La pathole du Seigneu d's armées m'èrvînt et m'dit: lé Seigneu d's armées dit chennechîn: J'sis mârri pouor l'av'nîn d'Sion, j'sis mârri pouor li d'eune grande mârrisson. Lé Seigneu dit chennechîn: J'sis d'èrtou à Sion et jé d'meuth'thai à Jérusalem et Jérusalem es'sa app'lé la ville dé bouonne fouai et l'mont du Seigneu d's armées lé mont saint. Lé Seigneu d's armées dit chennechîn: Y r'étha des vièrs et des vielles assis dans les pièches dé Jérusalem, châtchun sa badgette à la main viyant sa vieillèche, et les pièches d'la ville es'sont remplyies d'moussetchots et d'moussetchettes à jouer. Lé Seigneu d's armées dit chennechîn: Si ch'est un mithacl'ye pouor chein tchi reste dé chu peupl'ye, ché s'sa-t-i' un mithacl'ye pouor mé, dit l'Seigneu d's armées. Lé Seigneu d's armées dit chennechîn: Viy'-ous, jé s'sai l'saûveux d'man peupl'ye d'l'Êst et d'man peupl'ye du Vouêt, et j'les amèn'nai à seule fîn qu'i' d'meuthent à Jérusalem, et i' s'sont man peupl'ye à mé, et jé s'sai lus Dgieu en bouonne fouai et justice. Lé Seigneu d's armées dit chennechîn: Qu'vos mains saient fortes, vous tch'êcoutez achteu ches patholes ès bouoches des prophètes des jours quand nou mînt bas la fondâtion d'la maîson du Seigneu d's armées à seule fîn d'y fonder l'Templ'ye. Car d'vant chu temps-là i' n'y'avait pon d'louethie d'hommes, i' n'y'avait pon d'louethie d'bêtes, i' n'y'avait pon d'paix pouor l'chein tchi pâssait et r'pâssait, viyant l'enn'mîn, car j'avais émoûtchi du hèrtchîn entre les vaîthîns. Mais achteu jé n's'sai pon ès gens tchi restent coumme j'tais au temps pâssé, dit l'Seigneu d's armées. Car par la sèm'thie d'la paix, la vîngne s'en va donner du frit et la tèrre s'en va donner s'n avoût et l'ciel s'en va donner sa rôsée et l'restant du peupl'ye s'en va héthiter tout chennechîn par mé. Et v'là tchi s'adonn'na Oh êfants d'Judée et êfants d'Israël qu'ous êtiez maudits parmi les nâtions mais qué J'vos donn'na man salut et ou s'sez bénis. N'ayiz pon d'peux et qu'vos mains saient fortes.