San Antonio, Texas,
U.S.A.
Lé 2 d'dézembre, 1972.
Moussieu l'Rédacteu,
Quand j'tais au Cannada dreinement, j'allis vaie des d'scendants d'Jèrriais. Comme ch'est tréjous l'cas dans d's occâsions d'mème, la convèrsâtion 'tait entouorre Jèrri et tch'est tch'était l'êtat des choses dans l'Île “Quand p'pèe 'tait-là d'vant v'nîn à La Côte?” Lé fait qué l'péthe ou grand-péthe 'taient v'nus dans des navithes à vailes les fait penser qué ch'tait dans les touos viers temps tch'i' fûdrent nés. Eune chose tchi pathait êt' lé cas dans les fanmiles dé souche Jèrriaise au Cannada, étout, est tch'i' sont avinnées à l'Églyise Anglyicanne - probabliément viyant qu'les pathents ou grand-pathents 'taient v'nus à La Côte et qu' les Robîns avaient encouothagi et mème aîdgi à êtablyi ch't Églyise-là tout l'long d'La Côte dé Gaspé oú'est qu' lus runs 'taient situés, et quand j'lus dis qu' Jèrri 'tait partie d'La Nouormandie quand Dgillaume lé Contchérant fit la contchête dé l'Angliétèrre en 1066, i' mé d'mandîdrent si lus anchêtres dans l'Île avaient 'té Anglyicans dépis ch't année-là.
“Ch'est toute eune histouaithe”, j'lus dis. “Ch'tait l'Églyise Catholique Romaine tch'etait l'églyise dé la Nouormandie (et, sans doute, dé Jèrri) en 1066, et Jèrri 'tait dans l'Diocèse dé Coutances. Quand l'temps est cliai, nou peut vaie les flièches des clochièrs dé la Cathédrale dé Coutances du haut du Châté Mont Orgueil, et ch'tait tout naturel qué l'Île fûsse dans chu Diocèse-là. Oulle y restit mème auprès qué l'Contchérant s'êtablyit en Angliétèrre, car i' n'joingnit pon l'Île au Rouoyaume. Ou restit partie du vièr Duché et payait ses împots à Rouen. Ses Juges d'Assise v'naient d'Rouën, et les sou en ûsage 'taient d'provenance du 'Monnayage dé Rouën'. La vie continnuait comme d'amors, et les Jèrriais n'avaient autcheune pensée tch'il' appartenaient à l'Angliétèrre. Ch'tait l'contraithe, en êffet. S'il y pensaient du tout, il' éthaient considéthé qu' l'Angliétèrre lus appartenait!
Mais 150 ans pus tard, lé Rouai Jean pèrdit La Nouormandie continentale (en 1204). Jèrri s'trouvit s'pathé d'san vier ancrage. L'Île 'tait trop liain d'l'Angliétèrre pour dév'nîn iun d'ses comtés. Ses couôteunmes, sou, louais, paids et m'suthes 'taient d'Nouormandie. Ch'est en tchi l'Île fut pèrmînse d'êvoluer san destîn lyi-mème. L'Assembliée d'Pâraisse, présidee par lé Connêtabl'ye, 'tait déjà êtablyie. Les Chent'nièrs 'taient responsabl'yes pour la seurvillance dé chent fanmiles, et les Vîngt'niers dé vîngt. Lé Bailli et les douze Jurés fonctionnaient, et pus tard Les Êtats fûdrent êtablyis auve lé Bailli comme Président, auve les douze Jurés et les Connétabl'yes et les Recteurs des douze pâraisses, et pour pus d'sept chents ans Jèrri s'est gouvèrné li-même.
En affaithe dé réligion, Jèrri restit dans l'Diocèse dé Coutances. En 1499, Henri Huit avait ieu l'autorisâtion du Pape Alexandre VI dé transféther la juridiction d'l'Églyise en Jèrri au Diocèse dé Winchester en Angliétèrre, mais rein n'en résultit et Jèrri continnuit souos l'Êvêque dé Coutances jusqu'au temps d'la Réformâtion. Ch'tait en 1534 qu' Henri VIII d'Angliétèrre eut sa dispute auve lé Pape Cliément d'Rome, mais les catholiques Romains Angliais continnuîdrent à hanter l'Églyise d'Angliétèrre pour trente-siex ans, chein tchi dêdit l'èrcliâme modérne qué Henri avait crêé eune nouvelle Églyise. Si tel en avait 'té l'cas, les Papes dé chu temps-là n'éthaient pon pèrmîns ès fidéles dé s'communier ès autels dé l'Églyise. Ch'tait en 1570 que l'Pape Pie V prononcit l'excommunicâtion d'la Reine Elizabeth et d'l'Églyise d'Angliétèrre.
Dans l'entrétemps, lé Calvinnisme, v'nant d'la France, fit s'n appathence dans l'Île, et l'Catholicisme dispathut en Jèrri. Les crouaix, autels, bénêtchièrs, fonds baptismaux, estatues, etc., fûdrent hâlés dé d'dans l's églyises, et touos les bancs fûdrent arrangis à fachi la Tchaîthe. Jé n'sai pon dans tchil' année que ch'la s'arrivit car jé n'sis pon d'amain d'ma biblyiothèque pour vérifier la date, mais j'crai qué ch'tait dans les 1549. Pus tard, la pérsécution des Huguenots en France am'nit un tas d'èrfugiés en Jèrri et v'la tchi renforchit les Calvinnistes dans l'Île. Nou peut don penser, et mème affirmer, qu' la réligion des Jèrriais fut Calvinniste pour eune septantaine d'années ou pus.
Mais en 1620, l'Églyise en Jèrri fut dé définitivement incorpothée dans Diocèse dé Winchester par ordre du Rouai en Conseil, et la Litourgie Anglyicanne fut translatée en Français et un Douoyen fut nommé. Nou peut dithe qué les Jèrriais ont 'té Anglyicans dépis 1620. En 1783 les Méthodistes Wesleyens convèrtîdrent un tas d'monde dans lus tchulte, et des chapelles fûdrent bâties ichîn et là dans l'Île. En 1803 les Catholiques Romains lus r'trouvîdrent les bein-v'nus en Jèrri quand pèrmission fut donnée ès Rouoyalistes dé France d'lus r'fugier dans l'Île quand la Révolution les chassit d'siez ieux. Quand j'tais mousse, les Romains 'taient dans les trais du chent d'la population. À ch't heu j'ai ouï tch'i' sont dans les trente du chent, et les réligions Juive et Mormon sont r'présentées dans l'Île étout. La tolérance en a finnalement gangni! Mais nou peut dithe qué la grande majorité des Jèrriais ont 'té Anglyicans dépis 1620.”
George d'La Forge.
Viyiz étout: