Le Ménage ès Feuvres,
St. Ouën.
Lé 28 juilet, 1973.
Moussieu l'Rédacteu,
Janmais jé n'm'enn'yis d'visiter nouos églyises pâraouaissiales et d'èrgarder et d'liéthe les pliaques tch'ont 'té mînses sus les muthâles en mémouaithe des illustres Jèrriais, membres des congrégâtions tch'ont, dans lus viyant, louangi L'Bouan Dgieu d'dans. Sans doute, mème à m'n âge, jé n'sis pon vyi assez pour l's aver connus pèrsonnellement, l's illustres, mais ches jours qué nou n'ouait qu' des noms êtrangièrs lé tou d'sé, ch'est mangnifique dé vaie les bieaux vièrs noms sus les pliaques comme, par exempl'ye, les d'Carterets et d'Auvèrgnes à St. Ouën, les Pipons à St. Brélade, les Lempriéthes à St. Martîn et les Patriarches à St. Hélyi.
Dans l'églyise dé St. Jean y'a eune pliaque tchi m'a tréjous întérêssi viyant qu' j'ai connu un membre d'la fanmile mentionnée d'ssus. Ch'est la cheinne à la mémouaithe dé Dumaresq Valpy, né en 1848, fis Edouard, dé chutte pâraisse-là. San nom 'tait Dumaresq Charles Valpy, et i' s'en 'tait allé à La Côté travailli pour les Fréthes Le Boutilyi. Là, il avait mathié Mdlle. Drusella Tuzo. Les Tuzo 'taient v'nus à Pèrcé, à La Côté, des îles dé Bèrmude, en 1810, et ch'tait ieux tch'avaient, entr'autres, fondé et bâti les preunmiéthe églyise Anglyicanne à Pèrcé.
Comme ch'tait la couôteunme d'un tas d'Jèrriais, Dumaresq Charles Valpy s'en r'vînt visiter san chièr Jèrri auprès ses années d'apprentissage à La Côté, et duthant lé viage d'èrtou à bord du stînme Circassian dé Liverpool, il eut l'malheur, lé 20 d'mai, 1890, dans l'couothant d'eune tèrribl'ye tempête, d'êt' frappé par eune formidabl'ye louême tchi l'fliantchit ava iun des compangnons et i' mouothit d'ses bliesseûthés et fut “entèrré” en mé. Il avait quarante-deux ans.
I' n'est pon dit si sa femme 'tait auve li, mais i' faut penser qu' oui car l'histouaithe dé l'églyise Anglyicanne dé St. Paul à Pèrcé nouos dit qu' ou s'en allit d'meuther à Pèrcé en 1890. Il' avaient probabliément d'meuthé à Pabos d'vant faithe lé viage en Jèrri, car l'histouaithe dé l'églyise nouos dit qu' lus trais preummièrs êfants fûdrent nés lá. Lé quatrième, né à Pèrcé en 1890 auprès la mort dé san p'pèe, fut nommé Dumaresq Charles comme li, et il allait à l'êcole à Pèrcé auve man fréthe Sydney George tchi d'meuthe à Ottawa à ch't heu. J'lé visitînmes siez-li, Sydney et mé, en 1964. Il avait mathié eune charmante démouaîselle du nom dé Laura Tardif, membre d'eune fanmile tch'était v'nue d'St. Pièrre Port en Dgèrnésy. I' mouothit en 1968 et fut entêrré dans l'chinm'tchiéthe dé l'églyise dé St. Paul, où'est tch'il avait 'té toute sa vie, lé 24 d'avri dé ch't année là.
Eune pliaque dans l'églyise pârouaîssiale dé St. Ouën a un intéthêt tout spécial pour les St. Ouënais viyant qu'oulle est à la mémouaithe d'un membre illustre et întrépide dé lus fanmile Seigneuriale dé St. Ouën - la fanmile de Carteret. La pliaque est sus la muthâle driéthe l'Autel dans la chapelle dé l'églyise nouvellement amênagie. Ou fut pliaichie là en mémouaithe dé Messire Philippe de Carteret, Chevalier, Seigneur dé St. Ouën, Sèrcq et Rôzel, Lieut'nant-Gouverneur et Bailli, né en 1583 et décédé le 23 d'août, 1643, au Châté Êlizabé “Qu'il tenait pour le Roi Charles premier contre les rebelles”. I' fut entèrré dans l'églyise, à côté d'sa danme (décédée lé 30 janvyi, 1643) lé 20 d'juîn, 1644.
San corps, embaûmé et encôffré dans un côffre en pliomb, avait resté dans la chapelle du châté dépis san décès viyant tch'il avait exprînmé lé d'si dé n'êt' pon mîns en tèrre dévant qu' lé rouai fûsse restaûré dans ses drouaits rouoyaux.
Lé fanmeux Journal dé Jean Chevalier nouos donne un long dêtail dé l'entèrrement. Lé côffre, couvèrt d'un nièr drap auve ses armueûthies des deux côtés et san sâbre nu d'ssus, fut porté du châté à l'églyise dé St. Ouën sus eune ât'leuse à quat' reues et liée à quat' chévaux. Lé cortège 'tait sieut par un grand nombre d'soudards auve lus moustchets souos lus bras, comme nouos l'dit Jean Chevalier, et les “piquièrs” portaient lus piques pointées en driéthe. Les tambours 'taient enfliubés en nièr, et touos les t'nants du fieu et eune multitude dé gens siévaient l'cortège. À la sortie du corps du Châté Êlizabé, les canons des deux châtchieaux et des douze pâraisses fûdrent tithés. Dans l'églyise, la Tchaîthe 'tait couverte en nièr et ses armueûthies fûdrent posées d'ssus. Lé sèrmon fut prêchi en Angliais, et quand l'corps fut mîns en tèrre les soudards tithîdrent eune volée d'trais coups d'moustchet, et i' fut salué par les canons d'toutes les pâraisses, c'menchant par St. Ouën et sieues par châtcheune des aut' pâraisses à m'suthe tch'i' ouiyaient l'canon d'la cheinne d'à côté.
Auve les pliaques dans nouos églyises, lus r'gistres, lé Journal dé Jean Chevalier, les bulletîns d'La Société d'Jèrsiaise et d'L'Assembliée d'Jèrriais, j'avons un trésor historique tchi méthite d'êt' êtudié et apprécié par touos vouos lecteurs.
George d'La Forge
Viyiz étout: