La Tou

Eune tou est un haut bâtisse ou eune partie d'un bâtisse. J'viyons un tas d'tours l'tou d'Jèrri et y'a des fanmeuses tours d'aut' bord partout l'monde étout.

La Tou d'Londres fut grée preunmiéthement par les Nouormands, nos anchêtres, auprès la Contchête d'l'Angliétèrre à seule fîn d'garder Londres. La Tou d'Pise est cantée. La Tou Eiffel 'tait s'posée d'êt' tempothaithe - ou fut bâtie pouor la grande exhibition à Paris en 1889 pouor célébrer l'chent'naithe d'la Révolution Française - mais ou trouvit s'n utilité pouor l'radio et est acouo mâtée dans la capitale d'la France, un sŷmbole du pays. En Jèrri, j'soulêmes aver eune p'tite "Tou Eiffel" à la Maîson Saint Louis, mâtée sus l'obsèrvatouaithe, mais ou fut halée y'a d's années.

Y'a des tours ès châtchieaux, mais chein qu'nou r'mèrque lé pus ch'est l'amas d'tours tout l'tou d'nos côtes. Y'a des rondes tours dé Jèrri, des tours Allemandes d'l'Otchupâtion, et d'aut's tours historiques. La Tou du Prînce à La Hougue Bie fut halée par La Société Jersiaise pouor faciliter la dêfouithie d'la tombe souos la hougue.

En 1779 lé Gouverneux, lé Génétha Conway, griyit un plian pouor la bâtithie d'tours machonnées auve des batt'ties l'tou d'la côte. Ches rondes tours sont difféthentes des cheinnes en Dgèrnésy et n'sont pon nitout des tours dites Martello.

J'avons des tours dé chutte faichon-là, bâties auprès la dêfaite dé navithes Britanniques par eune tou à Mortella en Corse. Tchiqu's'eunes dé ches tours fûdrent bâties duthant les dgèrres anti-Napoléonniennes: la preunmiéthe dé ches tours 'tait la tou sus l'Île au Dgèrdain au Portélet en 1807, épis la Tou d'Vîne en 1808, et la Tou d'Ic-Ho en 1810. Pus tard nou bâtit acouo des tours dé chutte faichon: la Tou d'l'Êta en 1832, la Tou d'la Collette et la Grôsse Tou en 1834, et la P'tite Tou en 1835; la Tou Victoria 'tait la dreine dé ches tours en 1837.

L's Allemands modèrnîsîdrent des vielles tours en 1940-1945 et en achouêmîdrent des aut's (notabliément la Tou d'l'Êta et d'aut's tours dans la Baie d'Saint Ouën; la Tou d'la Rocque-Ho fut faite sèrvi pouor tither au blianc et bombardée en d'lacres - y'eut eune longue distchussion ès années 1960s s'i' valait la peine d'dêpenser un tas d'sou pouor èrgraie la tour).