Dans l'dèrnyi journal dé la sociêté tchi s'otchupe dé l'histouaithe des fanmil'yes des Îles d'la Manche, y'a un rapport d'eune tragédie tchi fut publié dans la "Chronique dé Jèrri" lé trente dé Juilet en mille huit chent quarante quatre. I'pathaît qué dé bouonne heuthe lé matîn du mardi dé d'vant lé cotteur le "Laurel' (tchi veurt dithe louothi en Jèrriais) avec lé Captaine Jean Pallot en chèrge a fait vaile dé Gouôrray avec eune partie dé dgiêx-neuf pèrsonnes et s'n êtchipe pour coper et ramâsser du vrai alentou d' "La Conchiére" eune barre dé rotchi tchi s'trouve à bein près chîn milles dé Gouôrray. Arrivé au rotchi les vraîtcheurs fîtent sèrvi des p'tits batchieaux pour sé trouver sus les rotchièrs pour coper lé vrai. Lé vent dans l'entré-temps avait gângni d'la forche et un membre dé l'êtchipage a suggéthé dé bouogi lé cotteur à l'autre bord du rotchi pour qu'i' sait pus à l'abri, mais l'Cap'taine Pallot dit qué ché n'tait pas nécessaithe. Vèrs trais heuthes eune bouffée d'vent poussit le "Laurel" contre lé rotchi et il a c'menchi à prendre ieau et dans raidé d'temps i' s'est rangi sus l'fond. Avec quatre hommes et quatre femmes dêjà sus "La Conchiére" lé Cap'taine mînt acouo siêx pèrsonnes sus l'rotchi, tchi 'tait liain d'être engolfé par la mé. Un homme et eune femme chouaîsîtent dé rester sus le "Laurel' il' eûtent à saîsi les vailes pa'ce qu' lé baté même 'tait souos l'ieau. Ch't' événement fut apèrchu d'La Rocque par Moussieu Ph'lip Marie avec eune longue-veue i'pouvait vaie du monde sus "La Conchière" tchi lus t'naient par les mains en formant un rond. I' ramâssit san fis et deux anmîns, i' lanchit san baté et navidgit vèrs "La Conchière", la mathée montait rapidement et par lé temps qu'il arrivîtent, tout l'monde avait 'té lavés hors de d'ssus lé rotchi et 'taient n'yés. I' navidgit éyou qu' lé cotteur avait enfoncé avec lé haut des mâts et les vailes tchi n'taient pas couvèrts par la mé, i'vitent Moussieu Jean Cârré et Madanme Rom'thi tchi s'taient cramponnés ès vailes pour trais heuthes. Quand i' vîntent près du "Laurel', Madanme Rom'thi sautit à l'ieau pour êt' sauvée mais ou dispathut dans les louêmes. Moussieu Marie criyit à Moussieu Càrré d'attraper eune corde tch'il allait lî pitchi, mais lé pouôrre Moussieu Cârré n'avait pas assez d'forche pour l'attraper et tchiyit à l'ieau et fut n'yé étout. D's autres sus un aut'rotchi avait halé un des p'tits batchieaux hors de l'ieau, un d's hommes tâchit d'lanchi l'baté mais i' fut bûchi en morcieaux contre lé rotchi et i' pèrdit sa vie. Lé Cap'taine Pallot rêussit à am'né chîn pèrsonnes dans deux batchieaux à tèrre, mais i' tait trop êpuisé pour aîdgi d'autre. A l'entchête nou trouvit qu'au mains tchînze pérsonnes avaient 'té n'yées et qu'les corps avaient 'té trouvés tout l'long d'la côte du sud dé l'île et même jusqu'à St Ouën. Moussieu Philip Mollet tch'avait prîns eune autre partie dans san cotteur racontit comment qu'il avait 'té têmoin d'la tragédie et avait j'té sa cartchaîson d'vrai dans la mé pour tâchi d'aller au s'cours, mais la mé tait si rude et la mathée montait si rapidément qu'i' n'avait pon ieu d'succès. Moussieu Philip Hutchet, iun des sûrvivants, dit qu'i' pensait que Cap'taine Pallot avait bu dé trop. Moussieu Coutanche confirmit qué l'Cap'taine Pallot tait soûl et s'il avait prîns l'avis dé bouogi le "Laurel" à l'abri i' n'y'éthait pon ieu de tragédie.
Oscar Chevalier
Viyiz étout: