Les Pages Jèrriaises

D'la bourdonn'nie!

eune bourde Fort Lauderdale,
Florida

Lé 10 d'avri, 1976

Moussieu l'Rédacteu,

M'èrvélà d'l'aut' but d'l'Améthique! I' n'y a pon longtemps qué j'tais à vouos êcrithe dé La Califournie, à l'extrême ouest d'ichîn, et pis du Texas, dans l'mitan du pays. À ch't heu m'èrvélà dans La Floride, dans l'extrême partie est. Mais dans les trais êtats j'ai tréjous 'té dans l'sud où'est tch'i' fait caud. La distance dé San Diego, en Califournie, jusqu'ichîn est à bein près trais mille milles, comme dé Jèrri à New York, et nou peut faithe la distance dans eune affaithe dé chînq ou siez heuthes en avion, dépendant du temps pèrdu en arrêt ès aérodromes en c'mîn.

J'avons ieu un hivé caud et bé. Dépis bein d's années j'ai ieu l'idée qué les clyînmats ont changi d'pis qué j'tais mousse en Jèrri. Dans chu temps-là i' m'sembl'ye qué l's êtés 'taient bein pus cauds là tch'i' n'sont à ch't heu et tch'i' y'avait bein pus d'moûques par les c'mîns. I' m'sembl'ye qué j'les ouai acouo bourdonner à l'entou des f'nêtres quand j'tais dans la forge auve Papa, et qué la chaleu m'faîsait aver envie qu' Dînmanche l'arlévée vînsse vite pour tch'i' m'enmène à L'Êta pour qué j'pûsse mé bangner. Quand la mé 'tait au pliain j'aimais bein m'bangner dans la tchithiéthe à côté d'la tour (abattue d'pis par les Allemands) dans L'Havre. Papa aimait bein m'vaie m'bangner là étout, car i' pouvait s'assiéthe à côté d'la tchithiéthe et garder s'n'yi sus mé en sé r'posant. Et pis nou finnissait par ramonter l'Mont du Vallet et s'assiéthe sus l'haut des falaises en fache dé l'Hôtel dé L'Êta - i' n'y'en avait qu'ieune dans chu temps là - pour vaie les mêssieux arrêter à l'hôtel dans lus carrosses. Papa aimait tréjous vaie et admither les bieaux j'vaux.

En pâlant d'moûques, j'ai r'mèrtchi qu'nou n'en vait pon fort en Jèrri à ch't heu. Heutheusement! Ichîn et au Cannada les gens en ont horreur, et toutes les maîsons ont d's êcrans ès f'nêtres et portes pour l's empêchi d'entrer. Y'en avait tant en Jèrri y'a eune huiptantaine d'années qué les gens n'y prannaient pon fort d'avis, et y'avait bein des ditons entouôrre. Par exempl'ye, quand l'temps 'tait bé et calme, nou disait: "La moûque bait dans l'ieau!" Et quand eune pèrsonne voulait dithe qu'oulle ithait d'tchique bord si l'temps 'tait bé, ou disait: "Oui, j'ithai si la moûque bait dans l'ieau!"

Quand eune pèrsonne viyait cliai et avait l's ièrs partout, nou disait: "Oulle a d's ièrs dé moûque!" Et quand eune pèrsonne exagéthait en pâlant d'autcheune chose, nou disait: " Oulle est à faithe d'eune moûque un êléphant!"

Av'-ous tchiquefais pensé au nombre d'difféthentes moûques qué j'connaîssons comme mousses? Et combein d'mousses Jèrriais tchi savent lus noms en Jèrriais à ch't heu? Sans doute la cheinne qué nou viyait l'pus 'tait la moûque dé tchuîsinne. Et pis y'avait la moûque d'êtabl'ye, la moûque à vèrs, la moûque à paîsson, la moûque à boûse - tchi hantait les boûses dé vaques - la moûque entâthique, la moûque à longs pids - appelée, étout, un esprit gêné. Et la moûque d'un jour.

L's anciens appelaient les bourdons des moûques à myi., et quand j'tais mousse i' y'avait eune crianche entouôrre. Quand l'maître dé la maîson 'tait au suaithe, i' fallait couvri les rueûques des moûques à myi tch'étaient sus sa propriêté atout un nièr vouaile pour empêchi les moûques d'êssaimer et d'mouothi étout. Et y'avait un diton, étout. quand eune pèrsonne avait tout ch'qu'ou pouvait porter à bras ou sus l'dos, nou disait: "Oulle est chèrgie coumme eune moûque à myi!"

Malheutheusement, l'caud clyînmat d'man janne temps pathait aver dispathu auve les moûques et j'trouve lé temps pûtôt fraid en Jèrri à ch't heu. Au Cannada, i' m'sembl'ye qué ch'est l'contraithe et qué l's hivièrs né sont pon si fraids comme quand j'y vîns en 1919. Mais ch'n'est rein d'nouvé, lé changement d'clyînmat, pathaît-i', dépis tch'i' nouos est dit qué lé d'sèrt du Sahara soulait êt' souos la mé!

Sautant du coq à l'âne, félicitâtions au Canon Lawrence Hibbs, lé nouvieau Recteu d'Grouville. né v'la deux minnistres Jèrriais, li et Moussieu Richardson d'St. Ouën, tchi sont Canons d'la Cathédrale dé Winchester. Ch'est un honneu pour Jèrri, et ch'est mangnifique dé r'vaie tchiques Jèrriais minnistres dé nouos pâraîsses. Lé portrait dans la gâzette dé Moussieu Hibbs et des gens auve li en d'vant dé s'n églyise montre tch'il a eune bouanne grand' congrégâtion. Nou n'en vait pon fort dé même dans l's églyises en Jèrri ches jours.

Si nou peut en jugi par les dêpens du Conmité d'Éducâtion - la gâzette pâle dé quat' millions dé louis - l's êfants d'Jèrri s'en vont dév'nîn les pus savants au monde! I' faut espéther tch'i' sont acouo înstruits à la vielle mode. Il' ont d's idées d'înstruction tellement nouvelles et avanchies ichîn en Améthique qué même un tas des jannes tch'ont pâssé l's êcoles sécondaithes et tch'ont finni au collège né peuvent pon êp'ler correctément ni êcrithe eune lettre comme i' faut!

George d'la Forge

 

Viyiz étout:

 

Les Pages Jèrriaises