Les Pages Jèrriaises

George d'la Forge pâle d'la Russie

George Le Feuvre

...En pâlant d'feunmâtchi m'ramémouaithe qu'en visite en Russie j'viyais bein p'tit d'monde feunmer. Sachant qu'là les nécessités d'la vie n'couôtent pon fort pus qu'dans d'aut' pays, mais qu'chein tch'est considéthé n'êt' pon nécessaithe couôte bein pus, et pensant qu'lé p'tun 'tait probabliément dans la catégorie du luxe, jé d'mandis à nouot' dgide si ch'tait là la raison qué nou viyait si p'tit d'feunmeurs. "Nannîn," i' m'dit, "ch'n'est pon l'prix du p'tun tch'en est la raison. La raison est qu'la feunm'thie n'est pon nécessaithe!"

...Sans vouler touanner Communiste, jé n'peux sénon admither l'dgide Russe tchi nouos disait, quand j'tions à Moscou: "En Russie, j'criyons qu'ch'est un honneu d'travailli, et les cheins tchi n'veulent pon l'faithe sont env'yés en Sibérie!"

...Pâlant d'disciplinne mé ramémouaithe qué quand j'tais en visite en Russie, y'avait eune femme (eune Angliaîche) dans nouot' groupe dé touristes tchi d'mandait tréjous des tchestchions impèrtinentes ès dgides tchi nouos prom'naient partout. J'tions à Moscou, et ch'tait un janne homme Russe tch'était dgide. Chutte femme-là lî d'mandit: "Tch'est qu' ou faites, en Russie, des éléves tchi tchittent vouos écoles s'gondaithes ou l's univèrsités d'vant aver finni lus êducâtion?" "J'n'en avons pon!", lé dgide lî dit, "Mais si, ou-s-en avaient!", ou lî dit "Touos les pays en ont. I' l's appellent des "drop-outs" en Améthique". "Eh bein," l'dgide lî dît, "en Russie, j'crions qu'ch'est eune honneu d'travailli et d'apprendre. Nouot' gouvèrnément nouos donne eune êducâtion, dépis l'êcole élémentaithe jusqu'à l'univèrsité, pour rein, et si tchique êlève est îngrat et bête assez d'abandonner ses clâsses et tchitter l'êcole dévant la fîn d'ses êtudes, j'l'envions en Sibérie!"

Jé n'veurs pon vouos donner l'împression qué j'sis en faveur dé tout chein tchi s'pâsse en Russie, et j'n'ai autcheune idée d'êt' communiste. J'sis trop viér consèrvateur pour chenn'na. Mais j'admithais la disciplinne et la trantchilité qué j'viyais partout.

 

George d'la Forge

 

Viyiz étout:

 

Les Pages Jèrriaises