L'Anmin Ph'lip, laissiz-mé la ouq' je sis pliaichi,
Mé, tchi sis votre Ruoi Doré du Vier Marchi,
Dans tuous les pourtraits
Qui en ont tai faits,
Ou mé verrais sus ma "Pizamide" jutchi,
Même dans l'pourtrait d'la Bataille de Jerri.
Tchi vente ou plieuve, j'ai le bâton en haut,
Et je me tcheins d'aplomb étout coumme y faut;
Le monde en ont dit ben des sortes sus mé,
Que j'étais la "Figure-Head" de l'Arche de Noé!
J'ai 'tait aitou unne fais vilain'ment quoiffi,
Et coalterrai aitou, quique médjiant pendi
Des vieirs "knockeurs" minchis au but de man bâton,
Pour faithe la Police venin en guédon;
D'ches farceurs là j'ai tai la dupe, mais j'y tcheins,
Nou devrait, tout coumme, respecté les anciens,
Car je sis ben vi, et ma puoure mémoithe
Mé tromp'theai, si fallait dith' le nom d'man pèthe!
J'en ai veu de ben des sortes dans l'Vieir Marchi,
Les Gazettes vos l'ont pet-être ben dit;
Ah nen! jamais
Nou n'mé f'ra oublié les Procliamations de Paix,
Un Centenaire et des fêtes rareilles,
Quand les illuminations faisiaient merveilles.
Gaz, Lanternes Chinoises et lampions,
Chounna faisait l'extase des piétons,
"Hibou" de dan vivant m'counnaissait ben,
Quand j'y pense, j'en lerme pour man buoun cat-huen!
Mais enfein, l'Anmin Ph'lip, ou n'êtes pon mauvais,
Laissis mé là ouèque je sis en paix,
Je ne fais pon grand ma, si je n'sis pon grand'chose.
Tout dans chu monde n'est pas couleur de rôse...
Et dans tout le temps passai, ah! toutes les loies
Que j'entendais.
Ach'teu les Dénonciateurs vennent auprès d'mé
Je n'les comprends pon, y n'font que barbélueuté,
Devant être quémenchis
Y voudraient être finis.

J'en sis tout jaûne, et habits et pé,
Je vos en prie ayiz pitchi de mé;
Voudraît'ous rempleichi, car chest là vot pensaie,
Un "Ruoi Doré" par unne "Reine Adorée"?

La jalousie n'entre pon
Dans man chervé d'pliomb,
Mais si vos manque unne pliaiche pour vot' statue,
Jé vos ditheai en deux mots men idaie là-d'sus:
Dans la Pathad' yia unne masse de granit,
Qu'a tai machonnaie par Mait' Charles ed Gruchy,
(Chest tout du Mont-Mado, bel et fein'ment pitchi),
Yia du run là-d'sus
Pour deusse-trais statues!!
Fichiz-mé vite d'côtai les deux êsmânues
Tchi sont là, yieunne à gauche l'autre à droite
(Chest de fé fondu, que nou dit tchi sont faites),
Car tout Doré que je sis, chest là men idaie
Que chutte statue là n'en serait qu'amendaie,
Et pis sans faithe un muouché de frais,
Escoutais man plian et ou zallais vais.
Je devtheais ben savé, étant statue mémême,
Sans dutout savé dé quicq' je sis l'embième...
Les deux espeurats unne fais
Fliaintcdhis ben hien hors de la vaie,
Dévalais le Général de oué qu'il est jutchi,
Mettais y vot' belle statue à l'rempleichi!
Mais pour quant ès deux êmânues,
Ou savais bein qu'a la "Sambue,"
Yia un roqui, nou l'appelle,
Je cré, du nom de "La Selle,"
Nou puourrai, par ornement,
Plieichi, avec un barri ou deux de chiment,
(S'ils 'taient peints avec du Phosphorus paint, ben bright,
Y serviraient pet-être ben, de leading light.)
Ches deux espeurats là, hieun sus chaque pointe,
Y paraîtraient ben, n'en ayis pas de crainte!
Si à "Rocqberg" yia oquo quicq' chorchi,
J'vos gage, ma fingre, tchi s'ra ben fi
De s'trouvé quicq' fais en si buounne compangnie.
Coumme les deux inmages, bel et ben vernies
(Y s'raient, hélas ben vite couertes de bainies.)

Votre "Pédestal" cliairgi de chein qu'était d'sus
Ne v'la, ma fé, du reun pour trais statues!
Mettais ach'teu, la Reine drait au haut;
Car chest là, pour seure, la pliaiche tchi l'y faut -
Ermettais mé, le Général sus yieun des bord
A droite ou à gauche, nou n'l'y f'ra pon d'tort,
Et avec les sous qué nou puourrait collecté,
Pour unne belle pierre pour pouvé monté
La belle statue, dé tchi ou vos vantais tant;
Acatais n'en yieunne de Pierson, vaut autant
De trais, en faith' unne buonne; car pour ch'ty là,
Chest ben honteus qué dans not' île y n'y a
Que deusse trais mots, dans la vieille Eglise
Pour dith' qui perdit la vie. Dans unne crise
Coumme not héros se' trouvi -
Y fit ben sen dévé, et y sauvit Jerri.

Si man plian pouvait seul'ment réussi;
Nou puourrait tout d'même et sans gêne
Crié dé buoun tcheu: "Vive la Reine!"
Vive la memoithe de "Don" et des Grandes Routes!
La chenne du Majeur, tchi mins en dêroute -
Dans ben p'tit d'temps,
Tuous les Normands.
Et pis "Vive de Ruoi Doré" du Vieir Marchi!!
Mousieu Falle ne se gên'nait pon à l'avnin,
Des pierres qui voudraient mettre dans san gardin.

Y n'en dit pon pus long; le jour quémenchant à s'faithe,
Les coqs chantaient... il 'tait temps dé traithe;
J'avais biau être êmervillhy
D'avé ouï lé Ruoi pâlé coumme un Avoca',
I' me fallu ben vite filer hors dé là,
Quoiqué jé m'sentais tout êquochi....
Car j'avais perdu ben du r'pos,
En revnant la gneit de d'vant, des Ecréhos.
Fallait ben oquo tout de même, gabathé,
Jusque dans le fond du Buoulai;
Je fut deux heuthes, à peu près
A m'trainné jusque ès Augrès.

WHA! WHA!!

Nouvelle Chronique de Jersey 21/8/1889