Moscou est la capitale d'la Russie. La populâtion est dans les dgiêx millions d'gens: ch'est la pus grande ville en Ûrope par populâtion.
La ville fut fondée en 1147 par l'Prînce Youri Dolgorouki et d'vînt auprès tchiques années l'mitan d'eune prîncipaûté. La prîncipaûté d'Moscou fit un tas d'conmèrce et d'vînt riche. En 1380 l'Prînce Dmitri Donskoi dé Moscou battit les Tatars Mongoliens à la Batâle du Clios ès Bécachinnes et Moscou d'vînt l'preunmié pouvé en Russie. Quand la Russie fut libéthée des Tatars Mongoliens en 1480, Moscou d'vînt la capitale.
La ville enmuthaillie au mitan d'Moscou a nom Krémlîn - ch'est la vielle ville.
Lé Tsar Pièrre lé Grand r'muit sa capitale à Saint Pétersbourg en 1703, et Moscou 'tait mênommé la vielle capitale. La ville fut brûlé pouor empêchi l'otchupâtion des troupes Françaises en 1812.
Les Commeunistes èrmuit lus capitale d'èrtou à Moscou en 1918, et en 1924 la ville dévînt la capitale d'l'Unnion Soviétique.
Les Gammes Olŷmpiques prîntent pliaiche à Moscou en 1980.
Auprès la tchête d'l'Unnion Soviétique en 1991, Moscou r'dévînt la capitale d'eune Russie îndépendente.
La cathédrale dé Saint Basile est fanmeuse - ses coupoles sont un sŷmbole d'la Russie. Ou s'trouve dans la Rouoge Pièche, eune grande pliaiche du bord du Krémlîn où'est qu'nou vait étout GUM (eune grande boutique) et l'maûsolée à Léninne.
Lé Grand Thiâtre présente dé l'opétha et du ballet.
Lé Métro, lé c'mîn d'fé souôtèrrain, a des stâtions décorées - les cheinnes d's années 30 sont dans l'style du Réalisme Socialiste.
(prîns d'la Ouitchipédie en Nouormand et fait sèrvi atout la licence GFDL)
Viyiz étout: