Les Pages Jèrriaises

Tchique petits incidents

Quand n'ou quemenchi l'annais, et qu'n'ou tait a s'r'jouit
N'ou n'pensant pas au fardé que d'vait nos écrasé le pid
Les patates avais fait bein et produidrent gentiment bein
Et y s'embiait que tout allait drait, et n'ou n'craignait rein.

Et quand n'ou fut finie, et bein finie les patates,
N'ou s'mins bein vite a pianté et bâtonné les Tomates,
Mais n'ou l'y avait a peine piantais et amathais
Que ne v'la ty pas la d'jerre qu'est décliathais.

Toutes les fêtes, Thés, Bazares, et Bataille de Fieurs,
Fudre tout d'eune coup abandonnais et changie d'couleur,
Et notre magnifique grand et utile, Paviyion,
A t'y changi d'tontuthe! de vrai n'ou n'l'reconnais pon.

Et notre magnifique grand et spacieuse Hôtel,
L'admiration de touos les grand; ou tet sis belle
Ches des soudars étrangiers qui d'meuthe de dans
Mais y faout espéthé que chenest pas pour longtemps.

Et pis ches tout mes bouanne gens qui a rancheri
Ches avec les milles peine que n'ou peut ernoué le fi.
Et pourtant y nos faout donné par ichin et par là,
Des Habits, du mangi et des sous quand yian a.

N'ou zest bein qui yiait tout pllien d'legumes et d'fruit
Et pis il est si sain et il est a bein bouan marchi,
Je connais eune Monsieu de la Crouais Catelain
Qui ne vend pas ses Tomates, i' les donne pour rein.

Yiavait eune Fermi qu'en avait eune Hernachie
Y voulait les vendre n'importe a tchi prix.
Même pour eune fais a bethe il zethait donnais,
Mais la fais a bethe l'y fut bein vite erfusais.

Yiavait eun aoutre fermi qui s'mi des Cocombres,
Y l'vidre toute il'en avait eun grand nombre,
Mais y n'voulait pas sus toute choses les mangi
Car comme y disait je les ait pliantais pour men piaizi.

Y les gardais et admithais et soigni si bein
Que acheteu y'n'peut en faithe absolument rein
Y sont comme eun fi d'or et sont bein brantchie
Mais y s'en ithont en margalo si ou lus touchie.

N'ou yia dit que pour attrapé et tué des rats
Y fallait les mettre de bu dans eune casse la tete en bas
Je sais bein pour certain qu''il en a attrapait
Mais combein?? Chonna n'se dit pas ches eune secret.

Yiavait eune Dame quavait eune "nice" Parapuie
Y yiavait tait donnait ou l'y t'nait comme sa vie
Eun jour ou l'prins quand ou'l alli s'promné
Ch'tait pus pour eune contnanche car y faisait bé.

Ou'l entri dans une Boutique et la ou l'oubliyi
Ou savait que ou l'avait en entrant mais pas quand ou sorti
Tout la niet ou fut sus pid, ou n'pouvait pas dormi
Mais le lendemain de bouanne heuthe ou s'décidi.

Dans racaté yieun (pas trop bon) et pis comme ou dis
M'en vi sça utile a tchiqun quand y ftha d'la pyie
Car dans ches temps ichin y faout donné nia pas
Y'n'faout pas gardé tout pour sé et être des ingrats.

Notre Jane alli en France au kemechment d'lêtet
Et comme ou dit acheteu ches eun coup bein erpathait
Ou sorti le matin et ou r'vint a sept heuthe du sé
Et ou'l eut du fanne et du pliaizi tout l'viage dans l'baté.

Ou'l avait mins du fricot dans eune grand pagni
Et ou s'en alli tout près de la mé pour le mangi
Ou'l entri dans eun restaurant pour eune tasse de Thée
Combein qu'ou dit! Dix sous Madame s'il vous plait.

Tu m'en donnas eune bouanne grande tassée, don man garçon
Car sies nous j'péyon chonna pour eun bouan Carton
J'en voudrais bein daeux tassés car je grand sé
Donne me eune cannaus diaux: j'sis si malinne comme té.

Mais depis qu'ou yia tet criyais me si vos pliait
Ou'l a presque oubliait de paslé en Jerriais
Quand ou va vendre s'en beurre au Samedi
Comme ou dit C'est eune franc cinquante a bon marchi.

Notre Pierre eut eune grande invitation eune fais
Dallé sies ses ammins pour baithe du Thée
Vos pliait t'y de chu piat ichin la femme l'y dis
Oui si vos piaits. Oui, oui: Oh! Mercie.

Je trejous bein aimait les paithes boiyies
Mais je n'en avais jamais gouötait de si bouanne de ma vie
Oh! mais sont y bouanne: y fonde dans ma bouoche
La femme l'y dis mes m'en vi ches des pommes douoche.

Yia étout notre petite vaizaine que je nomthé Caroléne
Ou soulait etre diversement en peine de Domplénes
Eun jour ou'l alli sies d's'ammins pour en mangi
Mais depis chu jour la; ou n'veur pas y touchi
Pour eune reliche ils les avez faites avec des "Sweedish"
Me j'dit ches parceque le suchre est chi
Car y mindre du set d'sus pour les mangi.

Livonia
1914
 

Viyiz étout:

 

Les Pages Jèrriaises