Fort Lauderdale, Florida,
USA.
Lé 21 dé janvyi, 1978.
Moussieu l'Rédacteu,
J'tais ravi d'liéthe, dans la gâzette du 28 d'octobre, 1977, tch'i' n'y'avait pon grande espéthance d'aver un minnistre pour l'Eglyise dé Gouôrray, tch'est si liain d'l'Eglyise Parouaîssiale qué nou créthait qué l's autorités ecclésiastiques éthaient l'avis d'faithe autcheune chose pour la garder en allant pour l'ûsage des Gouôrrelais. Mais né v'la chein tchi s'arrive quand ch'est d'Angliétèrre qué nouos affaithes écclesiastiques sont gouvèrnées.
Heutheusement, lé Canon Wade, Président dé l'Associâtion de Minnistres Ertithés, est prêt à aîdgi les Gouôrrelais à trouver un Minnistre Dessèrvant pour ieux, comme i' nouos l'est annoncé dans la gâzette du 4 novembre. Chose întérêssante est qué Mdlle. Virginia Wade, fanmeuse championne du “tennis” et fille du Canon Wade, 'tait à deux-s'trais milles d'ichîn la s'maine pâssée à jouer dans lé “Virginia Slims Tournament” à Hollywood en Floride. Malheutheusement, ou n'gângnit pon l'preunmié prix, mais ou n'en 'tait pon bein liain, et ou nouos montrit à Wimbledon l'année pâssée qu'oulle est ieune des championnes du monde. J'espéthe qué san p'pèe pouorra aîdgi à trouver des minnistres pour St. Simon et St. James étout. Ches jours dé crînmes, troubl'yes et vandalisme, j'avons grand bésoin d'garder nouos églyises en allant à la pliaiche dé les freunmer.
L's aventuthes du Sieur Nigel Jee d'Dgérnésy, quand il acatit sa preunmié vaque et êprouvit à la traithe dans l'mitan du clios, comme i' nouos l'est raconté dans la gâzette du 28 d'octobre, mé ramémouaithe m's aventuthes dans les rédgulièrs dans l'temps d'la dgèrre dé 1914-1918. J'avais tréjous voulu aller à j'va, ch'est en tchi j'm'engagis dans l'Artill'lie Rouoyale dé Campangne (Royal Field Artillery), tch'était à j'va dans chu temps-là.
Man bouanhomme! J'n'avais autcheune idée qu' eune “Ecole d'Equitation” d'armée 'tait eune tortuthe pour lé pouôrre dgiâtre tchi n'avait janmais 'té à j'va. J'm'en appèrchus la preunmié fais qu' j'entris dans l'grand pavillon d'l'êcole. Les j'vaux, p'tits et grandes, 'taient rangis des deux côtés du pavillon, faches à la muthâle. Les sèrgents înstructeurs d' “équitation” 'taient empruntés des fanmeux régiments d'caval'lie dé Dragons, Housards et Lancièrs. Il' 'taient agiles et pus accouôteunmés à êt' en selle qu' à pid, et il' avaient des longs fouëts tch'i' faîsaient cratchi comme des coups d'pistolet pour ênèrver les j'vaux à l'occâsion.
Les r'crus artilleurs et c'valièrs comme mé marchent et entrent dans l'pavillon deux à deux en draite lingne et arrêtent à l'ordre. Et pis veint l'ordre “outward face!”, tchi veurt dithe qué châque lingue fache lé driéthe des j'vaux. Lé préchain ordre est dé marchi au j'va tch'est endrait sé. Comme jé l'disais, les j'vaux sont grands et p'tits, et la pénibl'ye chose en est qu' un p'tit homme comme mé, tchi n'est qu' haut comme un pot d'cidre, sé trouve à côté d'un grand j'va tandi qu' un long et maigre êtendpèrque sé trouve à côté d'un p'tit. Et né v'la don la tortuthe tchi c'menche.
Quand veint l'ordre “Mount!” pour monter d'ssus, lé grand gas et l'chein tch'a 'té fèrmyi ou parmi des j'vaux toute sa vie, monte dêliêment et bein aîsiement. Mais mé? Sabre dé bouais et pistolet d'pânnais! Pas mouoyen d'monter sus man grand j'va, manque, sans doute, dé saver comme tchi m'y prendre. Mais criy'-ous qué j'eus d'la sympathie d'la part des sèrgents înstructeurs? Ah mon Doue namnîn! J'fus lé riditchule dé touos ieux. I' voulaient saver si j'avais oublié man chuchot et m'nichîdrent même d'aller qu'si eune êtchelle pour m'aîdgi à monter sus man j'va et finîdrent par m'y monter ieux-mêmes comme nou-s-y monte un êfant! Heutheusement qué jé n'tais pon l'seul en embarras.
Eune fais à j'va, sans selle ni brides, fallait trotter l'tou du pavillon, et la preunmié chose qué j'fis 'tait d'êprouver à happer la crîngne dé man j'va pour m'empêchi d'tchaie hors-bord. J'en ouï-t-i' don, des teurbleudes! J'tions supposés d'rester à j'va draits commes des pitchets et d'garder nouos bras auve les mains lieés driéthe lé dos. Comment qu' jé n'tchulbutis pon dé d'ssus chu bidet-là jé n'séthai janmais. I' prend du temps pour un c'menchant à apprendre à s'balanchi et êtreindre atout hanques et g'nouors à j'va sans selle, et dans l'armée d'chu temps-là i' n'y avait pon telle chose comme temps et sŷmpathie. Ch'tait tout disciplinne et vitesse.
Pus tard quand j'tais pus expert et qu' j'avais selle et êtrièrs quand j'tions à j'va, j'm'èrsouveins qu' eune fais en parade j'criyais qué j'èrsembliais au mains à Wellington quand j'ouis l'sèrgent înstructeur heurler: “Le Feuvre, dréche-té, don, pouôrre achocre - tu r'sembl'ye à un Napoléon encheinte!”
George d'La Forge
Viyiz étout: