Combein p'tit d'gens tchi pouôrraient nommer l's articl'yes d'vaisselle d'aut'fais?
En donnant les noms et eune description dé tchiques vaissieaux qué nouos grand-péthes et grand'méthes connaissaient sus l'vièr drécheu ou à l'entou l'âtre, tchitch'un jusqu'acouo ofûche dévant la Preunmié Dgèrre, nou peut quâsiment s'dithe qué ch'est tout d'tchi oublié par lé monde d'à ch't heu.
Deux ou trais articl'yes, au tout pus, es'sont p't-être acouo connues d's anciens, mais pouor les préchaines généthâtions ch'est bein seux comme du grec!
Quant à mé, ch'est des noms d'articl'yes qué j'ouiyais bein souvent aut'fais d'la bouoche dé nouos vielles gens. Et, i' n'y'a pon 'couo tant d'années, d'chenna.
Mais, qué tout a changi! Si mes grand-péthes ou mes grand'méthes allaient r'vénin - éthaient-i' don l's ièrs ébahis! La vaisselle et l'bataclian d'tchuîsinne et les grais modèrnes - tout ch'la lus f'sait grand peux. Ché s'sait comme dé tchi d'dans un aut' monde! Mais, n'craithaient-i' pon qué j'sommes dév'nus pièrcheurs, auve touos ches conforts dé la vie d'à ch't heu - ieux tch'étaient si endueurchis, ès conditions d'aut'fais? En éffet, nou sé d'mande tchiquefais - combein poulotés acouo qu' j'allons dév'nîn?
| Un Bachin à papa | Un P'tit bachin à long manche dans tchi qu' nou faîthait d'la bouoillie (appelée du papa) pouor les p'tits êfants. Il 'tait fait en pâlîn. |
| Eune Bûsette | Eune boutelle en tèrrerie. |
| Un Godîn | Eune tâsse sans hangne en rouoge ou naithe tèrrerie ; ch'tait eune tâsse assez grôssiéthe, dans tchi qu' nou b'vait l'cidre à la fèrme aut'fais. Les uns disaient "un godîn", d'autres “un godet ". |
| Un Hana | 1, Tâsse en tèrrerie auve eune hangne ; 2, Étout, eune cruche en tèrrerie, pouor dé l'ieau, etc. Et, par extension, eune grand' canne d'eune sorte ou d'l'autre. Nou connaît des St. Ouonnais acouo d'ches jours tchi disent dé-même. |
| Un Hanapé | Pot ou sâsse-paine qu' nou m'ttait dans la braise pouor caûffer l'cidre. Les hanapés à deux hangnes avaient les hangnes gentiment près ieune dé l'autre. Nou faîthait sèrvi étout chutte vaisselle comme mésuthe. Par exempl'ye nou-s-acatait dans l'marchi à paîsson en ville, eune hanapée d'vlicots. Nou disait en outre, eune hanapée d'pais, etc. |
| Eune Houlette | P'tit pot en tèrrerie, pouor caûffer tchiquechose au feu, mais sustout du bouoillon. La houlette était pus p'tite ou pus mince qué l'hanapé. Mais ou sèrvait parfais étout au cidre. |
| Un Houlot | P'tit pot en tèrrerie atout un manche et des supports ou p'tits pids. Chutte vaisselle èrsembliait hardi au bachîn à papa tch'était en pâlîn. |
| Eune Jûte | Ancienne mésuthe en êtain, dé difféthentes grandeurs. Ches m'suthes, tchi datent du dgiex-huitième siècl'ye au mains, dépis un d'mié-nodgîn jusqu'à un gallon, étaient en usage pouor matchiéthes litchides ou secques. I' sèrvaient étout d'cruches pouor difféthents usages, ayant eune hangne et un couvèrcl'ye. À l'originne, sans doute, mésuthe “juste”. Disons qu' nou-s-en trouve acouo dans cèrtaines maîsons comme ornéments. |
| Un Malzard | Pot en tèrrerie, atout eune hangne, mais dé finne pot'tie, cont'nant à bein près eune quarte et dans tchi qu' nou caûffait l'cidre dans la braise. Pas justément la même chose comme lé hanapé. Lé malzard, tellement nommé probabliément d'après lé preunmyi tch'avait fabritchi chutte vaisselle, était tchiquefais étout en méta et d'forme conique pouor pèrchi dans la braise; nou-s-app'lait ch'tî-chîn étout "l'pointu". |
| Un Pînton | Pot en tèrrerie, atout eune hangne, dé pot'tie grôssiéthe, cont'nant eune pînte (dé l'ancienne mésuthe) et dans tchi qu' nou caûffait l'cidre dans la braise. Hardi comme un malzard. |
Viyiz étout: