Rapin', rapin', rapine acquo!
Aguen', aguen', comme un pouor' fo!
En jouiras-tu après la mort?
N'en as-tu pon desjà assaïz
De ches herpins bein entassaïs?
N'est-t'i pon pliein ton coffre-fort?
Ne vait-tu pon la veuv' tchi plieure
Et l'orphelin tchi rest' sans d'meure?
I faut qu'tu sais bein endurchi.
Le pouor' mendgiant tchi frappe à t'n hus,
Mouorant de faim, n'en est pon d'mus,
Tu n'as ni pitchi ni merci.
“I y en a tch'ont la consciench' ronde,
D'autres l'ont carraïs dans chu monde,”
Un' bouonn' femm' me dit un' fais:
I l'a bein rond' le rapineux;
Et ou' dait boullé bein j'sis seux,
Car ou' n'le trouble pon jamais.
L'or est son dgieu, l'argent s'n'idole,
Tout sentiment i lus immole
Sus sen autel en sacrifice:
La moindre chos' li fait trimeu;
I n'peut dormi ni niet ni jeu,
De peux que nou n'les ravisse.
Nou dit que sen fils Nicolas
Tch'en hérit'ra à son trépas,
Va desjà pus vit' que ses ch'vaux;
I desmouaisira les herpins;
Et jusqu'à c'que tout sait ès qu'mins,
I n'era pon vraiment de r'pos.
Heureux ch't-i-là tchi donn' du pain
A chez pouor's malheureux tch'ont faim;
I s'ra au ciel rescompensaï:
Un verr' d'geau fraide à cheux tch'ont sai,
Un habit caud à cheux tch'ont fraid,
Ne s'ra pon nitout oubliaï.
Viyiz étout: