Les Pages Jèrriaises

Nouvelles de la djerre

Toutes les gâzettes tout chu temps sont si remplyies de nouvelles de la djerre, que je m'étais imaginé que mes lecteurs es'saient bein contents d'aver un p'tit mio d'change, et j'avais résolu de laissi la djerre de côté et d'êcrithe sus tchique aut'e sujet.

Mais ou m'exchus'sez, garçons, je trouve que ch'est impossiblye.

La djerre domine tout pour le moment, les gens ne pâlent pas d'aut'e chose, et tout chein qui s'passe en est pus ou meins affecté. Ergardez même men illustre collégue "Querist," malgré que s'n imagination est presqu'aussi fertile comme la meinne, i' n'peut pas pâler d'aut'e chose nittou, li.

Dans s'n articlye de Mêcrédi passé, ou z-éthez r'mertchi qu'i' s'décidi tout court de pitchi la djerre de côté et d'pâler sus tchiquechose de meins ludgubre pour fini de remplyi sa colonne, mais tch'est qu'en fut l'rêsultat? I' sauti de dans la castrole dans l'feu et s'mins à raconter des 'Fishing Yarns,' malgré qu'i' dait bein saver, à l'âge qu'il a, que des histouaithes de pêque ne sont jamais ergardées comme étant dignes de fouai.

Et entre nous, je n'crai pas qu'i y-ait grand véthité dans chein qu'i' nouos conti Mêcredi au sé, mais enfin ch'est li qui sait.

* * *


Eh bein, pour ervenin à nos moutons, sav'ous bein que dans la campagne les choses quémenchent à r'venin un mio à lus nivet.

Une grande partie des réservistes français que s'en 'taient allés erjoindre lus régiment sont ervenus en Jêrri.

Les autorités militaithes, à ch'qui pathaît, lus ayant dit que pour acheteu ils ont trop d'monde, mais qu'ils enviêthont pour ieux pus tard s'il en ont besoin.

Les patrons à ches hommes-là sont bein contents de les r'vaie sus lus travas; nou z-avait quasi pensé quand nou les vit tous lus en aller que l'travas s'en aller rester à faithe, mais ch'est êtonnant comment que les affaithes ont marchi tout-d'même.

Il est vrai que la sercliéthie des rachines à 'tai un mio négligie, mais les machines à battre n'ont pas arrété, iéux, tout l'monde s'est donné un coup d'main et v'là qu'a marche à merveille.

Sav'ous bein que l'aut'e jour, je m'trouvais dans la campagne quand i' faisait une telle abominablye chaleur, et quand j'ouï le ronnement d'une machine à battre, je dis à mé-même:

"Caouain, si tu voltigeais jusque là, i' y-aithait peut-être bein moyen d'aver une feis à baithe!"

Eh bein, je trouvi la machine souos un grand shed en corrugated et je m'en fut me jutchi sus iun des girders.

Tch'est qu'ou criyiz que j'vi d'là-haut? Iun des pus biaux spectaclyes de ma vie! Deux des filles du boss, belles comme des roses, étaient à rempliaichi l's hommes à la machine.

I' y-en avait iune sus l'haut à passer les djerbes ou à copper les lians, et l'autre était à bas à haller les craînchons.

Le tchoeu du pouore Caouain a tréjous 'tai bein susceptible ès charmes de jolies jeunes demouaîselles, mais je vos asseûthe que quand je vis cheuses-chin à donner d'même un coup-d'main ouais qu'i' fallait, je dis à mé-même: V'là des filles qui valent lus paîds en or.

Mais i' faut dithe ettou que i' y-en a d'autres.

J'en ai veu, mé, des p'tites hardelles que nou viyait souvent à lus promener à travers de la ville, habillyies à la derné mode, open-work silk stockings et je n'sai tchi, avec lus music-roll à la main, mais qu'nou vait pus souvent acheteu dans les clios avec une scabelle et une canne à lait, ou bein à houetter des navets à côté d'pepée. Le Bouanhomme a dit qu'i' s'sa temps assez de jouer d'la musique quand la djerre es'sa finie, mais que dans l'entretemps, comme i' n'peut pas s'graie tout seu i' faut qu'les hardelles bâillent un coup d'main sus la ferme. Et les chiéthes petites lus sont minses à lus d'vé, sans gronner trop, ma fé!

* * *


Mais comment que tout est trantchil au prix des autres années!

Pas d'Bataille de Flieurs, pas d'visiteurs, pas d'show à Springfield, pas d'bézars à Niermont, pas show d'St. Cliément au Mannyi de Samarés. Comment qu'nou manquetha les p'tites promenades attouo d'l'êcliuse à la veue pus ou meins incertaine des lanternes chinouaises et ches moments de doux repos iou qula bouaisesie est la pus êpaisse!

Pas d'swimming matches au Bathing Pool, et justement à l'occasion que l'grand "Diving Competition" était pour être contesté pour la prumié feis en Jêrri.

Pas d'Eisteddfod, qu'était pour être si intérêssant ch't anneaie, sustout pour les siens qu'aimaient le jêrriais, car j'ai ouï, sus la pus haute autorité, que le Comité qui s'occhupait de chute section-là, s'était surpassé dans ses efforts pour mettre devant l'public tout che qu'i' y-avait de pus amusant.

Tout, enfin, a 'tai r'mins à cause de la djerre, et che n'est qu'juste oquo, quand nou veint à y penser.

Ch'n'est pas ichin un temps pour le divertissement et frivolité.

Tandis qu'une partie de nos habitants sont souos l's armes pour la protection de la patrie, i' faut que les siens qui restent s'appliquent sérieusement à lus d'vé pour alligi autant que possiblye la terriblye dêtresse qui s'en va p'ser de pus en pus sus nous.

Espéthons que la situation actuelle es'sa de courte duthée.


Caouain
La Chronique de Jersey 29/8/1914

 

Viyiz étout:

 

Les Pages Jèrriaises