En Jêrry
|
Accouare un caoup l'vier rimeux d'Guernesy R'vient visitaîr ses biaux cousins d'Jêrry; R'vê leus progrès, leus pllaîsirs, et leus farces, Et s'accouaintir d'leus garçons et d'leus garces. Il est lian l'temps ouê qu'un p'tit caoup par an, Au Mardi Gras, à Pâque ou la Saint-Jean, Je v'naîs passaïr en Jêrry la quinzaïne, En m'pourjolànt d'auv quiq aïmâblle raïne. Mais bran d'chunna, l'temps, Guiu merci, n'est pu Où j'en trouvais un' nouvelle à chaque u, Pour la pupart d'avnantes rienquivaïlles: Bah! ma bouann' vieille en vaut chinquànte itaïlles. Pour en r'venir à mes accouaens jêrriais Du juraï l'Gros, à Guiu seit-i, j'me r'mets, Coum si ch'tait hier que j'y-allais, sans soin n'cure, Ouir sa pouésie et répétaïr ma lure. Et v'là-t-i pas, quànd nou n'y pensait brin Au déguernir i s'paque un bouan matin! Ah, donc! s'el'vi de deul un cri terriblle: Châcun d'vint bouan et n'lut pu rien qu'sa Biblle. V'là qui duri daeux-treis jours tout au pu - L'monde est de juée e de r'gret vite ému - Nou s'arrêti pour mûx r'prendre sa ronde, Et tout fut dit: hélas! v'là qu'ch'est que l'monde! Pourtànt ll'en a yun ou daeux chin et là Qui dans l'oublli n'mettront jamais chunna, Et qui n'sairaient r'visitaïr Jêrry miette, Sàns r'vê la d'meure et la tombe au chier pouète. Ch'est surtout l'cas d'un rimeux d'Guernesy: Aniet l'Biaucamp r'vient vê l'Biaumont d'Jêrry; Li, qui jamais ses viers accouaens n'oublie, Offre d'sa main à la veuve un' pouagnie. Ch'n'est point là tout: ill'a “l'Saint Louorenchais,” Qui d'nos vimeux d'à ch't-heure en vaut bien treis, Lélius, d'vànt qui j'm'accluque et “Anmin Phlippe:” J'voudrais pouvier sentir d'sen poing la grippe. Bah! j'cré, ma fé, qu j'n'en finirais pas Si j'vou pâlais d'Maret, d'Sohier, d'Lucas, L'captaine, à Guiu seit-i, s'n aïmablle veuve, M's-amis d'jannesse: hélas! faut bien qu'j'akeuve. Salut! vou tous mes chiers accouaens d'aut'feis, Morts ou vivants, p'tits et grànds, tant biaux qu'laids, Paintres, sculpteurs, rimeux, éfànts du g'nie, Ah! qu'j'îrais lian pour vou t'nir compengnie. Salut! Jêrry, pour vê tes monts, tes vaux, Tes biaux courtis, tes verts bouais, tes troupiaux, Ta ville où chacun cueurt à jouaïr sen rôle, Es traïtres fllots j'risque d'men bounnet l'môle.
Denys Corbet |
- Poetry in Jersey
- Jêrry
- Souv'nir: A Jerry
- L'âne et les crapauds
- Ès Rimeux d'Jêrri
- En Jêrry
- Adieu à Guernesey
- Guernsey Poetry in Jersey newspapers
- À George Métivier, le Poète Guernesiais
- A Jean Sullivan, Ecr., de Jersey en lisant sa pièce de poésie sur la mort de Hariet Guilbert