|
I paraît qu'siés Tom Larivet, Le sien qui d'meur' à la Trin'tet, I vainn'nt ettout d'fichi d'côtet Chut' belle lumièr' du temps pâset – Qu'iétait brîyante comme le solet, Et qu'nou pendait près d'sa fouêt d'vret – Ch'est-à-dir', lecteurs, lus CRASET. Ah! faoût-i qu'nou'z entênje ditet! À ch'qué n'ou m'dit, les filles en grinn'nt; Et, sans doute, touos mes lecteurs d'vinn'nt Qu'ach'teu n'ou vé dans lus quîzinn' Iunn' de ches inventions malinnes Qui sont app'lets des Paraffinnes. Ditets changements sont maoûvais sinn'. Mon doux, les femmes sont v'nus bain finnes D'pis qu'ils ont portet crinolinn'! Entre nous viers j' sommes en m'zespé D'vée tréjous quiqu' chôze de nouvé, Et les vielles couôtummes s'en allé. J'sommes sans cesse à nos lamenté D'entendre l'z'avers mêprîzé Tout chain que j'viyemmes de pus bé. O vous viers! v'nêts vos joindr' à mé: Pour le r'tou d'nos temps faoût prié! J'rêtabyirons les bouâns viers temps: Dans toutes les maîzons, comme dévant, Les Crâsets r'séront triomphans – Les neuves lampes enviets ès quat' vents. Rêjouissous auve mé, O vielles gens! Faoût l'vé ensembl' un jouoyoeux chant! – J'allons confondre nos êfans Et mettre' fin à touos les changements!
L'Hermite du Nord |
Viyiz étout: