L'âne et les crapauds

 

Poetry in Jersey

 

Pour allaïr r'vê l'nic à nos chiers crapauds,
Acouare un caoup l'âne a traversaï l's-iaux,
Mais d'se-s-accouaens d'ichin d'vànt la couvaïe -
Respet d'l'hounneur - est bien tenvre et dêf'nâïe.

Maugraï chunna, Jêrry, n'a couaens n'virets
Qui n'me ramembre un tas d'amis d'aût'feis;
D'pîs la dernette, au ravissànt corsâge,
Que j'y-embrasshais quà j'étais pus sain qu'sâge,

Jusqu'à chu grànd, vénérâblle bailli,
Forgeux d'sornette et d'lure - à Guiu seit-i :-
Pus d'un juraï, rimeux, pouette et grànd haoume,
Qu'y dorment tous d'pîs longtemps, d'leus drain saoumme.

Mais si j'm'y trouve adret seul et d'laissi
Sous chu rapport d'pus d'un bouan vier ami;
Palfràncordîngue! i n'y-a pouit biaûcaoup d'païne
A r'trouvaïre là d'pus d'un nouvé la graïne;

Caêr not' crapaud, à sen bien grànd hounneur,
Coum dit l'Angllais, a dans sen poing sen cueur;
Dicton qu'tout âne en chu bel esprit qu'entre,
R'tourne en disànt “qu'ch'est qu'il a l'cueur par l'ventre.”

La preuve en est qu'l'aût' jour en y'arrivànt
J'aeus l'occâsion d'vê, coum en coummerçant,
Un bouan fermier - v'là qui m'vint coum un rêve -
Qu'je n'counnîssais, ma fé, d'Adam ni d'Eve.

Eh, v'là-t-i pas, qu'tàndis que j'vervion là
D'légueume et d'frit, d'patate et d'patatra,
I' craeut qu'j'étais un certain Bad'lagoule
De Guernesy, qui n'a pouit l'cueur d'un'poule.

Et dans un cllï me v'là du vier garçon
Traitaï, ma finge, en éfànt d'la maison;
Periaï d'être un d'une assaïz grànd' visite,
L'lond'main au ser, dans son vier nic d'hermite.

Ah! d'màndaïz-mé s'nou s'y-en aeut à gozo
D'pllaisî, d'lecture, et d'djâs'rie et d'frico;
Douz-heure, j'cré, fut quâsiment sounnâïe
D'vànt qu'j'ak'vission la superbe sérâïe.

Jamais d'ma vie au milli d'tànt d'crapauds,
Si gros, si fiers, si polis et si biaux,
Je n'm'étais veû, coum au jour de qui j'pâle,
Ossin leurs noms j'les mîs dans ma bouhâle.

'L-y-avait moussieu Hamon, grànd centinier,
Gaillard de front, et pîs moussieu Ramier:
L'cap'taïne Allix et leurs superbes dames,
Qu'nou s'tromp'trait d'charme en app'lant des brins d'femmes.

Et pîs 'l-y-avait l'savànt moussieu Vick'ry;
L'grànd écrivain, Marett, et... je n'sai qui;
Sàns pâlaïr d'l'hôte, au cueur ouvert, D'La Haye,
Sa ménagière, miette à la veie.

Si j'vou noummais tous l's-allànts et les v'nànts,
Curiaeux d'épiair l'auteur de tous les rànts -
Coum i' l'créyaient - du fâmaeux Bad'lagoule,
J'n'en r'par'rais pouit: i suffit qu'l'y-avait foule.

Chu n'fut pouit tout: après m'aver fêtaï,
Coum ichin s'dit, cîz l's âne', à coprs kervaï -
Respet d'l'hounneur - la perchaîne arlevâïe
I' daeut m'env'yaïr d'persents... un tàmberlâïe!

Et tout chunna pasqu'i' s'imagini
Que d'Bad'lagoule il avait trouvaï l'nid;
Et pouit se;'ment sen nic et sa nichie;
Mais que l'vier ouaidre i t'nait pour une achie.

Il onbilli qu'un ossi vier mouisson -
N'se lâquit pouit souvent prendre au lachon;
Mais qui lî faut pus d'un trait pour l'abattre:
Dame, il airait pus vite attrapai l'guiâtre!

Tout chu qu'je r'grette à present - mais tro tard -
Ch'est d'aver deû ma fête au p'tit canard,
D'm'être lâqui pâssaïr pour Bad'lagoule,
Tànt que j'n'étais qu'un lapin v'nu d'sa houle.

Denys Corbet

 

 

 

Poetry in Jersey

 

 

 

 

La Société Jersiaise

R'tou à la page d'siez-mé | Back to home page