La Fête des Rouaisouns
La Fête d'la Vielle Langue Normande
en Dgèrnésy lé 19-20 Mai 2000
La Fête des Rouaisouns
Les Jèrriais lus en allîtent en Dgèrnésy pouor la Fête de la Vielle Langue Normande.
Y'eut un Vîn d'Hounneu Vendrédi au sé à la Cour Rouoyale à Saint Pièrre Port et j'fûmes èrchus par Moussieu l'Bailli d'Dgèrnésy.
À distchuter les vièrs livres
Sanm'di matîn, j'tions ès Vauxbelets pouor faithe nos piéches.
La Fête fut dêcliaithie ouvèrte par Mess Chris Day, lé Député Bailli, tchi pâlait en Dgèrnésiais, en Angliais et en Français.
Y'avait d's èrcitâtions et des chansons, et les groupes dé Nouormandie continentale présentaient lus chansons et lus danses.
Les Dgèrnésiais présentaient lus èrcitâtions et chansons étout.
À méjeu, j'mangînmes un bouôn r'pas.
L'arlévée, l's êfants tch'avaient fait des posteurs pouor eune compétition èrchûtent lus cèrtificaux.
Lé groupe Nouormand, Magène
Nou pâlait dans des groupes et chârait d's expéthiences, et ch'tait un grand pliaîsi d'pouver pâler l'Jèrriais, l'Dgèrnésiais et l'Nouormand ensembl'ye.
Y'eut un show dé costumes dé Dgèrnésy dans la tente, où'est qu'i' y'avait d'la faîs'sie d'beurre, d'gâche et d'bannètes, eune stâlle ès livres et eune exhibition d'photos et d'portraits.
Eune piéche bein amûthante en Nouormand
Tchi bieau temps qué j'avions duthant l'arlévée! Les Danseurs d'l'Assembllaïe D'Guernesiais dansîtent raide bein d'vant la tente, et învitîtent les gens à les r'joindre.
Dans la tente, La Guaine du Vouest chantîtent (et y'avait un tas d'gens à acater lus CD).
La Guaine du Vouest, dé Dgèrnésy
Et pis la séthée, y'avait un dînner auve l'êtchivalent Dgèrnésiais d'nos pais au fou, et d'la danse et des chansons.
Lé lend'main, Dînmanche, j'tchittînmes l'hôtel et vîsitînmes La Sociêté Dgèrnésiaise où'est qué jé r'gardînmes un vidgo des Ravigotteurs, et pis j'allînmes faithe eune touônnée d'la Bibliothèque Priaulx.
|
Acouo un r'cit: Ch't'année, au mais d'Mai, ch'tait lé tou ès d'Gèrnésiais et y'eu trais jours dé Fête, En tout 25 Jèrriais fitent la traversée, par baté ou avion, pour prendre part ou supporter. Pour les siens tchi t'est à prendre part ieu un 'Vin d'Honneu' dans la Chambre du Bailli à la Cour Royale, et auprès, un r'pas à la 'Manor Hotel' Petit Bot eyou que les Jèrriais 'taient à resté. Lé Samedi matin à 10 heuthes, eune 'coach' nos emmeni ès Vauxbellets pour c'menchi la fête. Dans la Salle dé l'Ecole 'Blanchlands' y'avait des danseurs dé Bréhal, dé Quetthou, et dé Montebourg assembliés, touos auvec lus belles coeffes, et étout les d'Gèrnésiais et Jèrriais, touos prêt pour faithe lus p'tit mio pour amusé les gens. L'arlevée, auprès avait bein mangi dans eune grande tente, qui 'tait dans lé Clios dé Sport à côté dé l'Ecole, ieu acouo des chansons, des ércitations, des danses et eune parade d'ancients costumes d'Gèrnésiais. La sethée s'passit à mangi dans la salle, et à chanté des chansons bein connues qué touos pouvaient joindre dédans. Dimanche matin, les Jèrriais futent emmenes au Mûsée eyou qu'un filme en d'Gèrnésiais fut montré dans lé thîatre et pis lé Sieur Harry Tomlinson fit un discours sus l'origine dé la Bibliotheque Priault, et lé moussieu tchi l'avait presentée à l'ile en sa memouaithe, tous les ancients livres, et l'histouaithe dé la maison.Vraiment bein intérêssant. Ertouonnant ès Vauxbellets pour un autre r'pas, et tchique chansons impromptu, y fut bein vite temps d'értouorner pour lé baté. Mercie ès d'Gèrnésiais pour tout lus travas. Eune hardi bouonne fête. Bein organisée.
|
Viyiz étout:
 |
 |
 |
