Vendrédi, l'31 dé mai, à bein près 60 membres lus rêunîtent au Châté Lîzabé pour la rêunion mensuelle.
Lé Député J.E. Gaudîn fit la beinv'nue et lé Vice-Président, lé Connêtabl'ye R.H. Le Cornu, lé r'mèrcyit et dit qué L'Assembliée 'tait bein contente d'aver ch't' opportunité dé visiter lé Châté.
Lé Sieur C. Green explyitchit eune partie dé l'histouaithe du Châté à c'menchi à l'entrée qu'était la porte du rouai Guillaume auvec les armueûthies royales, sus la gauche les siens dé Lord Jermyn qui fut Gouverneux d'Jèrri dé 1684 à 1704 et sus la drouaite les siens du Lieutenant-Colonel Colyer, Gouvèrneux d'Jèrri 1705 à 1715.
Lé Fort du Rouai Charles date dé 1646 nommé lé Jour dé la Fielle dé Tchêne en 1647. L'hôpita, acouo pour être èrnouvelée, est sus l'empliaichement du vièr moulîn à vent.
Le vièr Prieuré
Dans lé centre du "Barrack Square", où'est qu'l'Abbaye de St. Hélyi sé trouvait dans l'temps jadis, est eune crouaix mèrtchant l'empliaichement du vièr Prieuré dêtruit duthant la Dgèrre Civile en 1651. L'ameunition fut bouogie au Crypte à cause des "magasins" étant mucres. Lé vièr "gymnase" est à ch't heu eune gal'lie d'art et lé café où'est qu'les membres eûtent des raffraichiss'ments à la fîn d'la visite.
En 1646, coumme Prînce dé Galles, Charles fît eune vîsite des Sorlîngues (Scilly Isles) auvec 300 pèrsonnes et prînt résidence dans la maison du Gouvèrneux du mais d'avri au mais d'juin dé ch't' année-là. Eune maison fut prépathée pour li sus l'empliaichement du vièr Prieuré et là il êcrivit eune partie dé l'histouaithe dé la Grand' Révolution. En 1649 Charles èrvînt coumme Rouai, charles II, auvec san fréthe James, Duc de York, et tchittit l'île pour la dèrnié fais à la fîn dé l'année.
Les "tableaux"
Les membres pâssîtent la porte en fé et la porte dé la Reine Lîzabé (auvec ses armueûthies) et vîtent les "tableaux" dans la maison du Gouvèrneux restaurée en 1930. Le preunmyi "tableau" montre Sir Walter Ralegh à distchuter lé plian du Châté auvec Paul Ivy; lé deuxième montre Charles II donnant à Messire George de Carteret la charte li'accordant d'la tèrre à New Jersey.
Alentou des muthâles dé d'hors les membres vîtent des canons de difféthentes sortes. Les membres montîtent jusqu'à haut pour vaie la belle veue dé la Ville et la côte.
1974
Viyiz étout: