La djerre était dêcliathée
Hi! garçons, tch'est qu'ou z-êtes à faithe, don? Touos les jours, i' m'arrive des pliaintes entouor vous. Ch'est assez drôle, mais achteu, quand i' y-a tchiquechose qui n'va pas bein, les gens m'êcrivent ou bein i' veinnent me trouver, me suppliant de publier lus difféthents griefs dans chés colonnes ichin.
Le public c'menche à aver une diverse confiance en mé et je vos asseuthe que j'en sis ordgilleux. Des vieilles gens, viers garçons, vieilles filles, gens mathiés, jeunes garçons, et même les jeunes filles veinnent me consulté quand i' sont dans le moindre embarras et i' s'fient tous sus mé pour lus donner d'bouans avis ou d'les tither d'lus diffitchulté.
Eh bein, pour en arriver à la cause en main, i' pathaît que tout chu temps ichin i' y-a des Visites du Branquage dans les difféthentes pârraisses de l'île et qu'ou z-êtes tous bein embarrassés à êmonder vos bancs d'êpines et vos fôssés.
Nou m'dit qu'ou faites chenna, pas tant dans l'intéthêt public, mais qu'ch'est pus pour êviter les amendes que la louai impose sus les siens qui négligent de tailli lus fôssis, etc. Que votre motif es'sait chein qu'i voudra, ch'la ne me r'garde pas, mais je sis informé que, sans compter tchiques exceptions, ou z-en faites un vraie couochon'nie.
Pourtchi djantre qu'ou n'ramassez pas vos pitchets d'êpines et d'ronches bein proprement avec une bringe?
Nou m'dit qu'les routes en sont faites et qu'ch'est impossiblye de s'promener en bike acheteu sans attraper une douzaine de punctures sus un mille de qu'min.
Le rêsultat en est qu'i' faut aller à la boutique les faithe ergrais ou bein les racc'moder sé-même le long d'la route, chein qui cause bein de l'inconvénient et d'la mauvaise humeur.
La jeune fille arrive tard à l'êcole, l'homme qu'a tout pliain d'affaithes à souogni manque à ses appointements, et ch'est enfin un dêrangement général.
Ah ça, garçons, i' faut qu'chenna finisse. Faites-nous don vaie un p'tit d'bouanne volonté et ramassez une bringe pour quièrgi ches pitchets-là.
* * *
Tchiqu'uns savent-i' pourtchi que Pouoreté a tchitté à faithe la collecte à la chapelle?
I' pathaît qu'i s'est boudé par sus tchique affaithe, car i' y-a tchique temps, quand le Révd. Pasteur Granit-Couognèt êtait à prêchi, quand vint l'temps d'la collecte, i' s'aperchu que personne ne bouogeait pour ramasser les sous par les bancs et il en fit la r'merque.
Pouoreté, li, qu'avait l'habitude de faithe chu p'tit service-là, restit mâté dans san banc, aussi immobile comme la femme de Lote, et Granit-Couognèt fut obligi de d'mander à un jeune homme qu'était là de vouler bein entreprendre la fonction.
Bein seux qu'i ne f'tha pas grand' vouaix pour Chantnyi s'i' prend une attitude comme chette-là.
* * *
Hi! garçons, tch'est qu'tout chennechin veur dithe, don?
Est-che qu'ou z-allez vos battre?
Ch'est-i' mé qu'eut peux Mêcredi au sé!
J'étais dans la campagne jutchi sus un binot d'avaine à ênatchi un mulot que je v'nais justement d'attraper, quand j'entendi des pas dans la route.
Je voltigi jusque dans la braique du clios pour vaie tch'est qui passait et j'vis que ch'tait un sergent qui pathaissait diversent prêssi. Je dis à mê-même: Caouain, i' y-a tchiquechose en allant; sièt-lé.
Quand il arrivi dans l'village, i' s'mint à tapper ès portes des maisons et pis i' criyait: Are you there, Jim? ou bein Wake up, Tom! Et pis, je l'ouï lus dithe: To-morrow at two o'clock with all your kit.
En me mettant ès êcoutes, j'apprin enfin que la djerre était dêcliathée de tchique quarre à l'êtrangi et qu'la Milice s'en allait être mobilisée pour protégi Jèrri contre l'ennemin.
Tout l'monde était diversément excité.
A bein des maisons les femmes vinrent sus lus nerfs et supplyirent lus hommes de n'aller pas s'exposer au dangi.
Enfin, Jeudi matin, toute l'île était animée, et dans l'arlévaie che n'tait qu'soudards partout.
Jamais je n'aithais creu que Jêrri possédait une telle forche militaithe et j'ai ouï qu'un espion qu'était v'nu d'Autriche pour vaie tch'est que j'nos allions faithe, fut si ravi d'vaie nos garçons avec lus gros canons, qu'i' s'en r'fut bein dans san pays pour lus dithe que sus toutes choses qu'i' n'fallait pas penser à s'en v'nin prendre Jêrri, car che s'sait justement sacrifier lus armée par pliaisi.
Je sis oquo trop bouleversé pour vos en compter bein long sus chein qui s'est arrivé jusqu'à chu moment ichin, mais je n'crai pas qu'i' y-ait auchune raison de s'alarmer trop, car il est probablye que la prompte action de nos autorités militaithes en mettant d'même la milice sus pid, s'en va êviter une djerre européenne.
D'ichin Samedi tchi veint, nou verra tch'est qui s'arrivetha et p't-être que j'éthai tchiquechose à dithe sus la situation.
* * *
Raîponses ès Correspondants.
St. Ouennais. - Man garçon, i' faut aver un p'tit pus d'respect pour chu boustre de Caouain. tchi gniollin que de me d'mander si un avé peut v'nin dans chu monde de minzèthes avec des bottes et d'la barbe.
Candidat. - Vèthe, l'aute sé, j'ouï Watty qui s'faisait à un grand d'la pâraisse de St. Ou: V'nez baithe une feis ov' mé, et qui lis dit opprès: Ou' savez bein qui m'ont d'mandé de prendre pour Chentnyi et que je n'-peux pas erfuser. D'ichin là, Watty à l'temps de changi d'vis.
Caouain
La Chronique de Jersey 1/8/1914
Viyiz étout: