Les Pages Jèrriaises

Le grand sabre au kaiser

Le vier caouain, le sien qui vint dans chu monde de minzèthe pour baillyi d'sa bec à tort et à travers, qui pitchait l'amour-propre de tchiqu'uns et qui souol'vait la colèthe des court de pé, chu vier caouain s'en va et bein seux s'i peut picoter tchique saoucisses allemandes, i' f'tha un fricot comme i' n'en a jamais d'sa vie ieu. Si seulement il avait la forche de prendre le grand sabre au kaiser et de l'obligi à l'envier au musée de la Société Jersiaise, j'vos asseuthe que v'là qui s'sait fait dans un clin dyi.

Chu boustre de caouain, qu'était une bein vilaine bête pour tchiqu'uns, chu caouain-là enviait ses êcrits au haut du Vier Marchi pour faithe rithe et amuser touos les siens qui lièsent san gniollin, mais tchiquefeis i' rapp'lait de chu vier dicton français:

"Loué par ceux-ci, blâmé par ceux-là, me moquant des sots, bravant les méchants, je me presse de rire de tout... de peur d'être obligé d'en pleurer."

S'en va-t-i' être tithé chutte feis? Pas par des Jêrriais, bein seux, mais si nou l'i baille une chance de happer l'empereur d'Allemagne, i' n'y-a pas d'doute qu'il en rapportetha tchique brédelle comme souvenir pour Jêrri, pour le p'tit pays iou qui laisse Marie Hibou et sa couée et iou que l'vier caouain es'sa rempliaichi par l'aînè de ses p'tits, car le bouanhomme hors, iun d'ses mousses se chèrgétha de raconter tout l'gniollin qui fait rithe et que tchiqu'uns n'voudraient pas veis sus la gâzette.

Eh bein, garçons, ch'est à bétôt... à meins que j'ne s'sais tithé!

* * *


Tch'est que l'Caouain nos dit chute semaine?

V'là la tchestion que tout l'monde se d'mande en ouvrant la Chronique tuuos les Samedis.

Et combein qui y-en a parmi vous qui se sont jamais fidjuthés tch'est qu'chenna veur dithe d'aver à remplyi chut colonne ichin toutes les s'maines avec des nouvelles pus ou meins intérêssantes?

Vaithe, je vos asseuthe que ch'n'est pas du gniollin d'aver à l'faithe.

Souos les circonstances ordinaithes ch'n'est pas oquo trop difficile, car ch'est un pliaisi pour mé de voltigi de pâraisse en pâraisse pour vaie auchune chose qu'i peut y-aver en allant, ou bein de m'mettre ès êcoutes selon ma mauvaise habitudes pour entendre les conversations de gens qui palent trop.

Mais dame! au temps qui va, nennin par exemplye!

Tout l'monde est armé, sapresti!

Jusqu'àcheteu j'ai tréjous fait un mio d'man vaillant en disant que je m'fichais d'touos vous avec vos armes mais chute feis je sis obligi de rentrer mes cônes un mio, et aussi bein vos l'admettre, je sis êpouvanté. Je n'ose presque pas dêhaller d'ma mansarde sans aver tchiques-uns à m'garder compagnie, ch'n'est qu'soudards partout et tous armés jusqu'ès dents.

Man systême est entchièthement êbranlé et je n'peux pas supporter le moindre brit. Si une porte a l'malheur de slammer je n'ai qu'd'en mouothi d'peux et ch'est là iune des raisons pourtchi qu'ou n'ouïyiz pas l'coup d'canon à méjeu et à neuf heuthes et d'mie, nos gens ayant supplié les autorités d'aver un mio d'êgard pour man êtat d'santé et de ne le tither pas pour tchique temps pour êviter des conséquences fatales.

Alors, garçons, souos les circonstances, je reste autant que pôssible à la maison, conséquamment che que j'm'en vais vos raconter annièt n'est que des ouï-dithes, des histouaithes, enfin, que les uns et l's autres ont raconté dans notre office, la véracité de tchi je n'peux pas garanti.

* * *


Iun d'nos miliciens l'aut'e jour entri en passant, et naturellement la conversation touânni sus la djerre et sus la mobilisation de la milice. Je le félicitîmes de tchi que j'avions lus dans les gâzettes que touos l's hommes avaient raîndu joyeusement à l'appel, qu'i' n'y-avait pas d'mantchants, et que, malgré qu'il's eussent à enduther bein des p'tits inconvénients les miliciens ne se plaignaient pas, mais faisaient lus d'vé comme des hommes.

Là-d'sus, i' s'mint à rithe et i' dit:

- Criyous tout chein qu'ou viyiz sus les gâzettes, vous?

Et je lis dîmes: Oui, pus ou meins, tréjous.

- Pas mé, don, et quant à dithe qu'i n'y a pas ieu d'grouneurs, je m'en vais vos en citer un cas, mé.

Connaissous le p'tit Johnnie, qu'est sergent dans l'régiment du Ouest?

- Nennin, mais absolument tu ne t'en vas pas nos dithe que si i'y a ieu une exception à la belle conduite des miliciens, que ch'tte exception là était un sergent, tréjous, car selon nous, ch'est ieux qui dev'thaient montrer un exemplye ès autres.

- Mais sans doute, mais enfin ch'a 'tai d'même pourtant.

Et i' s'mint à nos raconter l'histouaithe.

I' pathaît que le p'tit Johnnie, haut coumme un pôt d'cidre, et tout fin râsé se rendit à l'Arsenal avec sa compagnie, mais qu'il avait un tas d'choses à dithe quant à l'utilité de la mobilisation de la milice. I' savait li, t'chest qu'le gouvernement dévthait fait, et pâlait avec un tel aplomb et une connaissance de cause, qu'il exciti tout-a-fait l'admithation d'une partie d'ses soudards, et i' se d'mandaient si che n'éthait pas 'tai bain mus que l'gouvernement l'éthait nommé Sécrétaithe de la Djerre à la plaiaiche de Kitchener.

Bon! tchique temps opprès Johnnie quémenchit à aver faim, les râtions n'avaient pas oquo 'tai servies ès hommes à cause de tout l'tripot de la mobilisation, il 'tait accouôtumé li, à aver r'pas à d's heuthes rédguliéthes, et l'creux qui s'fairait dans s'n'estoma patriotique le mint tout-à-fait d'mauvaise humeur.

Mais quand i' ouï qu'il avait 'tai nommé parmi d'autres pour faithe la garde i' qu'menchi à faithe un tintamarre abôminablye, et dit qu'i n'le f'thait pas pour personne!

- Les officiers criyaient-i' qu'i' s'en allaient le garder là tout l'jour? Un homme comme li? Oubliaient-i' qu'il avait djais mille toumates siez-li qu'étaient en perdition? Allons ichin êttout!!

Et il êpaulit s'n arme et êprouvit à fichi san camp siez-li.

Les officiers ne voulirent pas l'puni comme i' méthitait et ils êprouvithent à l'induithe à rester à san poste, mais ils eurent les mille embarras à l'convaincre qu'il 'tait à faithe une grande bêtise et couothait l'dangi d'être sévéthement puni.

V'là l'histouaithe comme ou nos a tai racontée.

* * *


Ah ça, gârçons j'ai une assez triste nouvelle à vos apprendre.

Le Chef sorti l'île hier matin pour s'en aller à la djerre!

Je n'veurs pas qu'ou pensiez que j'sis un hypocrite, et que j'sis à faithe la mîne de m'lamenter à cause qu'il est hors, car je vos asseuthe que la peine que j'en êprouve au moment actuel est bain réele.

Je sais bain que j'n'avons pas 'tai tréjous d'accord, et que dans chute colonne ichin je l'ai souvent crititchie et je vos ai fait part des disputes que j'avons ieu ensemblye, mais dans la situation grave dans tchu que j'nos trouvons, étant en djerre contre un ennemin commun, touos les p'tits difféthents personnels dévent être laissis d'côté.

Le Chef sait tch'est qu'sont mes sentiments envers li et i' sait ettou que de toutes les mains qu'ont serré la sienne au moment d'au départ, i' n'y en avait pas iunne de pus sincèthe que la patte du pouore caouain. Le moment de sépathation dait être bain cruel, pour li aussi bain que pour sa famile, et j'espèthe qu'i me s'sa permins d'offri ma pus profonde sympathie à Madame sa mèthe, à sa charmante p'tite femme et à san chier p'tit gârçon, et de les prier de prendre couothage.

La s'pathation ne s'sa pas longue et dans bain p'tit d'temps je verrons not'e Chef ervénin, couvert d'honneur et glouaithe et dans l'heutheuse et ordgilleuse position d'un homme qu'a fait san d'vé.

Caouain
Chronique de Jersey 8/8/1914
 

Viyiz étout:

 

Les Pages Jèrriaises