J'n'en peux presque pus! Ma pouore memmée est dans un estat pitchabye: ses gambes sont néthes; san dos est bliu; sa fache est pourpre ses cotes cont verts; et ou s'plient d'avé coumme eunne poutchie d'cliou dans les boyaux. Pépée a 'té oblyiji d'tchitté sa djob de fouithe pour v'né m'aidji a la neussé; et j'passons les niets chatchun not' tou. Le lend'main de s'n'accident - ou savez qu'ou fut souol'vée par un poffe de vent et fliantchie souos les branques quand l'bouais fut abattu - le lend'main de s'n'avarie, j'eumes le docteu, un jeune docteu angliais.
L'docteu c'menchi par demandé de ou-ès que j'taimes, combin qu'pépée gagnait, si j'avaiemes d'la terre a nous appartenant, tchès qu'était not' houmme d'affaithe, si j'avaimes des sous a la Banque, et tchès qu'y'avait d'sous a la maison. Quand j'y'eumes dit qu'pépée gagnait deux chents chinquante Louis par an, que j'y'eumes montré nos Contrats, not' livre de Banque, fait souos-pzé la bourse dans tchi y'avait siez louis et des sh'lings, et dounné un inventaithe de not' meub6ye - après cheunna, y pathut raddeuthérasseuthé, et ramonti vaie memmée. Il l'examini sus toutes les couotuthes; lis mint un thermomètre dans l's'ouïes et un baroumètre sus l'estouma. J'lis I' lis donni des talmouzes dans l'dos, et des cliamuses pus bas. I' lis soufflyi dans l's'ieux, lis mint du papi dans l'nez et tappi sus ses dents ov le manche de sa brioche. Et pis i' s'assit dans eunne tchaise et s'mint a chuchi un crayon d'pliomb en pensant.
Quant il eut pensé eunne bouonne pose, i' dit: "Chtte femme là est dans un terrib'ye estat! Oul a la diabete, les morouittes, la ponseresse, l'mal au roué, eunne barre en travers des boyaux et yeunne en long dans l'dos: oul a l'chérvé èslouessi la héthéque vertchie, les poumons pliens d'vent, l'tcheu plien d'sang, deux dents d'gatées, et eune r'frédeuthe a l'ouothelle. Ch'est un terribye cas!"
Mais docteu, réspé d'vou que j'lis dis: ch'est d'un poffe de vent et d'un vert bouais qu'mémmée souffres: Et j'explyitchi l'affaithe.
"Mais fallait don l'dithe devant!" qui dit la d'sus; et i' s'mint a la r'touoné chin-d'sus-d'sous oquo eunne fais. "Justement, qui dit: ne v'chin eune triyache ichin, eunne coppe là, oul a yeu un coup d'câsse-bouais sus chutte pliéche ichin, et ch'est du jus d'fielle qui y'ont mins les gambes si verts!" et y s'rassit pour pensé oquo eunne fais.
Enfin! Après avé pensé eunne pose et consulté un livre de méd'cine, i' dèshalli d's'otis d'sa pouchette, et r'cousi toutes les triyaches a mémée, et fit eunne coppe ès pliéches qu'étaient èscouochis - pour faithe sorti l'sang envlimé. "Gardez la bin fredde, qui dit: un lincheu seulment: n'lis dounnez rin a manji ni a bethe, et laissis la toute seule: faut pas pa laissé dormi sus autchun compte. Je r'vindrai d'main, et s'oul est oquo en vie, j'lis mettrons des sangsues driéthe le co."
Et coumme je l'viyais qui ne s'n'allait pon d'bouan tcheu, mais ettait ses fants, les r'otait, et toussottait en r'gardant l'fond d'san chapé - j'comprins! Combin qu'nou vos dét pour chutte visite ichin, docteu? que j'dis en allant prendre la bourse dans l'titheux.
Tout d'un coup sa fache s'èscliéthi, et y m'dit en souoriant: "Combin qu'ou disaites qu'y'avait dans la bourse?"
Y'a siex louis et tchiq' sh'lings, docteu, qué j'rèspounni.
"Ah! Good! qui s'fit: j'prendrai quat' louis anniét, Miss Pain, s'ou pliez! les deux autres attendront jusqu'a d'main" - et y s'n'allit en m'embréchant. "Et souognis tréjous d'la gardé bin frédde et rin a mangi" qui dit la dernié chose en freummant la porte.
Lonôre Pain
Morning News 29/1/1913
Viyiz étout: