dé Jérusalem en 1520. Ch'fut l'Sieur Richard Mabon, Douoyen d'Jèrri, tchi 'tait l'bâtisseux d'chutte dèrnié chapelle et nou dit tch'i' soulait y présenter des fausses mithacl'yes à seule fîn d'gângni des sou des pélérîns.

La légende d'la Hougue Bie - du dragon et du Seigneu dé Hambie - est bein connue. Nou soulait dithe qu'lé dragon avait 'tait entèrré souos l'mondrîn, ou pustôt qu'lé mondrîn avait 'té êl'vé sus l'corps du dragon, et qu'la Dame dé Hambie pouvait vaie l'mondrîn des tours dé Coutanches car ch'fut là qu'lé Seigneu avait 'té entèrré étout.

La fanmil'ye D'Auvergne transformit les ruinnes des chapelles en eune grand' maîson aristocratique d'vièrs 1780 tchi 'tait connu comme la Tou du Prînce. Ou d'vînt eune attraction pouor les touristes tchi c'menchîtent à v'nîn en Jèrri. Y'avait eune supèrbe veue du haut d'la Tou, et un hôtel fut bâti à côté envithon 1830.

La Sociêté Jèrriaise acatit la propriété en 1919 et dêtruîsit la Tou et l'hôtel.

À ches drein, nou-s'a r'gré l'entrée pouor mouontrer l'"us" originna. Quand les r'chèrcheurs avaient trouvé la tombe dans l'mondrîn ès années 20 du vîngtchième siècl'ye, il' avaient construit un tunnel en chînment. Mais chu tunnel n'taient pon drait - y'avait un mio d'eune angl'ye et chenna n'allouait pon au solé d'entrer dans l'tchoeu d'la tombe. À ches drein, nou-s'a dêcouvèrt qué, duthant l'êtchinnoxe du r'nouvé et du s'tembre, lé solé l'vant illeunminne lé d'dans d'la tombe. Et à part chenna, lé tunnel 'tait bein laid.

La r'griyéthie du mondrîn n'fut pon fait sans bein d's ardguments, et y'a acouo les cheins tchi disent qu'lé travas a 'té eune mêprînse. Mais i' faut dithe qué nou-s'a eune miyeuthe idée d'la tombe et s'n appathence dans les touos anciens temps, même si ch'est un mio chotchant d'vaie un monûment si bein connu d'eune faichon bein difféthente. Nou-s'accouôteunme à tout.

D'dans la tombe, y'a d'l'êcliaithie pus modèrne et pus discret ach'teu tch'a amendé l'atmosphéthe du monûment pouor lé vîsiteur.

Nou-s'a dit qu'souos l'mondrîn y'a eune deuxième tombe, mais les r'chèrches auve lé radar et d'aut's mouoyens modèrnes n'ont rein trouvé.

 

La Hougue Bie La Hougue Bie La Hougue Bie La Hougue Bie
 

Viyiz étout:

 

Les Pages Jèrriaises