|
J'ai vailé souotre Sînbad lé Mathinnyi, crouaîsi la mé à gângni des jaunets et par des ieaux înconnues j'ai viagi souos la brûl'lie êgaluante du solé. Tant d'fais j'ai-t-i' pensé à chu Sînbad et en chiéthi l'portrait à tigue dé corps. Ch'tait bégnadret doux d'rêver à Bagdad en criqu'tant par des hâvres à divèrs bords. Mais l'aigl'ye dé feu tch'êffeûque en loques, tchi portit chu Sînbad lé milsoutchi, mé gaffit et m'drotchit bas sus les rocques où'est qu'la brise d'la mé 'tait à rafraîchi. Qu'ma câsaque s'êvâque auve la rouogeu d'sang; dédans man tchoeu ma mort s'enfliambit d'hait d'êt' un moussetchot tchi rêve d'êt' lé galant d'eune d'mouaîselle abriée en hoqu'tes dé souaie. Et tout s'tait entréchîn à pèrte dé veue; mes pensées dêpensées en êtînchelles; et l'aigl'ye, auve mé tréjous au dget peîneux, s'avole en dêpatchant dé laize ses ailes. Nikolaï Goumilev Vèrsion Jèrriaise dé Geraint Jennings |
Viyiz étout: