Les Pages Jèrriaises

Au r'fliéchi...

Trenton, Michigan,
U.S.A.
Lé 8 dézembre, 1973.

Moussieu l'Rédacteu,

Ch'n'est pon seulement au Mouoyen Orient qu'nou ouait pâler d'troubl'ye et d'boulevèrsément ches jours. J'avons nouot' châre ichîn en Améthique ouaithe qué ch'est pus eune dgèrre d'înconvénience qué d'armes sus l'camp d'batâle. Parmi les pliaintuches, y'a les cheins tch'ont peux d'aver à s'soumett' au manque dé pétrole à gogo qué l's Arabes nouos împosent. Et pis les Rouoges Indgiens, au Cannada comme ichîn, c'menchent à d'mander le r'tou d'un tas dé drouaits tchi lus fûdrent, tchiquefais honteusement, êrachi par l'învâsion des bliancs.

I' m'sembl'ye tch'il' avaient eune civilîsâtion, les Rouoges, tchi nous f'thait la vie bein pus aîsie si j'l'avions adoptée. Quand l'pays fut dêcouvert il' 'taient à l'gouvèrner. I' n'y avait pon d'dette nationale, ni d'împots ni d'politiciens. I' n'fallait pon remplyi un tas d'formes et d'papièrs dévant pouver faithe autcheune chose, et les femmes faîsaient tout l'travas. Et nouos anchêtres criyaient tch'i' pouvaient amender ch't êtat-là?

Tchi belle vie qu'j'éthions au jour d'aniet si j'avions continnué l'système des Rouoges! L's hommes n'éthaient pon à négrer lus vie à gangni des sou pour payi eune multitude d'împots à un "Welfare State" pour subventionner les cheins tchi n'savent pon couoyer et mett' dé côté pour lus vieillèche. À la pliaiche, i' pouorraient aidgi ès femmes à faithe lé mênage. I' n'y éthait pon fort à faithe viyant qu'nou d'meuth'thait dans des "ouigue-ouammes" - des manniéthe dé tentes - et nou n'éthait pon à s'mett' fort d'habits sus l'co. Nou pouorrait aller à j'va ichîn et là à la pliaiche d'aver à payi eune pétite forteune pour acater des motos. Nou n'éthait pon à soudarder. Nou laîss'sait les tribus Rouoges s'entr'battre et nou restéthait auve la bouannefemme à feunmer la pipe dé paix dans l'ouigue-ouamme.

Touos les bisons, cruellement et bêtement tués par nouos pionnièrs pour faithe valer lus pieaux, éthaient continnué à vivre et multipliyer, et nou pouorrait laîssi les Rouoges en abattre tchitch'uns au bésoin pour nouos fourni d'viande. Nouos anchêtres 'taient si achocres tch'i' s'abûsaient à tuer bisons et Rouoges étout. À ch't heu, les Rouoges tch'ont survêtchu vivent à rein n'faithe dans des contrées rêsèrvées à part. Et i' l'méthitent bein! Quant à nous, i' faut travailli - pon tant pour sé-même - mais pour maint'nîn eune bureaucratie d'Êtat tchi grandit touos les jours.

Si nouos anchêtres s'étaient accouôteunmés à vivre auve les Rouoges, et comme ieux, i' n'y éthait pon d'gens tch'éthaient fait assez d'hèrpîns pour acater d's escliaves et touos l's Afritchains es'saient en Afrique, bein heutheurs d'êt' siez ieux, et j'n'éthions pon d'problèmes dé race.

Nouot' gouvèrnément nouos dit qué j'n'avons janmais ieu la vie si belle, mais les grosses têtes des sŷndicats d'ouvrièrs nouos dîsent tch'il' ont pus d'drouait qu'nous ès hèrpîns qu' nouot' îndustrie a fait pôssibl'ye d'produithe. Et viyant qué l'gouvèrnément Angliais laîsse lé monde aller à l'hôpita pour rein, et lus donnent des boulets, des leunettes et des fausses dents pour presque rein, nouos politiciens, gourmands pour lé vote du peupl'ye tchi n'sait pon mus, nouos dîsent qué j'dév'thions aver les mêmes privilèges. Eh bein, bouannes gens, à mains qu'ou-s-ayiz la tête viède, ou d'vez saver tch'i' n'y a rein pour rein. Si j'avions continnué l'système des Rouoges, lé "Medicine Man" éthait souangni les malades sans lus env'yer un compte pour vîsite et méd'cinne. I' n'y éthait ieu qu'à lî faithe présent d'eune démié-douzaine dé cocannettes!

J'avons un tas d'malfaiteurs dans l'pays, et nouos mousses sont d'pus en pus dueurs à mènagi. I' veulent garder lus j'veux longs dépis qu'eune démié-douzaine d'êmanues Angliaîches nommées "Beetles", tch'avaient grand bésoin d'aver les leurs copés, vîndrent ichîn chantonner un tas d'bargouaîchîn tchi catouoillit l'tchoeu à nouos jannes hardelles tchi n'savaient pon mus. Pon contents d'ch'là, i' veulent craître des barbes étout, et les marmoûsets les r'gardent atout un întéthêt tout tchuthieux et spécial quand i' vîsitent lé Zoo.

Nouos Juges nouos disent qué l'crînme né paie pon, mais i' n'y a pon un aut' pays au monde où'est qué l'crînminnel a atchumulé autant d'sou comme ichîn. I' m'veint à l'idée qu'la seule manniéthe dé s'asseûther qué l'crînme ne paiethait pon es'sait d'en donner la mènag'gie ès bureaucrates du gouvèrnément!

Jé n'prétends pon d'pouver r'miédgi tout chu tripot-là, mais jé n'peux sénon penser à la vie paîsibl'ye tchi s'sait la nouiôtre si j'avions laîssi les Rouoges nouos adopter et qu'j'éthions, à nouot' tou, adopté lus manniéthe dé vivre, à la pliaiche dé nouos gêner si l's Arabes s'en vont nouos laîssi acater assez d'huile pour nous caûffer ch't hivé. J'n'éthions qu'à dithe à nouot' bouannefemme dé prendre san pangni et aller qu'si assez d'boûses dé bison pour garder l'feu en allant dans l'mitan du ouigue-ouamme. Et j'pouorrions nouos pâsser l'temps en feunmant la pipe dé paix auve lé d'scendant dé "Yellow Knife", abattu par "Buffalo Bill" L'Escaudé à la Batâle dé "Indian Creek"!

George d'La Forge

 

Viyiz étout:

 

Les Pages Jèrriaises