Fort Lauderdale,
Lé 16 dé dézembre, 1978.
Florida, USA.
Quand j'sis dans man vièr Mênage en Jerri, j'pâsse souvent par Lé Pallion où'est qu' La Rue d'La Trape a san déha dans La Route des Landes, en m'en allant au Haut du Mont du Vallet, et v'la tchi m'ramémouaithe mes p'tits jours siez Papa L'Feuvre à la forge, tch'était à côté d'la maîson appelée "Mossgiel" à ch't heu.
Lé Pallion 'tait lé lieu d'rencontre pour touos les Landîns dans chu temps-là. J'pâle dé y'a eune huiptantaine d'années. Ch'tait eune pétite êtendue d'cruëthe en forme d'picachon. Les routes n'étaient pon pavées comme à ch't heu. I' m'sembliait tch'i' y'avait tréjous tchitch'un sus L'Pallion à toute heuthe du jour quand j'tais mousse. Dans l'jour ch'tait deux-s'trais anciens à bagouler et s'pâsser l'temps. Les pus près vaîsîns du Pallion 'taient les Sieurs Elie Maugi (du Pignon), Fraînque Coutanche, Darri L'Cornu et George Steuber (prononcé "Stioûbeutt" par les anciens). Ch'tait dans chu temps-là qué "Moreland House" fut bâtie mais jé n'mé r'souveins pon du nom du propriêtaithe tchi la fit bâti. J'la vînmes bâti, Papa et mé, en pâssant par là pour aller nouos assiéthe sus l'haut du mont en d'ssus d'L'Eta, et i' m'disait qu'oulle avait couôté chent louis, clié dans la grand' porte, tch'était considéthé eune pétite forteune dans l'temps, mais j'ai ouï d'pis qu'oulle avait actuellement couôté pus.
Au Dînmanche y'avait deux lieux d'rencontre, Lé Pallion et L'Haut du Mont du Vallet. Ch'tait les Jannes tchi hantaient L'Pallion et yavait toutes sortes d'gammes en allant. Ch'est pûtôt difficile d'înmaginner lé manque dé trafi dans les routes dé campangne dans chu temps-là, et y'avait tout pliein d'run pour jouer au tireli ou à doque et ès marbres.
Ch'tait là qué la mûsique dé "Guy Fawkes" s'assembliait pour pratitchi quand v'nait l'temps d'célébrer la fête et brûler la fouée, et ch'tait un temps d'excitement pour les mousses. Ch'tait l'Sieur Steuber tch'était l'maître d'mûsique. Quand nou ouiyait l'gros tambour au c'menchement des pratiques au sé, touos les mousses êprouvaient à faithe lus pathents les laîssi aller ouï la mûsique sus L'Pallion. Souvent les pathents finnissaient par y'aller ieux-mêmes. Quand y'avait un carnaval la séthée même dé "Guy Fawkes" tch'avait la mûsique en tête, ch'tait au Pallion qu' la procêssion c'menchait et finnissait.
Tchiquefais, les jannes hommes v'naient atout lus machinnes pour pédaler l'tou du Pallion. Ch'tait les cheinnes tch'avaient eune reue grande comme eune reue d'hèrnais, atout la selle en d'ssus, et eune pétite reue d'la grandeu d'eune reue d'chûviéthe en driéthe, appelées "Penny-farthing" en Angliais viyant qu'la grandeu des reues avaient à bein près la même proportion comme un grand deuxsou à un liard. Mén oncl'ye Ouinn'teur et man P'pèe en fîdrent ieune dans la forge viyant tch'i' n'pouvaient pon affaûrder à en acater ieune. I' n'taient pon aisies à sé t'nîn d'ssus. I' fallait s'balanchi comme i' faut. Ch'tait r'mèrquabl'ye dé les vaie pédaler en vitesse lé tou du Pallion et êprouver à lus canter assez pour èrléver eune chique bas dans la route. Un tas tchulbutaient en y'êprouvant, et j'n'en vis janmais iun rêussi à l'faithe.
Dans des temps y'avait des disputes tchi finnissaient par des bastaudes sus L'Pallion, tch'était un si fanmeux rendez-vous qué ch'n'est pon ravissant si eune arlévée d'ardgûment finnissait par tchitch'un voulant s'battre, principalement s'il en avait deux d'goûts à bord. V'là tchi fit iun d'ieux penser à apporter des gants pour faithe la "boxe" et les garçons c'menchîdrent à "boxer" l's uns contre I's autres - à l'amiabl'ye, sans doute. Lé janne Jack Ellis, un frégatin (sa m'mée d'meuthait à La Ville La Bas), un bieau garçon bein plianté tchi savait s'mannier, pouvait battre autch'un aut' janne homme tchi voulait mett' les gants auve li. Mais il 'tait bouan garçon et n'chèrchait janmais chicange à pèrsonne.
Y'avait tchiquefais du divèrtissement quand les soudards (les rédgulièrs) v'naient tither au blianc ès Landes. Y'en avait tch'arrêtaient au Pallion quand i' viyaient la dgaingue là l'Dînmanche l'arlévée. Ouiyant eune convèrsâtion en Jèrriais, i' criyaient qu' les garçons n'savaient pon l'Anglais et pâssaient tchiquefais des r'mèrques tchi n'étaient pon complyimentaithes. Ouaithe qué la grand' partie d'nouos garçons n'savaient pon fort d'Angliais dans chu temps-là, il' en savaient assez pour comprendre si nou s'motchait d'ieux, et i' n'en fallait pon fort pour quémenchi eune bastaude. I' n'avaient pon d'peux d'eune rouoge câsaque, et les soudards né lus d'mentaient pon tch'il' avaient affaithe auve les d'scendants d'soudards dé La Milice Rouoyale tch'avait aîdgi à gângni La Batâle dé Jèrri en 1781!
Viyiz étout: