Ouaithe qué j'nos comptons gentiment êcliaithis en l'année d'grâce mil neuf chents chînquante quatre, i' s'trouve acouo des gens parmi nous tchi prétendent aver l'pouver d'cachi des véthues. Et chose pus r'mèrquabl'ye, pe't-être, est tch'i' n'manque pon d'visites siez chès bouonnes gens!
Y'a bein des manniéthes â cachi des véthues, bein seux, tout comme à j'ter un sort et à d's'enchorchéler! Mais la manniéthe la pus usuelle tchi nouos reste à ch't heu ch'est la dêcompt'tie, Un bouonhomme qué nou connait s'y prend comme chennechîn, pour des véthues, d's êteurses, des teunmeurs, lé feu sauvage et aut' maladies:
Où' est lé 'ma' s'trouve, lé dêcompteux fait l'sîngne dé la crouaix et pis c'menche à compter à l'arbours du neunmétho neuf jusqu'à rein; lé deuxième jour i' c'menche du neunmétho huit, le traisième jour dé sept, et ainchîn d'siette. Chu r'miède est înmantchabl'ye!
D'autres méthodes empliyées par des cacheurs dé véthues étaient:
Lé dêcompteux vouos disait 'Assiév'ous', et vos touonnant l'dos, barbélotait tchiquechose solonnellement. Et pis sans s'èrtouonner i' vos ordonnait dé sorti d'la maison sans mot dithe, vouos asseûthant tch'i' n'dévait dgéthe vouos vaie ou bein la dêcompt'tie n'sèrvithait d'rein.
Ou vouos' n'alliez, don, et tchiques jours auprès la véthue (les véthues) dispathaissait.
Eune aut' manniéthe étout était d'aver à voler eune bédache dé viande crute pouor la frotter sus la véthue et auprès la fliantchi par sus vouot' êpaule gauche. La véthue s'n allait.
Acouo eune aut' manniéthe pouor cachi des véthues était d'les compter matîn et sé, en faithe note et l's entourer châtcheune d'eune rondasse d'encre.
L'essentiel dans chennechîn, bouonnes gens, comme dans tant d'aut' choses dans la vie, ch'est d'aver la fouai, n'est-che pon?
Par FLM
Viyiz étout: