à Portinfé,
Saint Ou.
Moussieu l'Editeu
Dans l'mitan d'la matinée j'ai rencontré la Merrienne dans l'bel, et ou riait comme une perdue. “Vé-t'en Ph'lip”, ou dit, “et j'm'en vais t'montrer tchiquechose qu'tu n'avais jamais veu. Bein seux, comme mé, tu t'en vas t'êgouffer d'rithe.”
J'la suivit jusqu'au poulaillyi, et, Moussieu, oulle avait raison, car dans yun des nids not'e vièr coq 'tait êtrav'lé, comme une poule à couë. Ch'tait vrai que j'n'avais jamais veu ditet d'vant, et ch'tait vrai étout que j'n'pus pas m'empêchi d'rithe. “Mais, Merrienne”, je m'fis, “tchèsque chonna veur dithe? Ch'est yunne de tes farces, ma vielle”.
“Sûs un sens, vèthe”, ou dit, “mais pas tout-à-fait. Tu vé, Ph'lip, lé pouôre anima s'etait fait ma à une gambe et pouvait à peine sé t'nin d'but. J'ai creu tchi s'sait pûs confortablye comme il est, et i' f'tha tchiquechose d'utile en même temps, car sous li y'a treize oeux qué j'ai empruntè d'la Liza, et j'n'ai pas d'peux tchi les aband'donna, car lè pouôre balloque est êstropié.”
“Mais, Merrienne,” j'li dis, “quand les pouochins veindront, i trouv'thont chonna bein drôle”.
“Ses femmes s'sont là pour li aidgi,” ou dit. “Dans l'entretemps i' faut arrêter à vaie tchèsqu'i' s'arriv'tha. Mais à ch'teu, Philip, j'avons tchiquechose de bein pûs sérieux à distchuter. Tout l'monde a liut pour chutte réunion de chais Indépendants, et j'savons à ch'teu pûs ou mains ouèsque j'en sommes.”
“Quant à mè,” j'li dis, “j'n'y vais qu'bliâse. J'vais qu'les Indépendants ont formé une société politique, et qué l'Colonel Northey est président”.
“Mais tchèsqu'il est, chu Colonel?” ou d'mandit. “D'meuthe-t'i' à Saint Ou?”
“Oui,” j'li dis. “I' d'meuthe à la Botell'rie, et nou m'dit tch'il a la langue bein pendue”.
“La Botell'rie,” ou murmuthit, “Deux d'mes oncyles et yunne de mes tantes d'meuthaient là autfais, et dans les trais i' n'y'avait pas une tête tchi n'tait pas à maintchi cratchie”.
“Y'en a d'chutte sorte-là dans d'aut'es parties d'la pâraisse au jour d'agniet,” j'li dis, “mais as-tu veu què l'Avocat Crill est pour présider ès réunions, et que l'Avocat Giffard est étout yun des membres?”
“Bein seux j'ai veu chonna,” ou dit. “Quant à l'Avocat Giffard, il est comme san pèthe et san grand'pèthe, mais lé Peter Crill m'a hardi surprint. Pour un temps nous en criyait hardi, mais i' m'semblye qu'en vieillissant il a prînt un assez drôle dé qu'mîn. Je n'sais pas tchèsque san pèthe éthait dit dé tout chonnechîn. Je n'le vais pas membre de chais Indépendants. Il avait trop d'avis pour ditet gniolîn”.
“San pèthe, j'll dis, “tait un Jêrriais d'une trempe tch'a prèsque dispathu, malheutheusement. Nou soulait dithe qué dans l's Etats i' 'tait tréjous contre le progrès, mais i' n'objectait jamais à des m'suthes raisonablyes. Si j'en avions méme une demié-douzaine comme li dans la Chambre agnièt, nou n'vêrrait pas tant d'folies. Mais enfin, Merrienne, as-tu êtudié lûs programme à chais Indépendants?”
“ J'l'ai étudié à tête r'posée,” ou raîponnit, “et toutes les fais qu'j'y pense j'si pûs amûsée. À qu'menchi ch'est lûs idée dé trouver des candidats quand y' é tha des vacances pour Sénateurs ou Députés, mais j'n'si pas seuze s'i' contestéthont hardi d'êlections dans les pâraisses dé campagne. I' s'sont pûs intérrêssi dans la Ville. Chein qué j'voudrais vaie, mé, ché s'sait une êlection pour Connétablye et une aut'e pour Député ichîn à Saint Ou, mais j'crains qu' ch'est trop à d'mander. Avec chonna, si chu Colonel Northey a l'couothage de ses convictions, i' dév'thait oppôser lé Jim Lé Bro ou l'Mâjeur d'Gruchy. Nou n'voudrait pas craithe qu'un Colonel d'mand'dait à d'aut'es chein tch'il éthait peux d'faithe li-même”.
“Y'en a d'aut'es,” ou dit, “les membres du comité, par exemplye. Lé Peter Crill, nou sait, est candidat pour Sénateur”.
“Vèthe,” j'li dis, “mais j'n'crais pas qu'chutte dernié dêmarche y'a fait grand bein, et pis, y'avait une lettre dans la gâzette tchi n'avait pas 'té êcrite par yun d'ses amîns. I' pathait qu'les candidats Indépendants éthont à promettre tch'i' finithont lûs tèrme s'i' n'crèvent pas d'vant, et y'en étha tchi trouv'thont drôle qué Peter Crill, ne l'ayant pas fait li-méme, peut trouver l'temps à ch'teu de sé r'méler dans la politique. J'crais tch'i' pouôrrait trouver chonna un mio difficile à explitchi”.
'Y'a une autre chose. Ph'lip” ou s'fit. “Les candidats éthont à promettre dé faithe comme lé comité lûs ditha. Une fais êlus, i' né s'sont pas libres de voter comme i' voudraient. Crais-tu qu'y'étha des femmes parmi lûs candidats?”
“J'en doute,” j'li dis, “car lé comité n'sont pas sans saver qu'une femme tcheint à sa promêsse aussi longtemps comme ou voudra, mais pas une minute dé pûs. N'té mârri pas, Merrienne, car tu sais qu'ch'est la véthité. Y'a d's exceptions, bein seux, et j'n'voudrais pas dithe que tu n'en est pas yunne.”
“Aussi bein pour té,” ou dit, “et laisse-mé t'dithe qu'les femmes ont pûs d'avis qu''l's hommes en êffet de chein tch'ils ont promînt. S'i' trouvent tch'ils ont fait une mêprînse ils ont l'couothage de l'admettre”.
“Pas tréjous,” j'li dis. “A not'e mathiage tu promînt d'm'obéi, mais jamais tu n'l'as fait, et tu n'a jamais admînt qu'tu avais fait une mêprînse en promettant chonna”.
“Man pouôre Ph'lip,” ou dit, “ouésqu'est la femme tchi dit qu'ou lé f'tha sachant tout-l'temps qu'ou n'lé f'tha pas? Bein seux y'a tchiques imbéciles tchi prennent lûs promêsses sérieusement, mais pour la pliupart ch'n'est pas d'même. Dis-mé, Ph'lip ouèsque j'en s'saimes au jour d'agniét si j'avais trejous fait accordant à ta volonté et tes idées?”
“De pis qu'tu veur saver,” j'li dis, “je si seux qu'aniet jé s'sais Juré-Justicier, et té, tu'îthais dîner siez l'Governeux en robe de souaie.”
“Et mé,” ou dit, “j'si seuze qué j'éthions 'té vendus y'a longtemps. Té, tu s'sais a rabilyi les routes, et mé, si j'tais ocquo en vie, je s'sais et avec Les P'tites Soeurs des Pauvres? R'mèrcie la Providence pour une bouonne femme, man Ph'lip!"
Ph'lip
Evening Post 11/6/1960
Viyiz étout: