|
Ou savez tous, n'y'a pas l'moindre doute,
Dans tchi direction qu'est la Tour d'Ico,
Nou peut la vaie aisiment d'la route
De La Rocque, Samarèz, Pontac ou l'Ho!
Ch'est, coumme toutes les tours, une ronde bâtisse
Assise bein solidement sus l'rotchi,
Les louaimes ont yeu bieau s'ruer au pi d'l'êdifice
I' n'reussithont pas à vos l'faithe drotchi.
Les pêtcheurs parfais y'arrêttent lus bèrquottes
Espéthant d'y rempl'yi lus pannier jusqu'au bord
Car y'en a là l'tou, d'tchi faithe des mat'lottes,
(Coumme il est mins, parfais, su le M'nu d'la Pomme d'Or)!
Des vras, des pliaies, des maquéthieaux, d's'anghulles,
Du bar, du horfi, d'la raie et du mulet!
Nou pêque à raidde brache dès qu'la mer ertchule
Et nou n'arrête jamais que quand nou-z'est enniè.
Mais y'en a d'autres que les pètcheurs ordinaithes
- J'veurs dithe qu'les siens qu'en font profession -
Qu'y vont, d'temps en temps, à la Tour solitaithe,
Pour y prendre du r'pos, et p'tre du paisson!
Ch'tait dans ches conditions, à ch'que j'veins d'entendre,
Que George Duprè - ou' savez bein tch'est qu'il est ch't'îla -;
Le St. Cliémentais qu'est tréjous prêt à prendre
Dans l's' êlections la djabbe de candidat!
Et bein li, George Duprè - s'y'en fut don, Dimanche,
A la Tour d'Ico, au biaeu jour qu'il 'tait.
Mais nou n'sait jamais, quand la prom'nade quémanche,
Tch'est qu'il adviendra à tchéthiot ou baté!
Le temps, chu jour là était magnifique,
La mer coumme une mathe, - pas une aube de vent;
George, prins l'Almanâ d'la Nouvelle Chronique
Qu'est, pour les mathèes, extra-excellent!
Souky, s'fit i' à sa femme, en lis montrant la page,
Ergarde chonna, ch'est fait coumme exprès,
La mathèe nos sert, n'y a pas d'signe d'orage;
Faut aller à Ico, dépêche té de t'graie!
Quéman? s'li fit-alle, j'n'ai qu'man chapé à prendre,
Ch'n'est pon la peine de s'changi hardi.
N'ait pas d'peux, man garçon, je n'té f'thai pon attendre
Il est sus l'bouan lièt, j'm'en vais vite le cherchi.
George, dans l'entretemps, changeait ses bottes de chapelle
Pour une pathe de souliers - il en a plusieurs! -
Et s'en fut crier à trais d'ses hardelles
Qu'étaient dans l'gardin à r'garder les flieurs.
Et en route pour la grève, ne v'là la famille,
Heutheux, contents, et bein disposés
Pour une heuthe de pliaisi, au large, bein trantchilles,
Dans lus propre baté, - ch'est des gens moyennés!
A la Tour, sans l'moindre accident, les v'là qui débarquent;
Et les p'tites, en pliaillant, sautaient sus l'rotchi,
Tandis qu'lus papa amathait sa p'tite bèrque
Ov un gros bu d'filin, et un mio d'fé cotchi.
Jusque là tout avait tè coumme sus des rouolettes
Et chatchun 'tait content de s'trouver à Ico,
Y'où qu'la libertè est tout à fait compliète
Tans qu'à "Cape House" n'faut pas galvauder trop!
Mais George, avait-i' yeu un mio d'négl'yigence
En amathant san baté au rotchi?
Je n'voudrais pas l'dithe, mais un p'tit d'prudence
Est l'moyen parfais de ne pon s'drotchi!
La corde frottait, coumme i' l'avait minse,
Sus l'bord d'une pierre qu'i' n'avait pas veu;
Tout d'un coup, not' moussieu vit, avec surprinse,
San baté velle au vent, qui s'n'allait tout seu'!
Sa tunette, sa casaque, étaient déjà hortes;
I' halli san veste, et ses soulièrs d'can'vas,
Et d'autres habits de difféthentes sortes,
Sus les détails de tchi je n'm'êtendrai pas!
Et né v'là George à l'ieau, nageant à grand's braches,
Dans l'espéthance de r'attraper san baté bétôt,
Mais quand un baté s'en va ov la mathèe, i' marche
Sans aver besoin d'cap'taine ni d'mat'lots!
Et George, tout bouan nageux qu'il est, eut bieau faithe
L'fichu baté dansicotait... et s'motchait d'li!
Tandis que l'pouorre médjan restait tréjous driéthe...
Si ch'n'avait pon 'tè Dimanche, en éthait-i, dit!!
Enfin, fallit s'en rendre à l'évidence,
Coumme nou dit souvent dans la Cour,
Et Mess Duprè, maudissant s'n'imprudence,
Ernagi tristement, tout seu, jusqu'à la Tour.
Ne v'la don not' perrot, et sa femme et ses filles
Exilés sus l'rotchi à deux milles de Jerry,
Sans aver si bétôt, la plyie ou la grille
S'n'allaient s'mettre à tchaie - et yeux sans abri!
La Tour 'tait barrèe, et n'y' a pon d'cabane
Coumme y'en a ès Minquiers et ès Ecréhos,
Ov des galettes sus l'ais et de l'ieau dans la canne;
- Touos seurs sus Ico, ils 'taient ma fé! bieaux.
Pour faithe des signaux, i' s'imaginidrent
Dé s'mettre à châtchi lus bliancs mouochets
Mais ch'tait inutile. I' châtchidrent et châtchidrent,
Mais du d'jantre si personne de la terre les viyaient.
Maîtr' George, à la fin, se rapp'lant des histoéthes
Qui liêsait souvent quand il 'tait garçon
Se mins dans la tête qu'i' pouorrait faithe pliaithe
Que d'imiter l'célèbre Crusoe: - Robinson!
I' s'n'allit don, avec ses trais hardelles
Cherfouill'yi dans l'rotchi, partout,
Pour des mios d'vrai' sec, et la plise, des madelles
Et bétôt i' fit une grand' fouèe atou'.
Ils 'taient exilés y'iavait dêjà des heuthes
Et touos lus estoumas criyaient raidde la faim;
A tchi bon s'pliandre! Les choses n'en 'taient pas miyeuthes
Et Jerry restait tréjous aussi liain!
Mais châtchun l'sait, i' n'y'a pn d'minzéthe
Qui n'veinne à sa fin, et quend vint un temps
I' vidrent sus la côte plusieurs points d'lumiéthe
Nou lus rêponnait! Les s'cours 'taient en v'anant!!
Une gestion d'temps occouo, il fallut attendre
A tons sus Ico, san rein à mangi
Et pis, tout d'un coup i' finidrent par entendre
Un baté qui v'nait les haller d'dangi.
George et sa femme et lus trais fillettes
En viyant chonna fudrent rasseuthès;
Ov lus mains à lus bouoche pour servi d'trompettes
I' fidrent à saver yoù qu'ils 'taient êdgéthès.
A la fin des fins ne v'là l'baté qu'appréche
Nou ouait bein les vouaix et les avithons;
George tout haut sus les rotchers se dréche,
Pour montrer exactement ses vrais envithons.
Ch'tait Walter Wilcox, avex deux camarades,
Daniel Le Rouogeté et George Hamon,
Les trais p'tites en faisaient de diverses houppades
Enn'yèes du rotchi, i' voulaient la maison!
Nou-z'avait, heutheusement, pensè à lus bedaine
Et y'avait du café et des tas d'tchi mangi
N'y'avait pas grand' vaisselle mais ch'tait pon la peine;
Quand nou-y'est affamès, nou peut s'arrangi!
I laissidrent bein vite le rotchi driéthe
Une fais qu'ils eurent mins le cap sur Jerry
Mais fallait les vaie à mangi et baithe -
J'n'oserais pour vos dithe chein qu'chatchun serri!
En filant tout drait sus les veux d'l'auberge
A Ph'lip Mac Allen, qu'est au bord du Ho',
Et nageant bouan rond le baté et sa cherge
Atterridrent bétôt, sans malheu' ni dro'
Et j'vos certifie qu'i' y'avait du monde,
Tout l'vaisiné sembl'yait y'être attroupè;
Et i' barbelottaient coumme le fliotchèt d'héthondes
L'tou' d'not' tcherquethie quand l'solèt est l'vè.
Un châtchun lus aidji à r'venin à terre;
Nou lus tendait les mains pour sauter du bord,
Et les p'tites, à lus jouaie, fudrent à lus haute dgherre,
- Mais i' n'avaient pon l'air d'aver enhannè fort.
Quant au fichu batè qu'était hors à la drive
Je n'sai pon du tout chein qu'en est dev'nu.
A tchi bouan s'gêner de chein qui y'arrive?
I'se r'trouv'tha tréjous... s'i' n'est pas perdu.
Me motchi d'té, George, ne s'sait pon aimabl'ye
Mais laisse-me, j't'en prie, te d'mander occouo
S'tu n'te pliais pon mus dans ta d'meuthe confortabl'ye
Que d'être isolè, l'Dimanche, sus Ico?
Elie
1913
| 