Les Pages Jèrriaises

Both Ladies Offer their Services




Nos v'lo dans l'margalo, chutte fais, a ch'qu'i sembliéthait. Ch'est tout l'monde sus l'pont, et pas d'boustre d'niollin! Y'a pus d'travas qu'i' n'en faut pour tous.

Ch'est pas qui y'ait crainte de djerre pour nous, ditesqué j'vos l'dit, l's Almands n'sont pas sans savé que j'avons mobilisé la Milice; nou n'est pas sans avé dit qu'y'a des soudards tout l'tou d'la côte et qu'j'avons pus d'siex connons sus l'fort et d'la poudre muchie pour en cas d'besoin. Pour cheunna, et d'autres raisons bin pus sethieuses, j'sis d'avis que j'ne verrons pas d'jerre ichin. Tout d'même, n'y'a rin ditét coumme de s'prépathé. Ch'est-tan-tchi la milice est souos l's'armes; y'a des bouochiers qui s'en vont lus fourni a mangi; y'etha eunne djingue de docteurs pour rappiéchi les bliéssées; et i' faudra un fliotchet de nosses (nurses) pour lus mettre des poussots et lus faithe du grué.

J'en soummes! Les Pains sont counnus d'ancienté pour lus couotage (coumme je l'disais; n'étha pas djerre) et j'soummes de la race qui ne r'tchule jommais tant que l'danji n'est pas dans l's envithons.

J'ai mins man nom bas pour êrtre prêt a aidji d'man vier mêtchi. J'siéthai les connons par en driéthe pour érmettre eunne heuche ou limé eune atélle ou méttr' eune fausse mélle a un trait. Mes deux femmes sont listées pour souognyi les bliéssés et aidji a la couq'thie. Laizé et Lonore fûtes ensemblye siès l'Gouverneux pour dithe qu'nou pouait conté sus yeux. Seulment, coumme Lonore est oquo jeunne et pus ou mains 'shy,' il a 'tait mint dans les conditions qu'ou n's'otchupthait qu'des siens pas séthieusement bliéssés. Laizé est d'sang rassis, méthe de famille, rin n'lis fait peux.

Et pis, n'en v'la assez pour anniét. La gazette a besoin de tout sen run, ou comprennez, pour des nouvelles de la djerre. Jommais nou n'avait veu ditét; et “y'a bin des temps dans la vie,” coumme dit man couosin quand sa p'tite servante a roublié d'mettre la glée sus la tablye.

Mais j'vos le r'dit, n'vos èsnérvez pon; je n'verrons pon les Almands ichin.

 

Piteur Pain
Morning News 12/8/1914

 

Viyiz étout:

 

Les Pages Jèrriaises