Le Rouleux de St. Louothains
Bain des r'merciements à l'ammin anonyme qui m'envyi une si belle carte postale Lundi matin.
Ch'est une jolie couôtume, chette-là d'envier des Oeus d'Pâques à ses connaissances et evidemment man correspondant mystérieux avait mins ch'tis-là d'côté pour mé. Mais il l'avait gardé si longtemps que sus tchique sens i' s'était trouvé coué et il en avait sorti un joli Caouain.
Merci, oquo une feis man vi, je crai que je pouorrais t'nommer, mais je n'm'en vais pas y ristchi, de peux de m'tromper.
* * *
Ch'est mé qu'en vi une calamité l'aut'e jour.
J'étais dans l's envithons d'Millbrook à chouaisi une pliaiche pour une cousine à Marie Hibou qui voudrait faithe san nid.
J'avais trouvé un assez bouan empliaichement dans les brousses à côté d'la Telephone Exchange et j'étais jutchi sus la muthaille à contemplier la position.
Tout d'un coup j'entendi le ronnement d'un Steam Roller tout près d'mé et en me r'touannant je r'connu le Rouleux de St. Louothains qui s'en v'nait à grande vitesse avau la Rue du Galet et qu'était avitré dret pour la muthaille sus tchi que j'tais. "I' y a tchiquechose qui n'va pas bain!" j'pensi, et au même instant un homme s'en v'nait couothant avau la route en heurlant "Ouaie! ouaie!!"
L'homme qui cachait l'rouleux s'touanni d'bord et raiponni, "Way be damned! I' n'y a pas d'Way ichin acheteu! Ch'est mé qu'est cap'taine de chu steam ichin et man nom est Rondé!" Au même instant i' y eut un espèce de trembliement d'terre, l'automobile au c'mandant d'Rondé avait monté pardessus l'pavé et êffondré la muthaille de l'Exchange.
J'eus la chance, mé, de vaie en temps chein qui s'en allait s'arriver et d'voler d'l'autre côté du c'min sus l'haut d'la muthaille à Mess Hubert.
La pouore femme qui soigna du bureau eut quâsiment les sens touânnés, car quand ou ou l'frédas, ou s'imagini que ch'tait la bombe d'un Zeppelin qu'avait tchait sus la bicoque.
I' faudra qu'la cousine à Marie Hibou trouve une autre pliaiche pour faithe san nid, car les brousses à Millbrook sont trop exposées acheteu.
Et i' n'y a pas d'temps à perdre, car ou s'en va pondre au pus vite.
* * *
Ch'est à St. Ou garçons, qu'i' s'en va y aver du rêvillon les aut'es jours! Une autre êlection sapresti! Ch'est pour Surveillant chute feis. George a pourtant surveillyi comme-i-faut toutes ches années ilo, mais i' pathaît qu'un autre homme est d'opinion qu'i' peut surveillyi oquo mus qu'li et i' s'en va d'mander ès parraissiens de l'mettre à l'êpreuve.
Mais i' faut espéther que nos anmins d'St. Ou sont d'l'opinion du correspondant mystérieux qui m'êcrivi Lundi et qu'avait mins sus l'driéthe de la carte:
"Rain tchi vaille que nou connaît vaut mus que rain tchi vaille que nou n'connaît pon."
Caouain
Avri 1916
Viyiz étout: