Les Pages Jèrriaises

Caouain et les prisonnièrs Allemands

Dimanche passé je resti au lièt pus tard que d'habitude, car j'avis ieu une rude nièt et n'avais pas dormi un d'gout. Ou viyiz je fus obligi d'être sus pid toute la nièt à faithe des poussots pour Marie Hibou qui dépis tchique temps a dêveloppé deustrais gros frouets.

Je me l'vi justement en temps pour dîner et je m'décidi, dès que j'eus dîné, d'aller faithe une petite promenade dans la ville. Tchi crowd de monde qu'i y-avait par les qu'mins! Jamais j'n'avais veu ditèt au Dimanche, et i' s'en allaient tous dans la même direction, tous du côté du Ouest. Je me d'mandi: Tch'est qui peut y-aver en allant don? Nou dithait que ch'tait l'jour d'la grand' r'veue ou bain les courses de St. Ouen.

Quand vint un temps, j'avisi un homme que j'connaissais, dans la procession, et je m'appréchi d'li et lis d'mandi: Où-est qu'ou vos z-n'allez tous don d'chu pas-là?

- J'nos z-n'allons ès Bianches Banques vaie les Germans; t'y-en vains-tu?

Je lis raîponni que je voudrais bein y-aller, mais que je n'pouvais pas pour le moment m'êloigni de d'siez-nous, car Marie Hibou n'tait pas trop bein.

Mais j'avais ouï tant pâler des prisonniers allemands, que j'étais bein tchuthieux ettou, de vaie tchi sorte d'monde que ch'tait, alors je m'décidi de voltigi jusque-là tchique nièt quand tout es'sait bein trantchille et qu'i n'y-aithait pas tant d'monde par les qu'mins. À mié la s'maine, Marie Hibou quémenchit à se r'faithe un mio et not'e vétérinaithe dit qu'il 'tait temps de tchitter les poussots. Chenna me donnit un mio pus de liberté de sorti au sé, ch'est pourtchi une belle séthée que l'temps 'tai cliai et qu'i' n'y-avait pas d'biâse, je starreti d'la ville pour m'en aller jusque là-bas. Opprès aver passé St. Aubin, je m'dirigi sus l'Pont Martchet et dès que j'avisi les bouais opprès de la ferme du Général Don, je savais bein que je n'tais pas bein liain d'ma destination. Je fus bein ravi quand je franchi l'haut des monts de vaie la scène qui sa'dêrouolit en d'sous d'mé. Ch'étaint justement comme une ville, et l'effet d'la lune sus tout chu corrugated était bein tchuthieux.

I' s'agissait de prendre des précautions, car je v'nais justement d'liéthe dans les gâzettes qu'i n'fallait pas appréchi pus près qu'à chent verges du camps, ou bein en subi les conséquences.

En pensant à chenna le tchoeu quémenchit à m'palpiter et je fus à même de r'vither. Ou viyiz, je sis bein connu de touos nos miliciens jêrriais, et avec ieux i' n'y-aithait pas ieu d'dangi, mais les soudards qui sont à faithe la garde là-bas sont des viers rêservistes qui sont touos frais arrivés d'Angliéterre et ne r'connaîtraient pas l'Caouain d'la Chronique d'avec le coucou, ch'est pourtchi je parcouothi l'camp aussi trantchillement qu'possiblye.

Mais je n'vis pas un seul Allemand, i' fallait qu'i' fussent tous couochis, car je ouiyais une ronfliéthie dans toutes les huttes, ch'tait comme autant d'quétots.

Opprès aver fait l'tou de l'êtablissement, je m'en r'vins en ville, mais j'ai l'intention d'y r'faithe une autre visite pus tard, mais de jour dja chute feis, et pour n'être pas prins pour un étrangi j'ai idée de me dêguiser comme un corbin, une variété d'ouaisé qui n'manque pas par là-bas.

* * *


Nos mêssieux dans la Chambre des Débats vainnent d'être bein embarrassés tout chu temps à êprouvé à améliorer la Louai sus les Qu'mîns. Les siens qu'ont ieu l'temps de donner un mio d'attention à la dischussion ont peu apprendre bein des choses qu'i' n'savaient pas, mais qui sont diversement intérêssantes.

Citons comme exemplye le cas de iun d'nos Juges, qui (si les gâzettes ont rapporté correctement) longtemps d'vant qu'les jeunes Dêputés d'acheteu fussent nés, cachait tchiquefais des ch'vaux le long des routes et que même dans chu temps-làm y-avait une grande diffichulté à faithe les vainnes lus dêcarrer quand nou voulait passer, mais qu'ou lieu d'chenna, quand nou faisait des hallôs, i' s'touannaient d'bord et s'mettaient à rithe.

Ah ca, garçons, v'là une chose qui d'vait être bein intérêssante à vaie, et i' faut que j'admette que malgré que j'en ai veu d'bein des sortes dans lan temps, jamais je n'ai ieu le privilège de vaie une vainne rithe.

Ch'est là un spectaclye qui n'm'a jamais 'tai accordé.

Un autre item qui dév'thait intérêssi nos fermiers ch'est que la dischussion a mins à jours le fait qu'à St. Vauseur la quantité de bestchâs et d'bercail est bein pus grande que nou n'pensait.

Alors i' n'faudra pas s'êtonner pus tard quand l'Inspecteur es'sa à tchestionner nos garçons dans l's êcoles, sus la géographie de notre île, de ouï tchquechose comme chennechin:

- Pour tch'est que la pârraise de St. Vauseur est r'nommée?

- Pour san biau Parichâle.

- Et tchi d'autre?

- Pour le grand nombre de biches qu'i y-a dans l'canton.

- Tch'est qu'ou connaissis de la ville de St. Bélier?

- Oulle est remplyie d'mousses qui couothent les rues au sé.

- Ches mousses-là sont-i' dignes de confiance ou autrement?

- Autrement.

- Explitch-ous.

- I' prennent le qu'min qui mène au mensonge.

- Tchi qu'min qu'est ch'la?

- I' vendent des gâzettes.

Caouain
La Chronique de Jersey 27/3/1915
 

Viyiz étout:

 

Les Pages Jèrriaises