En Jêrry
|
En Jêrry, Parcordi! Ch'est là qu'll'a Chaise et ch'va, Et ch'mins d'fer, Et bel air; Et d'bouann' gens Et des tchens, Par le mille, Dans la ville; Et sus l'pâie, Un 'tapâie: Gent et bête, Font la fête, Pour mourtraïr Leus gaîtaï; Chacun fier D'vou aver! En Jêrry, Parcordi! En Jêrry, Parcordi! Nou-s-y va, Chîn et là, D'l'ajeurant, Au couachànt, Les fins-faeux, Et sé'naeuds Dans la breune, Sous la preune, Et la poumme, Coumm' poing d'houmme, Et la peire; A vou nière: V'là qui quait Sus l'chapé, Et de d'là Dans l'barra. En Jêrry, Parcordi! En Jêrry, Parcordi! Quaï biau qué Qu'nou-s-y veit: Des gens fiers, D's-arbres verts; Sus les monts, Des maisons, Arrumâies, Titivâies, Dans les modes, Adret c'modes; Tant qu'la pllaïne Est tout' pllaïne D'flleurs et d'fit Et du brit Des bestias Gros et gras. En Jêrry, Parcordi! En Jêrry, Parcordi! Qui fait bel, Quànd l'soleil Du meis d'Oût Fait qu'l'Avoût Sous ses faeux Va sé'naeuds - Ch'est-à-dire, A l'écrire, Ou l'vêl'faire D'sa grànd' quaire, Ou d'sa chaise; D'charme à s'n-aise Ou gavlaî, Bien ombraï, Dans les bouais, Coumm' des rouais, En Jêrry, Parcordi! En Jêrry, Parcordi! Monts et vaux, Des pus biaux, Bien bouaisis, Tous flleuris; Un prospec', D'maîr et d'sec, D'où qu'nou l'veule, Qu'ensorcheulle, Et qu'enchànte, Et qui hànte; Qu'attriotte, Et picotte L'étràngier, Mei l'prumier, A s'n-allaïr Visitaïr L'vier Jêrry, Parcordi! En Jêrry, Parcordi! Ch'n'est pas là Tou chu qu'll'a Pour charmaïr L's-éventaïs; Ll'y a l'côti, Déroqui, La grànd' bâie, L'ieau salâie, Et la cave, Qu'la maïr lave; La falaise, D'long et d'laize, Et l'biau ciel, Et l'hôtel Sus l'galet, Ouèst qu'nou beit L'vin d'Jêrry, Parcordi! En Jêrry, Parcordi! Ah! jamais Je n'pourrais Dénoummaïr Ses biautaïs: Ll'a Gorey Et Boulay; La Hoûg'-Bie, Bien moussie; Saint Berlade, Pour l'malade; Sainte Cath'rine, Palfrandine! L'vier Nermont, L'neu' Pllémont, Graïv'-de-Lecq, Belle à sec. En Jêrry, Parcordi! En Jêrry, Parcordi! S'ou' voulaïz Ribottaïr, Sàns chaffrai, V'là l'endreit: Ll'en a-t-i' Du pllaisi; Et des garces, Et des farces; L'l'ong d'a s'maïne, Ah! que d'païne Nou s'y bâille, Coût' qui vâille; Tant qu'en gros, L'jour de r'pos, Nou s'y r'prend D'bel et d'boaun. V'là Jêrry, Parcordi! En Jêrry, Parcordi! Qu'est qui faut, P'tit ou gros, Qui n'y-a pouit? Guiu merci - Pour des sous - J'vou dis l'tout. Rien n'y mànque, Sauf la bànque Qu'nou-s'y freume, Aurapreume; Mais n'y-a compte, Et j'ai honte De r'lataïr Les niais'taïs, Et l'non-sens, D'si bouann' gens, V'là Jêrry, Parcordi! En Jêrry, Parcordi! Nou-s-y-est r'chu, A chaque u, Coumm' des rouais; Car d'un' vouaix P'tits et grànds, Lourds, savànts, Tous vou crient, Et vou prient: "Ah! sé-m'n-âge! Vouos en viage? T'nez un' mie, Qui d'la vie Eut pensé A d'itai? Ou d'vouos vêi! D'chett' bouonn' feis, En Jêthy, Eh! pathgui!" "En Jêthy Ah! pathgui! Enthez donc, D'che qu'j'avons Vouos 'n'éthez; Apprechez Auprès l'feu - Ch'est d'bouon cueu' - Un bouachée D'bouonn' beuthée, Et un vethe De qui beithe, F'tha, sé'm'n'âge! Vot' couothage Pour dinèr; Car restèr Vouos l'faithez Tant qu'vouos s'thez En Jêthy, Veth, pathgui!" En Jêrry, Parcordi! V'là l'accuei' Qu'nou vou fait. Nou-s-a lu Qui n'est pus L'vier Jerry Où jadis N'y avait qu'fête, D'pis la bête A la pure Kériature; Mais je m'fiche Qu'est' qu'nou diche, Pus d'gaîtaï, Ou d'bontaï, Qu'chu qu'nou veit S'rait, ma fei, D'qué forchi, Parcordi! D.C. 1873 |