Dépis bein des siècl'yes les dgiêmes ont 'té levées auve forche dé louai sus l's habitants d'châque pâraisse. Eune dgiême, aut'fais payabl'ye en espèces, était deue qué ch'fûsse au bénéfice dé la Couronne ou au bénéfice ecclésiastique.
Les fèrmièrs dévaient des dgiêmes, les monnièrs, etc. Touos les Minnistres d'pâraisses èrchévaient don lus part dé dgiêmes. Mais i' pathaît, d'après eune légende, qu'un cèrtain Moulîn d'vait des dgiêmes pas à l'églyise, mais au Dgiâtre li-même. Ch'la ch'tait bein èrmèrquabl'ye, mais pèrsonne n'en savait la raison ni l'originne.
Lé Moulîn' à vent sus Vèrcliut, connu comme Moulîn d'Vèrcliut, lé Moulîn d'Grouville, ou l'Vièr Moulîn, dait absolument êt' bein vyi. Car ch'tait là, l'moulîn tchi d'vait chutte dgiême extraordinnaithe, et ch'la sans doute es'sait du temps qu'les anciens éthaient connu l'Malîn en pèrsonne. Lé monnyi du Vièr Moulîn avait don à payi la dgiême sus tout l'fronment moulu dans san moulîn, et chutte dgiême sé payait rédguliéthement à cèrtains temps. Un bouôn jour lé monnyi, tch'avait tréjous pensé qu'les dgiêmes 'taient deues à cause dé tchiques sèrvices rendus, s'mînt dans la tête tch'i' n's'n allait danme pon payi rein d'autre au Satan, un îndividu tchi n'avait janmais fait rein pouor méthiter ch'la.
Eh don, la préchaine fais qué la dgiême d'vînt payabl'ye au Dgiâbl'ye, lé monnyi n'fit autcheune dêmarche pouor s'en atchitter. Et laîssit l'affaithe dé-même pouor longtemps. Mais l'Satan, li, s'enn'yit d'attendre et voulit saver tch'est qu'ch'la voulait dithe. Lé monnyi n'en fut pon êpeûthé du tout et lî dit dêliêment tch'est qu'en' 'tait et tch'est tch'il en criyait. "Tu peux sûfflier, man vyi, pouor ta dgiême - tu n'en r'éthas pon d'autre dé mé, tréjous! Tch'est qu tu'as fait, né v'lo un an, tchi méthite chenna? Tu n'as fait rein d'bein!" Et i' lî freunme l'us au nez!
Véthe, mais - faîthant sèrvi san pouver comme un malîn esprit, lé Dgiâbl'ye pâsse à travèrs la porte et adrèche ches deux'trais patholes au monnyi: "Dépis qu'ch'est d'même, vai-tu - tan moulîn n'èrmoudra janmais janmais! Sait-che par un temps rude ou calme, tempête ou brise - n'împorte en tchi temps - les aubes dé tan moulîn n'èrbouog'geont pas! "
Et, d'après la légende, nou-s-a tréjous ouï qu'autant en a 'té. Lé Moulîn d'Vèrcliut n'a janmais r'moulu.
Par Geo. W. Bertram
Viyiz étout: