"P'pèt," m'dit Frankie l'aut' sé: "Tu m'avais promîns de m'raconter ta visite parmi les lêpreux dans l'pays d'Vénézuela!"
"Eh bein, man garçon," j'li dit: "Comme j'té l'disais l'aut' s'maine, not navithe arrêtit dans l'port tch'à nom La Guayra en r'vénant de Curaçao (tch'est dans l's'Indes Occidentales Hollandaises). De bouan matîn j'allis trouver l'chauffeux Espagno' tchi 'tait auve mé quand j'ramontis amont les Montagnes Andes pour aller à Caracas, la capitale du Vénézuela."
"J'lî d'mandis s'i' voulait m'cachi à la Lepros'sie dans san moto, et j'lî dis qu'eune fais là d'dans i' fallait garder san moto en allant pour êt' prêts à cachi pus liain sis les lépreux appréchaient trop près d'nous. I' faut prend' des précautions dans ches pays-là, car touos les négres (tchi sont trop piércheurs pour travailli) sont tréjous à vouos embêter et tcheûter pour des sou, et j'savais bein qu'les lépreux es'saient la même chose, bieau tch'i' n'ont pon grand' chance de dêpenser d'sou dans la lepros'sie."
"En arrivant à la porte dans la grand' muthâlle, j'bailli deux-s-trais "Bolivars" (lé "dollar" du Vénézuela) au Gardgein pour nouos laissi entrer, - et nouos v'là parmi les pouorres minséthablyes d'lépreux. La Lepros'sie est divisée en trais parties, - ieune a des maisons pour les cheins tch'ont des sou et tchi peuvent vivre à lus frais et aver d'aut' lépreux comme domestiques, - l'aut' est à san tout-seu pour les cheins tchi sont supposées êt' erdgéthis (ch'est douteux si jamais il' ont 'té lépreux, ches'là, mais il' avaient té mîns là-d'dans), - et pis un îmmense hopita."
"Les cheins tchi peuvent travailli sont à potinner dans les gardîns, et à sèrclier et brîngi et rât'ler les c'mîns ichîn et là, et à garder tout propre. Nou les vait auve lus chuviéthes et lus ôtis à faithe lus travâs comme nou verrait un gardîn'yi au Man'yi d'St. Ou, ou dans la Parade en ville."
"J'cachîmes le moto douochement, et quand l'y'en avait deux-s-trais ensemblye a tchiques pas d'nous, j'arrêtions à les r'garder. V'la tch'i' n'lû faithait pas chose viyant tch'il' 'taient bein contents d'vaie d's' êtrangièrs, - car i' n'sont jamais permîns d'sorti eune fais enfreunmés là-d'dans. I' n'en r'sortent jamais sénon les pids d'vant, - pour êt' portés à lû dreine démeuthe!"
"I' nouos pâlaient et nouos d'mandaient tch'est qu'l'y'avait d'nouvé dans l'monde, mais s'il' êprouvaient à appréchi trop prés, j'cachions un p'tit pus liain. D'même, j'vis les ravages de chutte tèrriblye maladie-là. L'y'en avait tch'avaient des daigts hors à la preunmyié jointe, l's' aut' l's'avaient perdus ès deuxièmes jointes. Ch'tait la même chose auve les cheins tch'étaient nueux pids. I' fait tréjous caud dans ches pays-là, et l'y'a hardi d'gens tchi' n'mettent ni cauches ni souliers. Les cheins tch'avaient perdu d's'ortés avaient des chiques le tou des pids. La maladie attaque l's'extrèmités. Dans les temps ch'est l'nez ou l's'ouothelles. J'en vis tch'avaient les nâthilles attatchies. Quant eune partie d'un daigt a tchaie, la ché s'erfait quâsi, mais i' reste tréjous un mio, grand comme la tête d'eune êpile tchi n's'erdgéthis pas, et v'là tch'erquémenche à grandi, et au but du temps eune aut' jointe dispathait."
"Quant j'eûmes fait l'tou, j'arrêtîmes à côté d'ieune des f'nêtres de l'Hopita, tch'était ouvèrte. Dans les lyits nou viyait les cheins tch'étaient trop estropiés pour marchi, et l'Docteu 'tait à met' un bandage au but du bras d'eune personne tch'avait perdu eune main au pouongnet."
"Mais, p'pèe," m'dit Frankie: "Est-che que les Docteurs n'ont pas trouvé d'la med'cine pour erdgéthi ches pouorres tristes-là?"
"Nannin, man garçon," j'li dis: "Mais i' peuvent arrêter la maladie, et i' l'font bein souvent. Il' ont dêcouvèrt que d'huile faite auve la séve d'un certain bouais des pays cauds est bouanne pour l'arrêter, et l'y'a des lépreux tchi vivent jusqu'à eune souoxantaine d'années et tchi meuthent de tchiqu' aut' maladie!"
"J'avais tant d'pitchi d'vaie ches pouorres créatuthes-là que j'tais bein content d'm'en r'vénîn à bord de not' navithe. La chose tchi vouos frappe le pus quand nou les vait est la pensée qu'eune fait dans la Léppros'sie i' n'en r'sortent jamais envie: Nou peut dithe que ch'est la maison des morts-vivants!"
George d'la Forge
Les Chroniques de Jersey 12/3/1949
Viyiz étout: