Le Ménage ès Feuvres,
St. Ouën.
Lé 13 juin, 1970.
Moussieu l'Rédacteu,
Ch'est seux qu' un tas d'mes bouans anmins ichin en Jèrri sé d'mandent pourtchi qué j'n'ai pon 'té les vaie ouaithe qué y'a dêjà pus qu' tchînze jours dépis m'n arrivée. Eh bein, bouannes gens, j'attrapis eune fichue câsaque dé fraid au Cannada quand j'y étais y'a un mais, et j'n'en sis pon 'couo tchitte. J'n'ai fait qué d'créheûler d'pis, et j'n'ai pon voulu aller siex les gens dé peux d'lus donner chu fraid-là. J'vouos asseûthe qué v'la tchi m'a fichi bas, car j'n'ai pon - Dgieu mèrci - l'habitude d'attraper fraid ou d'êt' malade. J'pense bein qu'ch'est d'ma faute. J'm'en fus au Cannada auprès aver passé l'hiver dans les pays cauds. Il y faîsait eune fraid d'tchian, au Cannada, et j'n'eus pon l'avis d'prendre des précautions et m'abrier quand j'sortais. À c'menchi, j'avais la gorge râpée, et tchiques jours après v'la tchi touannit en un mauvais fraid sus l'estonma. Nou créthait qu' j'éthais ieu pus d'avis à m'n âge. Ch'est p't êt' sîngne qué j'vieillis!
V'la tchi m'fait penser ès r'mièdes du temps passé. Ch'est seux qué si Manman 'tait en vie ou m'éthait mins un empliâtre d'moutarde sus l'estonma, et m'éthait fait prendre un vèrre caud en m'couochant - ou eune bollée d'chaudé bein êpici. Ch'tait d'tchi bouan, fait atout du cidre caud, et du lait caud et d's oeufs battus auve lé cidre. Ch'n'est pon ravissant qué v'la tchi faîsait du bein!
Comme j'l'ai mentionné d'vant, il' avaient des r'mièdes pour touos les maux, les anciens. Y'avait, par exempl'ye, lé poussot. Il 'tait bouan pour plusieurs maux. Pour l'enflieunme à la gorge par du fraid, et pour les gormes - tch'affectent l'avalouaithe - ch'tait un poussot d'linnette, tch'i' fallait. Mais, pour un dé enflié, un frouët, ou pour faithe sorti un pitchet, il en fallait iun d'pain et d'molle graisse. I' faut quand mème dithe tch'i' y'avait eune mannièthe dé s'empêchi d'aver des frouëts. Ch'tait bein simpl'ye : I' n'y avait qu'à enfiler eune muscade et la porter l'tou d'san co!
Pour lé mal ès dents, ch'tait l'poussot d'bran. Et l's anciens bouoillaient eune touffe dé pèrsi pour poussoter sus l'enflieunme étout.
Dé l'ieau-d'vie, sus des néthes gradiles, ou sus des preunelles, 'tait lé r'miède pour coper l'ma dans l'corps. Et pour êtreindre l'corps, du pain rôti 'tait l'èrmiède èrquémandé. Eune tisaine dé fielles dé louothi 'tait bouanne pour bangner l's ièrs affectés par l'orian, et v'la tchi faisait du bein ès ièrs dé les bangner atout d'l'ieau d' Là Fontaine ès Yeux.
D'l'aigre d'cidre sus du gris papi 'tait lé r'miède pour eune êteurse. Pour des rhonmatisses, i' fallait s'frotter atout d'l'esprit d'vîn mais, acouo bein mus, i' n'y avait qu'à porter eune patate dans sa pouchette pour s'êmpéchi d'en aver, des rhonmatisses, et y'en a mème aujourd'aniet tchi mettent un brâcelet en tchuivre sus l'pouangnet pour la mème raison!
Du flipe, fait atout du cidre doux, d'l'ieau-d'vie d'cidre et du chucre, 'tait fanmeux comme fortificat pour vouos r'léver l'tchoeu. Nou pèrchait l's ouothelles et nou-s-y m'ttait des p'tites melles pour renforchi la veue ès cheins tchi l'avaient soupl'ye. J'connaissais deux hommes tch'en avaient des melles dans l's ouothelles, quand j'tais mousse. I' d'meuthaient dans la rue tchi mène dé Portinfer à l'églyise dé St. George - des gens du nom d'Lé Bro, et il' 'taient connus comme Les Bros fins gras! I' né m'ttaient pon d'leunettes, ch'est en tchi i' faut craithe tch'il avaient la veue renforchie par les melles!
Y'avait des crianches, étout, entouorre cèrtains malaises tchi n'taient pon des maladies. Par exempl'ye, quand l'nez vouos pitchait d'vant méjeu, ch'tait singne dé rabat d'vant solé couochant, mais y'en avait tchi criyaient qué ch'tait sîngne dé mort. Quand les gens avaient eune piqu'sie dans un pid, ch'tait pour un viage à l'êtrangi. Eune piqu'sie à la main drouaite voulait dithe qué nou s'en allait r'chéver des sou, mais ch'tait l'contraithe si ch'tait la main gauche. Dans chu cas-là, ch'tait qu' nou-s-allait en dêbourser!
Quand l's outhelles vouos cônaient et tch'i' vouos pitchaient, si ch'tait l'ouothelle drouaite, ch'tait pour bouanne chance, mais si ch'tait l'ouothelle gauche ch'tait pour cèrtains ch'tait l'contraithe : Quand ch'tait la gauche ch'tait bouan sîngne, et quand ch'tait la drouaite ch'tait des traitres. D'aut' disaient : L's ouothelles mé cônent - nou pâle dé mé! Et acouo d'aut' disaient qué si l'ouothelle drouaite vouos pitchait, ch'tait sîngne qué tchitch'un 'taient à dithe du bein d'vous, mais pour l'ouothelle gauche ch'tait sîngne tch'il' 'taient à vouos dêchither. Et dans chu cas-là, don, eune femme mordait la carre dé san d'vanté pour faithe ches'la lus mordre la langue!
I' faut dithe qué les maladies sont aussi r'miédgiabl'yes comme d'ancienneté, mais ch'est les docteurs tch'en profitent à ch't heu!
George d'La Forge
Viyiz étout: