La Patrie en Dangi
À l'Éditeu dé l'Indépendant
Mousieu, - La patrie est en dangi. Chn'est pas qué les Français s'en vennent une autre fais, chn'est pas qué lé Parlément s'en va culbuté tout, chn'est pas qué j'enne puorons nos l'vé et nos cuochi quant y nos pliéra, et ch'est pas qu'nou s'en va nos ravi iun d'nos millieurs privilèges, n'ou s'on va nos emporter notre temps, car y vainnent dé juqui une auluoge dans la vieille église, et une matinée j'avons tait bain surprins dé vais qué toutes nos montres et nos auluoges étaient en r'tard; lé bouan vièr temps dé Jerri né va pas vite assez acheteu – y faut aller pus vite, ch'est une âge dé vitesse. Ouès qu'est lé temps dé nos puore vieilles grand'mères avec lus cotillons d'ruoge molleton paquis aussi p'tits qu'i pouvaient, et nos puor viers grandpères avec lus blieus casaques à juaunes boutons avec des pannaies jusqu'ès talons? Ah! chu temps-là est passai! l'âge dé vitesse a qu'menchi et acheteu j'avons des crinolines comme des viellottes dé fain, des gambes dé brés comme des sacs à pannais, et des manches dé casaque comme des ballons. Puor viers temps! esche qué jé n'vos r'verrons pon oquo une fais, quand nou pouvait marchi les rues sans avé les gambes êcuochies par des cercles dé toutes les sortes qué les femmes portent atuor dé ieux comme des barriques?
Mais pour ervenné ès auluoges. A qués qu'il a montè dans la tête dé faire une telle bêtise? Qu'est qu'a tè avisè assez pour aller nos enlevé notre temps? Esche qué la vie n'est pas dêjà courte assez sans aller ôter 8 minutes dans un saquet? Puor espritès, dé qu'est qu'ou allais vos avisé la préchaine fais, dé faire descendre la lune sans doute comme ou zavais fait avanchi l'solet, dé faire lé pyramide paraître comme un homme comme y faut à la pliaiche d'avé l'jaunisse, ou p'têtre d'allumé l'gaz quand n'ou z'en a besoin à la pliache d'el dêtaindre coumme où faites acheteu? ou bain s'en va ti vos en monté d'quique autre sorte dans la tête, comme d'aller pêqui dans la grand rade pour les roulles du tchériot à Pharaon?
Jerriais, nou veurt vos voler jusqu'à votre solet, y n'peut pus merqui bain assez; tuos vos cadrans sont en deu, et toutes les merques quou zavaites sus vos pas d'porte pour merqui l'heure ne valent pus rain – tuos fichus comme Henri Quatre sus l'pont Neu. Vos ennemins sont à la porte. Lévous, capuchis, ou où zêtes perdus! Y nia pas dé temps à perdre. Qué tuos les siens qu'ont une vouaix dans l'Assembliaie dé d'main aillent la donner contre chu mannière dé temps dé Griniche. Les siens qui veulent aller vite ont du pais dans lé monde, mais n'ayis pas d'peux, ou savais “qu'à vaincre sans péril on triomphe sans gloire,” et donnez lus une leçon qui n'roublieront pon pour une pose. Mais ma fé, lé temps avn'nin nou s'ra obligis d'allé s'cuochi à l'heure qui plièra ès hommes à crinoline ou à êtrain. Mais n'oubliez pas d'main, et siyiez à l'assembliaie.
Je d'meure, Mousieu,
Jacques Rocbert.
Mont Êpendue, chu 3e Juin 1861
The Jersey Independent and Daily Telegraph 4/6/1862
Viyiz étout: