Lé Menage ès Feuvres,
St. Ouën.
Lé 8 de juilet, 1973.
Moussieu l'Rédacteu,
Nou n'est pon supposes d'vivre dans l'pâssé, mais en jouissant du temps d'à ch't heu nou n'peut pon sénon sé d'mander l'originne d'un tas d'choses, et ch'est dans l'pâssé tch'i' faut chèrchi pour à St. Ouën, par exempl'ye, j'avons tréjous 'té ordgilleurs qué la fanmile de Carteret est St. Ouënnaise et qu' sa Seigneurie est Fief Haubert et d'grande antitchité. En liêsant les “Tableaux Historiques” dé John Patriarche Ahier l'aut' jour j'dêcouvris qué ch'tait dans l'régne d'Edouard Deux (1308-1327), qué la Seigneurie fut transformée en Fief Haubert en rêcompense pour les sèrvices du Seigneur dans la dgèrre dé 1296.
La dgèrre dé 1296 eut lieu entre l's Êcossais et l's Angliais, mais Jèrri s'était trouvé embaûtchi d'dans viyant qu' Edouard Preunmyi d'Angliétèrre (1272-1307), voulait envahi l'Êcosse, et l's Êcossais avaient d'mandé à Philippe, Rouai d'la France, d'envahi l'sud d'l'Angliétèrre pour lus donner eune chance dé combattre l's Angliais dans l'nord. Lé chînq d'avri, 1296, à peine si Edouard s'était mins à l's attachi qué lé Rouai Philippe env'yit eune fliotte dé navithes dé dgèrre, plieins d'soudards, pour prendre Jèrri et envahi l'Angliétèrre.
L'Amitha Français voulut tout à forche dompter Jèrri preunmiéthement. Il êprouvit à d's'embêrtchi ses troupes dans les baies l'tou d'l'île, mais i' fut battu toutes les fais par le couothage et l'esprit batilieux des braves Jèrriais. Il y pâssit tout l'êté et n'put janmais rêussi à garder l'pid à tèrre, et quand vînt lé s'tembre i' fut oblyigi de s'en r'aller en mé, honteux et humilié d'aver pèrdu la saison sans mème aller jusqu'en Angliétèrre.
Mais la dgèrre fut êcrasante et désolante pour les Jèrriais. Les récoltes et la tchultivâtion en général fûdrent néglyigies par la nécessité d'combattre les Français à la pliaiche dé travailli dans les clios. Et i' ieut un tas d'hommes tués dans l'couothant d'l'êté et y'avait des veuves et d's orphélîns à gogo par lé temps qu' les Français avaient fichi l'camp. Ch'est en tchi l's habitants, en mâsse, env'yîdrent des pêtitions au Rouai Edouard pour les soulagi.
Lé Rouai comprint qué ch'tait san d'vé d'lus aîdgi viyant tch'il avaient combattu l'ennemîn touos seurs et sans s'n aîgue, et il accordit des pensions ès veuves et des rêcompenses es pèrsonnes tch'avaient subi pèrtes et danmages. Mais comme touos les rouais i' vînt a court de sou viyant qu' la dgèrre avait ruinné la trésor'rie rouoyale, et chînq ans pus tard, prétendant tch'il 'tait l'seul propriêtaithe de touos les beins pour tchi tch'i' n'y avait pon d'titres dé possession entre les mains du t'nant ou d'l'otchupant, i' s'mînt à confistchi toutes les propriêtés des gens tchi n'pouvaient pon produithe un contrat prouvant tch'il' 'taient à ieux.
Dans chu temps-la, i' n'y avait pon dé r'gistres, et les titres dé donâtions rouoyales 'taient l'pus souvent entre les mains du Rouai et les contrats êcrits 'taient aussi rares comme les sou. I' y'eut tant d'pèrsonnes dèpossédées d'lus bein que ch'fut la cause d'un tas d'mînséthe par toute l'île, sustout comme i' n'avaient pon 'couo ieu l'temps d'lus r'mett' sus pid auprès lus batâles contre l'envahisseur.
Lé Rouai avait env'yé trais “Commissaires” rouoyaux Barentin, Flessingfield et Diton, pour entréprendre l'adminnistrâtion des propriêtés confistchies, mais i' n'taient pon satisfaits d'vengi les dêpossédés. I' c'menchîdrent a d'mander comment qu' les Jèrriais lus gouvèrnaient, tch'est tch'était lus louais, lus drouaits politiques, privilèges, et souos tch'il autorité tch'il' 'taient fondés. Les Jèrriais rêponnîdrent qué nouos louais n'étaient ni Angliaîches ni Françaises ni données par les Rouais, mais tch'il' 'taient des couôteunmes en ûsage dépis un temps immemorial et administrées par lé Bailli et les douze Jurés du Rouai, et qu' l'autorité d'touos les drouaits de tchi i' jouaissaient sé pèrdait dans l'antitchité. “J'en jouissons viyant qu' y'en avons tréjous joui,” i' dîdrent es “Commissaires”, et comme ches'-là n'avaient autcheune preuve au contraithe, l'affaithe sé pâssé d'mème.
Lé règne d'Edouard Deux fut don eune véthitabl'ye attaque continnuelle contre châque Jèrriais en partitchulyi par ses d'mandes dé titres d'propriêté, et contre la communauté en général en chèrchant à trouver l'mouoyen d'confistchi ses louais, drouaits, libèrtés et privilèges. Mais les Commissaires voulîdrent quand mème donner tchique sembliant d'justice à lus d'mandes, et ouïyant sus les lieux comment qu' les Jèrriais s'étaient battus contre les Français vèrs la fîn du règne d'Edouard Preunmyi, et tch'i' n'avaient pon touos 'té rêcompensés, la Seigneurie d'St. Ouën, appartenant à Renault de Carteret, fut transformée en Fief Haubert. Ch'tait tout probabliément en 1308/9.
Hélas! Tch'est tch'est dev'nu des d'scendants d'ches braves Jèrriais-là tchi vivaient tréjous au péthi d'lus vie? I' sont probabliément parfénés un mio par tout l'monde, et les cheins tchi sont ichîn dispathaîtront d'vant bein des généthâtions, car Jèrri d'veint d'pus en pus l'pays d's Angliais et d's êtrangiers.
George d'La Forge
Viyiz étout: