D'pis qu'j'avons r'nonchi a la succession d'chu milliounaithe Améthitchin, et qu'nous a r'prins san p'tit boulant coumme d'amor, y'a coumme eunne impression de tristesse sus not' mênage. Ch'est i drole? Che n'tait qu'pour rithe que l'Editeu nos avait fait faithe touos chès cartchulles la: eh bin! I'créthait non, nos gens s'etaient moniéthement mins dans la tête que ch'tait pour de bon. Pour un mais d'temps, j'avons coumme tchi ditait rouolé dans l'or. J'avons puchi des louis au tas; puche et puche oquo! et a ch't'heu nous est coumme èspithotés de se r'vaie a gages sus eunne gazette.
Pour quant a mé, j'vos asseuthe que j'peux met la main gauche sus l'éstouma d'man fro d'indjienne, et dithe avec Zacharie: "Eunne crote de pain là ou-ès qu'nous est touos d'accord vaut mus qu'un Palais parmi des nâdjeurs." Mais ch'est difféthent pour ma fille qu'est oquo trop jeunne pour avé fait l'éxpéthience que les plaisiers de la terre – ch'n'est que d'la chendre. Ou rumine hardi, ma pouore Lonore. Ou rumine trop et n'pâsle pas assez! Ou reste a r'gardé les ribans d'san chapé qu'ont té dèsteints par la plyie; ou soupithe endrét sa blouse tchi crochte en d'vant quand la mode est d'crocheté en driéthe; ou n'veurt pon vaie san bouan fro viyant qui n'est pon fendu sus l'coté; ou r'fuse de marchi a pid d'pis qu'il a 'tait fait mention d'eunne p'tite carosse a âne. Ou n'trouve rin d'sen gout, et n'veurt même pas chanté la sgonde au cantique du sé.
Mais èsmoques té don, ma pouore Lonore, que j'lis dit toutes les demi-heuthes. Chante, saute, ris, trimousse té, fait tchiq chose; mais n'reste pon là coumme eunne èsmanus a r'gardé les moques se torchi l'sailes avec lus gambes!
Et Piteur, lî: d'pis qu'y'a yeu mention d'hytres, de vin, d'café, et d'boutelle de tchiq' chose sus l'drécheux, n'a pas eunne bouonne patholle a nos dithe. I' hênique sus tout ch'que j'lis couq! La mouothue est tralée, l'pain est halité, la soupe ch'est du ouache: i' s'mint en coléthe hier au sé viyant qu'y'avait du mouêzi sus la glée!
Ch'est pitchabye! Ne v'la not' "home" shens-d'sus-d'sous, simpliément pour avé supposé que j'taimes riches: tchès que ch'sait si nou y'était pour de bon? J'en frémis d'jour, et la niet j'en sis engroutée.
Mais ne v'la les bieaux jours qui s'appréchent! Bétot l'Solet litha, les sycomores pous'ont, les p'tits ouêsieaux chant'ont, et la terre pouss'a san get, coumme ou fait touos l'sans dans l'temps du vréch: j'rumine un plian d'emné Piteur et Lonore dans la Campannne flieuthie. J'emportéthais eunne bouochie dans un ponnyi, nou s'assiétha dans un clios, souos un poummi en flieur, Lonore se f'tha un collyi d'mérgots coumme quand oul 'tait en court, Piteur me tchiendra la main coumme quand j'taimes engagis; et nou r'vindra tous coumme des p'tites clioches ensembye.
LAIZÉ PAIN
25 dé Févri 1914
Viyiz étout: