Tchil amas d'nâtionnalités en Jèrri! J'avons des Jèrriais, bein seu, et d's Angliais et d's Êcossais et des Gallouais et d's Irlandais. J'avons mains d'Français qu'au temps pâssé quand un fliotchet d'Brétons soulaient v'nîn travailli dans les clios. Mais achteu j'avons des Portûndgais et des Polonnais et des gens d'aut's pays tchi trouvent du travas ichîn.
Assa, Jèrri est coumme les Nâtions Unnies et nou-s'a don parfais d'la diffitchulté à trouver lé bouan mot en Jèrriais pouor l'originne dé ches gens.
Coumme dé raîson, j'avons des mots pouor les Villais et les St. Louothachais et les Trinn'tais et les gens d's aut's Pâraîsses, et quand les fanmil'yes Jèrriaises d'meuthaient dans eune même pliaiche pouor des généthâtions nou pâlait pustôt des Rôzelais, et des Landîns, et des Mathiens, et des Faldouais, et des Mouaîtîns, et des Rotchais, et des Gouôrrelais....
Et nou connaîssait étout les Mâlouîns, et les Hadgais, et les Coutanchais, et en viageant nou rencontrait des Londronnais, et des Bastchais, et des Tchubécouais, et d's Afritchains, et d's Îndgiens, et des Chinnouais.
Mais achteu lé monde entchi est l'beinv'nu en Jèrri et j'viyons des touristes Suèdouais, des bantchièrs Russes et d's ouvrièrs Kényans, et par les c'mîns y'a des Stockholmais, des St. Pétersbourgeouais, et des Nairobiens – sans pâler des Belfastchais, des Glasouédgiens, des Strasbourgeouais, des Cortchais, des Varsoviens et des Helsîntchiens.
Véthe-dgia, j'avons un amas d'nâtionnalités en Jèrri – j'avons même atchilyi tchiques Dgèrnésiais!
Geraint Jennings
Viyiz étout: