Les Pages Jèrriaises

Tchi bouan fricot!



Comme tchi aver un bouan temps souos l'Commeunnisme et duthant eune période dé Prohibition? Né v'là la tchestchion quand j'tais êtudgiant en Russie en mille neu chents huiptante sept.

Not' dgaîngue d'êtudgiants Britanniques décidis dé faithe un bouan fricot et d'mangi comme des milsoutchièrs. J'avêmes un tas d'sou pa'ce qu'nou-s'èrchév'thait bein pus d'roubl'yes au nièr marchi pouor nos louis qu'l'êchange officielle.

Ch'tait l'êpoque d'la Prohibition à Gorbachev dans la grand' ville dé Voronezh dans l'Sud d'la Russie - l's aubèrges avaient 'té freunmées et nou n'pouvait pus c'mander d'l'alcool ès restaurants. Bein seu, l'chucre avait dispathu étout dé d'dans les boutiques car touos les cheins tch'en avaient mouoyen 'taient à brachi des bathilyies d'vodka en s'gret à la campangne.

Souos l'système commeuniste, les boutiques 'taient vièdes mais les paysans avaient l'drouait d'vendre des lédgeunmes et des produits d'lus p'tits gardîns dans l'marchi pouor un profit et, viyant les diffitchultés dans la boutiqu'sie, les prix coumme dé raîson avaient 'té haûchis jusqu'ès cieux.

Mais, chenna n'nos pôsait pon d'problième, et j'acatînmes un grand pithot - nou-s'éthait dit qué ch'tait coumme dans “Un Cantique dé Noué” dé Dickens - et, mé, j'allis au marchi pouor acater tchiques champîngnons pouor sèrvi auve ch't ênorme ouaîsé.

Les Russes mênomment la tchill'lie d'champîngnons “la traîsième chasse” - ch'est à dithe qu'auprès la chasse à la viande et la pêque, chèrchi des champîngnons dans les forêts, né v'là un sport et eune manniéthe dé vivre.

Au marchi, y'avait un êtalage auve des champîngnons - à côté d'ses potées d'myi et d'crème suthe, la vielle danme avait un boutchet remplyi dé toutes les manniéthes dé champîngnons, p'tits, bruns, grands, jaunes, bliancs, ronds, pliats....

“Combein qu'i' sont, les champîngnons?” qué j'lyi d'mandis - en Russe, bein seu.

Ou rêponnit en dithant l'prix pouor la bouqu'tée. “Mais i' n'm'en faut qu'tchiqu's'uns,” j'lyi explyitchis.

“J'vends la bouqu'tée,” oulle însistit - et don j'acatis toute la pêque.

Et tchi fricot! Un pithot êtuivé auve des champîngnons et du bouan pain Russe à tremper dans l'grévîn - mais tchi pitchi pouor nous l's êtudgiants qu'i' n'y'avait pon d'alcool!

Geraint Jennings

 

 

Viyiz étout:

 

Les Pages Jèrriaises