Quand nou d'meuthe au mitan d'la Ville, à deux pas d'l'Hôpita, nou-s'est accouôteunmé à toutes les bénites sortes dé brit: la piaill'lie d'ambulances et d'vaituthes dé police ou d'la brigade, la ronn'nie d'trafi, la criâd'die des gens en sortant bidéouinnes d's aubèrges, sans pâler des vaîthîns, d'lus télévisions, d'lus mûsique et d'lus partis. Par bordée même, j'n'èrgrette pon trop qué j'ouais haut d'eune ouothelle achteu... mais au mains siez mé i' n'y'a pon d'bourdonn'nie mystéthieuse coumme la cheinne à Saint Ouën.
Si chu brit încomprannabl'ye n'veint pon d'la vielle à rigdonner, car nou sait qu'lé Rigdon est en mé là-haut, ou du sablion tchi s'entre-tressonne, ou des Dgèrnésiais tchi sont à lus êcapper d'siez ieux en tonnelant souos Grosnez, i' faut qu'i' y'ait eune aut' explyicâtion.
Nou-s'a suggéthé qu'lé Canon d's Îles est êmoûtchi par du mouvement séismique souos la mé, et ch'est l'brit dé p'tits trembliéments d'tèrre. Si ché n'tait qu'nou ouait l'Canon pus à co en Êté nou-s'éthait dit qu'ch'est l'rotchi à grénotter.
Lé Touothé d'Saint Cliément, li, avait eune explyicâtion géologique - un creux dans un rotchi dans tchi l'ieau dêgouglonnait en faîthant un brit êffrédolant.
Mais la bourdonn'nie d'Saint Ouën n'est ni canon ni touothé - et j'éthais des grandes doutanches, mé, s'ou m'dîthêtes qu'ch'tait un ênorme êssaim d'bourdons. Nan, les gens sont pus à co d'avis qu'ch'n'est pon d'tchi natuthel - ou même susnatuthel. Ch'est-i' d'l'êlectricité? Ou j'avons-t-i' à bliaûmer les mâts d'êtrueûl'lie ès téléphones dé pouchette? Chu brit, ch'est-i' qu'i' veint du grand par à moulîns à êlectricité qu'il' ont mâté dans l'Cotentîn?
S'lon un vièr diton, "Femme tchi caqu'te et poule tchi pond font du brit dans les maîsons". Tout coumme ché s'sait mithacl'ye si ch'tait des femmes à bourdonner d'même. Et ch'n'est pon les ponn'rêsses nitout, car nou n'vait pon des mouochieaux d'oeux - sénon tch'i' y'a tchitch'un à Millais tch'est à fricachi des divèrsément grandes om'lettes et né v'là l'originne du brit - ch'est d'la fricach'chie d'om'lettes.
Lé conmédgien Angliais Eddie Izzard, li, avait proposé la raîson pouortchi qu'les cattes ronnent: ch'est qu'i' sont à drîlyi pouor d'la pétrole et i' daivent mastchi l'brit d'la dril'lie.
Des cats, des mâts, des moulîns, ou des câssetroles? Dgieu mèrcie qué mé, jé d'meuthe tout trantchil'yement en Ville!
Geraint Jennings
Viyiz étout: