Souos l'înfluence des vacanches à l'êtrangi et des couques à la télévîsion, y'a tréjous des nouvieautés dans les supèrmarchièrs. Y'a tchiques années, tchi qu'éthait creu qu'les tonmates s'tchies au solé d'veindraient populaithes coumme i' sont achteu?
J'aime bein faithe sèrvi les potées d'sauce dé tonmates s'tchies au solé - v'là tch'est bouonne à douother sus des pizzas ou à en ajouôter eune tchul'lée ès êtchuivées, et né v'chîn eune èrchette tch'a un goût d'èrva-s-y: des moûles auve du lard feunmé.
Les îngrédgiens sont: eune livre dé moûles, un ouognon, d'l'ail, du lard feunmé, du blianc vîn, du pèrsi, d'la sauce dé tonmates s'tchies au solé, et dé l'hielle d'olives.
Caûffez l'hielle dans un sâsse-paine et fricachiz douochement l'ail hadgi. Hadgiz l'ouognon et fricachiz-lé jusqu'à ch'qu'i' sait bein breuni. Copez lé lard en p'tits morcieaux et ajouôtez-les au sâsse-paine. Quand lé lard est coutchi, ajouôtez eune tchul'lée d'sauce dé tonmates s'tchies au solé et deux d'gouts d'vîn. Mêlez tout vite auve eune tchulyi en bouais, et pis vèrsez-y les moûles (qu'ous avez bein netties et scrobées). M'ttez l'couvèrt sus l'sâsse-paine et tchuithez les moûles à l'ieau pouor trais minnutes. Châtchiz lé sâsse-paine deux-trais fais à seule fîn d'asseûther qué toutes les moûles sont ouvèrtes et coutchies.
Ajouôtez eune pouongnie d'pèrsi hadgi - et du paîvre étout, s'ou voulez. Sèrviz sus des vèrtes tagliatelle ou un liet d'couscous, et n'oubliez pon d'baithe lé restant d'la boutillie d'vîn auve chu bouôn fricot!
Geraint Jennings
Viyiz étout: