Les jannes d'aniet n'peuvent pon s'înmaginner les tortuthes qué les campangnards souffraient quand fallait aver des dents êrachies y'a eune septantaine d'années. Les gens supportaient l'ma ès dents pouor des s'maines. tchiquefais des mais d'temps dévant prendre l'couothage d'aller l's aver halées!
Dans chu temps-là ch'tait les docteurs tchi l's êrachaient. Quand j'tais mousse i' fallait marchi des Landes dé St. Ouën jusqu'ès "Siex Boules" pouor en vaie iun. Il allait là eune arlévée ou deux la s'maine. I' vouos assiévait dans eune tchaise ordinnaithe et vouos dîsait d'ouvri la bouoche toute grande et d'lî montrer la dent tchi faîsait ma, et pis i' vouos d'mandait s'nou 'tait bein seux qué ch'tait chette-là viyant tch'il en viyait deux-s'trais tchi 'taient gâtées!
I' c'menchait par vouos dithe tch'i' s'n'allait pon vouos faithe grand ma, et pis i' vouos t'nait la tête d'eune main et auve l'aut' main i' vouos m'ttait eune pathe dé pînchettes tchi faîsait peux dans la bouoche et êprouvait à teurtre la dent pouor la dêcaûchi et l'êlouaîssi! Ch'tait eune tortuthe quâsi însupportabl'ye pouor lé pouôrre dgiâbl'ye dans la tchaîse, sustout si l'nèr dans la dent gâtée 'tait exposé, et y'en avait tchi n'pouvaient pon s'empêchi d'faithe des heurles! En fîn d'compte, lé docteu faîsait un coup d'âlfaure et halait sus la dent jusqu'à qu'ou vînsse!
Ieune dé mes tantes en eut ieune d'êrachie d'même. La dent li'avait fait ma si longtemps qu'ou' n'pouvait pus l'enduther. Ou' prînt san couothage à deux mains et marchit ès "Siex Boules" bein dêtèrminnée d'l'aver êrachie. Ou' s'en r'vînt siez lyi ès Landes t'nant sa mâchouaile atout san mouoché dans l'fond d'sa main tout l'long du c'mîn. Oulle êcopissait du sang et honnait et pliaingnait en marchant, tout en étant quand même contente qué la fichue dent 'tait horte et qu'ou' n'la r'veng'geait pus. Ch'tait atout un tchias dé p'tun qué s'n homme li'arrêtit l'sang quand ou' r'vînt à la maison. D'après l's anciens, eune ithangnie ou un tchias dé p'tun 'taient fanmeux pouor êtantchi l'sang, mais nou n'pouvait pon sans doute mett' des ithangnies dans la bouoche!
Si eune dent 'tait gâtée jusqu'au nivé d'la denchive, i' fallait qué l'docteu copîsse la denchive des deux bords lé long d'chein tchi restait d'la dent atout un p'tit couté, pouor pouver la gaffer atout ses pînchettes. S'ou' né v'nait pon la preunmié fais, lé docteu, lâssé d'haler d'ssus, arrêtait à r'prendre sén haleine, et pis fallait y r'quémenchi comme dé pus bé!
Dans des temps, étout, un docteu tchi n'y viyait pon trop cliai êrachait eune bouanne dent à la pliaiche dé la cheinne tch'était gâtée! Quand tchique avârie d'même s'arrivait, lé pouôrre souffrant n's'en appèrchévait pon pouor tchique temps, viyant tch'i' criyait qué ch'tait la denchive, gobillonnée ou dêchithée par lé dêcauchement d'la dent, tchi lî faîsait ma. Au but du temps, quand la denchive avait ieu l'temps d's'èrdgéthi et qu'lé ma n'avait pon dispathu, i' s'tâtait la mâchouaile et, r'gardant dans l'mitheux atout la bouoche grande ouvèrte, viyait la dent gâtée et à maîntchi néthe acouo en pliaiche. Il 'tait au m'thespé en s'èrviyant forchi d'aver à souffri des tortuthes eune deuxième fais pouor l'aver êrachie!
Est-che ravissant qué l's anciens aimaient quâsi mus souffri d'mal ès dents qué d'aller siez l'docteu pouor les faithe êrachi ?
G. F. Le Feuvre
1967
Viyiz étout: