Saint Patrice fut nommé Patricius par ses pathents Romains et nou n'sait pas s'i' fut né en Êcôsse, lé nord ou lé seur-vouêt d'Angliétèrre, ou même au Pays d'Galles, duthant lé chînquième siècl'ye.
Quand i' 'tait janne, i' fut enlevé pouor être escliave par Niall des Neuf Ôtages qui lé prînt à Antrim où'est qu'i' fut acaté par un fèrmyi pouor garder ses brébis.
Duthant siêx ans i' d'meuthait sus la montangne nommée Slemish et comme les conditions 'taient difficiles et duthes, i' trouvait confort dans sa fouai du Bouôn Dgieu.
Eune niet, eune vouaix li dit à êcapper en baté, qui l'attendait à Wexford pouor aller en Angliétèrre.
Au c'menchement, lé cap'taine r'fusit d'li donner eune travèrsée mais auprès ses priéthes l'êtchipe décidit d'accepter Patrice.
Duthant ses missions en Angliétèrre, i' fut prîns par des brigands qui lé fîtent acouo un escliave. Mais Dgieu li dit " Ou né s'sez qué deux mais siez ieux" et souaixante jours pus tard, i' fut libre et pis i' pâssit sept ans d'viages en Ûrope pouor décider san destîn.
Êventuellement, i' chouaîsit à dév'nîn un sèrveux dé Dgieu et fit ses êtudes au Monastéthe dé Lerin en Gaule.
I' r'vînt en Angliétèrre comme prêtre mais quand il entendit eune vouaix Irlandaise dans un rêve li d'mandant d'rentrer siez ieux acouo, i' crut qué l'întention dé sa vie fûsse à convèrti l's Irlandais à la Chrêtchienneté.
I' l'fit en quat' chent trente-deux AD auvec les mots d'Jésû Christ, et lé trêfl'ye comme exempl'ye dé la Sainte Trinneté.
Sa Fête est célébrée lé dgiêx-sept dé Mar. Bouonne St. Patrice à nos anmîns Irlandais et ès anmîns d'Irlande!
Ralph Nichols. Édité par Laurie Huëlin.
Viyiz étout: