Qu'la Suède avec ses allumettes
S'faufille en touos temps, siez touos nous,
J'n'en dithai rein, mais: clarinettes!
Qui v'nez d'Allemagne, oh, modéth'-ous!
Qu'j'ayons du beurre et des oeufs d'France
Et d'la caboche et des oignons
J'ne m'marris pon; mais tchi souffrance
D'ouï ches All'mands et lus violons!
J'sis pour "Free Trade" - ah! la bell' cause!
Mais dam! y'a d'tchi que j'n'admets pas:
Qu'l'All'magne exporte autchune autr' chose
Mais qu'sa "band" reste à jouer la bas!
Une heuthe ils ont 'tè souos mes f'nêtres!
Coumment êcrithe un seul local??
Ah, ches pendards! ah, fichus traîtres!
Coumme i' méthit' de finir mal!
J'en sis à bu, mes ouïes en cônent,
Mais coumm' si ch'la n'tait pon assez;
Le grand long joueux du grand trombône
Entre et m'met san chapè souos l'nez!!
Mardi 5 ½ heuthes.
Elie
Nouvelle Chronique de Jersey 23/3/1910
|
